6.06.2006

海神號 Poseidon

機緣巧合,幾年前曾經睇過呢部《海神號歷險記》既舊版,廿幾年前既戲,特技當然無現在咁好,但係劇情絕對唔錯,那個逃離團的每個角色都好立體和真實,情節亦幾緊張。現在重拍新版,當然唔會期待有咩藝術價值,但起碼希望可以睇得一些緊張刺激既野。

相對舊版,新版發生既海難時間比較早,電影開始不久,已經反船了。而反船那一場既氣氛,我覺新舊版都唔係掌握得咁好,沒有好好利用那種大災難忽然而來的恐怖,有點浪費的感覺。

逃亡戲就係逃亡戲,由頭走到尾。都算幾緊張,第一個人死既時候最恐怖,點知之後既反而無死得咁勁。幾場游水戲睇落都好逼真,不過真係挑戰人類潛水極限。

估佢唔到,呢部戲入面都有企業管理。前市長是公司主席,穩重、做決定快、放手給員工發揮,必要時企出來主持大局。帶領眾人離開的賭徒是 CEO,有決心有魅力有計劃,大上大落。

相比上集,今集在人物的心理上的描繪較少,人們之間的關係亦較少講到。唔知點解,睇完部戲,同女朋友有同一個感覺,就係舊版海神號,影響了鐵達尼,而鐵達尼亦影響了新版海神號,不能說得上是不斷進步,但卻有一種世代相傳的感覺。