Darth Mike Movie Record

再見

2011-04-17T08:10:00.000+08:00

唔經唔覺，已經停寫movie record數月了。

無錯，我已經唔會再為所有入戲院睇的戲寫下感想了，這是在2010年十二月尾下的決定。

因為時間接近的關係，我要聲明，這和結婚是完全沒有關係的，獎門人甚至對此決定表示可惜，畢竟她也是一個影迷。

大大話話，呢個blog都已經寫左好多年了。寫出來的東西是好是壞，我無法評價，但事實上，我是寫得絕不輕鬆的。基本上那短短的數百字，總是要花上差不多一小時去寫。無形中，這亦是一種壓力，在睇戲的時候已經開始諗點寫影評，難免有一點抽離。在放棄後的這數月，已經看了很多部電影，感覺上的確是可以更加投入。

好笑既係，為了不受別人的觀感所影響，我在寫作前是不看其他人的影評的。但又因為我成日都好遲先寫，所以大部份時間我是睇唔到其他人的睇法。

另一方面，畢竟也寫了這麼多年(可惜既係，留言始終都係咁少)，也是時候把心力放在自己的其他興趣吧。

多謝支持。

社交網絡 The Social Network

2011-01-24T23:49:00.003+08:00

事先聲明，第一，我是David Fincher的fans，睇過《Fight Club》不下十次。第二，我是一名IT人，甚至我會自認為半個geek，所以我對戲內的主角Mark Zuckerberg和提到的jargon都甚有親切感。第三，我一日要上facebook三次或以上。

電影本身節奏明快，縱使有時空交錯式講故事，但絕不混亂，亦不拖泥帶水。David Fincher拍短片起家，畫面和音樂配合得很好，連本身勁geek既主角都拍得算有型。相比起其他拍短片起家的導演，David Fincher能夠成為大師，好大原因是他選對故事，亦表現到當中既人生觀，而在作品中又唔會過份賣弄技巧。

講番故事，之前無講錯，呢部戲真係拍得Mark Zuckerberg幾型。全片我最鍾意一段，就係佢係開發facebook的期間，在等上堂的時間發緊夢，被另一位男同學不斷追問一位女同學的感情狀況時，靈機一觸，諗到在facebook加入感情狀況，之後他由課室直奔回宿舍，導演刻意放了一些時間去拍他跑跑跌跌地衝回宿舍，再看著他極速地加入這個功能。整個過程一氣呵成，由慢到快，將主角的決心、驚人的專注力及技術表露無違，當中展現出佢個人的吸引力。

Mark Zuckerberg那份近乎瘋狂的決心特別值得一提，故事提到他多次為了達成一些目的，往往可以專注得忘記了身邊的人和事。除此之外，他並不是一個普通的執著怪，他的才能高得可怕，開段用了不少時間講他的特別之處，包括那段多線發展的對話及一夜之間hack了哈佛多個院舍的電腦，無非都係想講他並不單純是一個行為古怪的大學生。

Eduardo Saverin及那對孖仔也在戲中起了重要作用，他們代表了舊世代的天之驕子。Eduardo Saverin真人我覺得應該比電影中來得醒目，否則Mark Zuckerberg未必會當佢係朋友。

簡單咁講，呢部係我2010年最後睇既電影，十分出色，是真正能夠打動人心的電影，繼《Fight Club》之後，David Fincher再一次衝擊我的人生，令我進行了很多的反思，我會買碟睇多佢十次八次，就像《Trainspotting》、《Fight Club》、《香港製造》、《重慶森林》、劉以鬯、村上春樹和伊坂幸太郎一樣，改變和合成我的性格。

海上傳奇 I Wish I Knew

2011-01-23T09:41:00.004+08:00

終於也看了我的第一部賈章柯電影，嚴格來說，這其實是一部訪談紀錄片，由很多來自不同地方的人，有名人，也有普通人，說著上海和他們的關係。影片內有一位女角在上海四處走動的片段，恕我無知，實在睇唔出那些訪談人物出現的次序和這位女角背後有甚麼玄機。

賈章柯近年喜歡拍紀錄片，以不同角度拍下現在的中國，相信影片對後世甚有價值。開初聽到賈章柯這部《海上傳奇》，還以為會提及很多關於上海的黑暗面，但原來導演集中在人這個層面上。老一輩的人說著上海和他們的故事，新一代的說著現在他們怎樣在上海生活，感覺上保持中立。

上海，以近數百年來說，她可稱得上是全中國最有故事事及代表性的一個地方，而以現時來說，她是全球其中一個最重要及最有活力的城市。要了解一個地方，不單只看她有多繁榮，還要看她的內涵。

雖然這並不是一部十分正宗的電影，但還是期待可以找回賈章柯的舊作或看他的全新電影。

軌道 Rail Truck

2011-01-23T09:09:00.003+08:00

我相信可以歸立這電影為其中一部後《海角七號》電影吧，也是和台灣日治時期有關，若果《海角七號》唔係收得咁勁，我確實懷疑是否有人願意出錢拍這類故事。

對於我們香港常見的諗法，年老的華人大多是反日的，因為畢竟他們也較切身地感受過日本人當年的侵略。從這部電影，我們可以看到，對於老一代的台灣人，他們卻有對日本人卻有另一種的感覺。

關於香港在三年零八個月，大家也多數只有一些傷痛的回憶。但對於台灣，日本卻確實地做了很多社會上的建設及文化上的影響，部份台灣人更希望可以真正成為一個日本人。

這電影講台灣一個家庭三代人，當中有整輩子也希望成為日本人的爺爺，趁日讀書及娶了一位日本人的兒子和兩位在日本長大，完全唔識國語的孫兒。籍著在日本的兒子死去，日本人家嫂帶著先生的骨灰和兩位兒子回去先生的台灣故鄉，當中所發生的一些事情，訢說著不同年代和不同民族之間的情懷。

電影拍攝現場是台灣一些山區，畫面優美得像在看紀錄片，但奈何節奏實在太慢，故事亦起伏不多，觀看既時候需要不停和睡魔作戰。

全員惡人 Outrage

2011-01-16T23:32:00.003+08:00

事後諗清楚才發現，原來呢部係我睇既第一部北野武導演的電影，之前試過幾次有興趣，但最後都係不了了之。

電影比預期中更血腥暴力，是一種很直接的暴力，並無多餘的鋪張，可能這就是暴力大師的功力。

故事本身是典型的黑幫仇殺片，殺來殺去，爭權奪利，一方面在宣揚義氣，一方面在互相奪利。可幸的是，北野武的幫派並沒犯上主角無敵的常見劇情。最後安排加瀨亮過檔及黑幫轉型的結局，很有時代轉變的感覺，說明著義氣行先及舊式黑幫經營方法已經落伍，新一代只向錢及效率看。

電影另一個令我大開眼界的地方，是北野武幫派內眾人的服裝。那些西裝，貼身有型，英氣十足，心想日本人真的是懂得穿好西裝。事後睇埋字幕，才知道那是出自山本耀司之手，便知道難怪了。

酒徒 The Drunkard

2010-12-30T17:03:00.001+08:00

期待已久的電影，很多年之前看過這部小說，正式成為劉以鬯的粉絲，另外亦讀過幾本佢既中篇及短篇小說，印象最深刻的便是這部《酒徒》。作者用意識流的手法去表達角色在不同時侯的感情，十分特別。

要將這部小說拍成影象，難度甚高，特別是故事內那些醉酒後的片段，真假難分，似是夢境，亦似幻覺，難以用鏡頭直接去表現出來。

導演使用了幾種手法，例如斷開畫面的文字及旁白，但效界一般。另外，相對於小說內的飲酒場面，電影版來得太真實，少了一種浪漫。

以我尚有的記憶，電影版的內容基本上跟足原著，誠意十足。可惜的是，這故事本身注重意境，強行將佢實體化確是十分困難。

告白 Confessions

2010-10-21T07:59:00.002+08:00

這部電影正如傳聞一樣，確是十分利害，故事本身很有意思，導演所用的表達方式（包括演員，剪接和配樂）亦很特別。

故事大意是探討罪與罰的關係，罰的本意應該是令犯罪者明白自己所造成的傷害及改過，但問題是罰本身是否真的有這個作用。日本的少年法係一個公開既問題（好多年前香港既雜誌都有報導過），初中生基本上已經擁有獨立思考能力和不能小觀的破壞力，仁慈的少年法本身是否已經過時確是一個很大的問題。

呢部係我近年睇既第二部日本電影談及法律，之前一部是《儘管如此我沒有做過》，這電影講火車非禮案對男性的不公，亦是十分精彩的作品。用文化去反思法律的不足，是一個文明的表現。

《告白》這電影籍著不同人的自白去講各種兒童社會問題，好像家長的過份愛錫和將自己的夢想強加在兒童的身上，兩個極端同樣會影響兒童的心理發展，另外當然唔少得校園欺凌這個永恆的問題，在人人有電話的年代，欺凌進行得更有效率。

之前睇過導演的《下妻物語》，已經覺得他的手法很獨特，今次更加見到他的膽識。全劇基本上由一段段的自白所組成，但完全唔會覺得悶。主要原因除了因為故事本身有追看性之外，畫面及音樂的配合亦都應記一功。畫面隨著內容的起伏而轉變，觀眾很容易被畫面所吸引。Johnny Greenwood的配樂亦十分利害，那些一層層的音牆很配合電影內角色們內心的孤獨，Radiohead的主題曲亦很正。

綫人 The Stool Pigeon

2010-09-18T08:38:00.004+08:00

這部名為《綫人》的電影，要說的其實是關於三個說謊的男人，他們為了不同的原因說謊，電影探討了他們在說謊後的心理壓力及遭遇。

廖啟智演一位資深的綫人，多次協助演警察的張家輝破案，後來因一次行動失敗以致身份敗露，在被江湖人士追殺時迫到變了精神病。智叔在此片的戲份不多，為了表現出做綫人時的壓力及患上精神病後的狂態，用了很誇張的方式去演這個角色，十分搶鏡。雖然出場時間唔算多，但重要對白卻不少，全片主要也是靠他的口去說出做綫人的痛苦。正如他片中所言，綫人以出賣身邊的人為生，基本上無朋友，唯一比較可信的只有作為警方接頭的張家輝，一直也活在極大的壓力底下，事敗後還要搞到家破人亡及經常逃避追殺，可算是一個很可悲的收場。

如果說廖啟智是資深，那麼謝霆鋒便是新手綫人了。電影內講了他成為綫人的原因及過程，當然是那種身不由己的原因吧，好地地有邊個想做二五仔？謝霆鋒在片內的角色比較正路，主要是講他由一開始拒絕做綫人到無奈接受，之後開始進入適應期，在逐漸掌握綫人技巧的同時亦開始（勁老士地）和目標人物產生感情。雖然謝霆鋒在經驗上及不上廖啟智和張家輝，但我在事後也為他感到有點不值，相對於另外兩人的角色特別設計，謝霆鋒的角色明顯過於傳統，同類的角色在以住的電影出現得太多，連那句被人玩到爛哂既臥底（綫人）片經典對白，都要由謝霆鋒講一次（雖然我一直在期待這句對白，因為說這句對白的時侯，通常也是在全片的高潮）。

已經數唔清張家輝在上一部同一班底的電影《証人》拿了多少個影帝了，或多或少，張家輝在這部電影應該受了不少演出上的壓力。在《綫人》當中，張家輝以真面目演出，但戲內的他，卻需要收起自己的真面目。有別於兩位綫人，張家輝是屬於警方的，看似不需要說謊，但實情並非如此。張家輝在戲內屬於情報科高層，劇中其中一幕甚為諷刺，講張家輝教導警方新人怎樣看待綫人，同時間剪上張家輝和廖啟智的關係。張家輝也需要說謊，他受著來自高層的破案壓力，他對他的綫人說謊，他同樣承受著對人說謊的痛苦。他希望做一些行動，去補救那些可算是間接被他害了的人。和綫人一樣，他也在演戲，他扮一個學跳舞的人去接近自己那個失了憶的太太，他也害怕被發現，而被發現的後果亦同樣地十分痛苦。

電影尾段的那場校園大打鬥，精彩程度可以及得上林超賢的舊作《野獸刑警》中黃秋生大戰譚耀文那一場，同樣地都是括出生命的野獸式打鬥，令人看得十分緊張。

舞出真我3D Step Up 3D

2010-09-01T23:10:00.002+08:00

相對起前兩集，今集將重心完全放在跳舞部份，那些愛情和友情之類的劇情完全放棄，對於一心睇跳舞的我們，可算是十分受落。

簡單而言，今集的故事由頭到尾也是關於battle的，講得上係場場精彩,可惜以室內比賽為主，街頭上的battle只得開場在公園那一場，亦欠了一些關於battle文化的交代，只是單獨將金錢和舞蹈成就連上，未免過於現實。

對於我等無舞藝之人，電影內的舞蹈簡直令人歎為觀止.室內比賽時的群舞十分精彩，除左話佢地係超勁之外，真係唔識得評價。

後尾上網check番先知，原來曲髮仔都有份做第二集，但真係諗唔起，望有心人告之。

森美小儀歌劇團 Prison De Ballet

2010-08-21T23:35:00.005+08:00

上星期去左睇森美小儀歌劇團，好鬼難買飛，但總算令我進行左一番反思。

事先聲明，我是忠實的商台支持者，初中時期開始聽，初時係聽《無字頭》和黃仲凱，聽得最多會係阿芝、森美、小儀、阿占、Donald和Inti（無錯，就係組Band，組Band，組Band時間又到～既Inti）既節目，雖然聲稱係軟硬FANS，但其實我係未聽過佢地以軟硬身份做既直播節目（電視節目就反而睇過）。對於另外兩個電台，我既個人感覺係一個老實和一個低能，簡單咁講我就係主觀地支持商台既出品。

平心而論，在這個電台影響力已經大不如前的時代，森美小儀（主要是森美）近年在商業上所造到的影響力確實是一個奇蹟。以森美為例，他的努力絕對令人尊敬。佢寫過幾本書，出過唱片，曾經在多部電影客串過亦都擔正過，同時亦一直擔任多個電目的主持，簡直令人懷疑佢一日係咪有三十幾個鐘。但始終未俾到人一個神檯級DJ或創作人的感覺，可能就是因為差了一種個人風格及成品未見完美。

以這部舞台劇為例，製作上唔專業尚且可以接受，畢竟一眾DJ並未受過正式的話劇訓練（但唔好忘記這已是第十年的出品，及那個甚專業的票價），更令人難以接受是當中故事的失控及唔完整。我並唔能夠太睇得出整個劇當中的故事，只是不斷有一些笑料出現，但故事本身枝節太多，亦有很多不明不白的地方，最後硬食一些人生道理亦和劇中故事連接不上。我總唔能夠因為你一大班人搞左一大堆野出來，無厘頭地連上你們已經搞了足足十年，然後硬插結論便給你們掌聲。

歌舞連場是無可口非，但是否精彩卻因人而異。可能因為場地音響的問題，基本上所有合唱的部份我也是聽唔清楚歌詞，獨唱部份亦未見精彩。原先很期待的精警的歌詞及對白也沒有很多，那一堆玩廣告的笑料確是不錯，但和劇情並沒有太大關係，流於空有聲勢。

值得反思既係，可能今天再給我機會看軟硬的出品，我亦只會落得失望的下場（就像他們的電影）。但無可否認，他們兩人都絕對是宣傳能手。

反斗奇兵3 Toy Story 3

2010-08-20T14:39:00.006+08:00

今年Pixar既年度功課，係佢地既首部電影及成名之作，《反斗奇兵》，的第三集及似乎會係最後一集。作為一個追隨了Pixar十多年及家中擁有很多件《反斗奇兵》玩具的fans，這個第三集令我十分之滿意及感動。

畢竟人總會長大，只有死物才會長生不老，《反斗奇兵》走出呢一步，勇於面對安仔長大的問題，比起《足球小將》式的講故事方法﹝故事連載左幾十年，但係主角仲係廿五歲都未夠，一場波仲係可以踢十期。﹞，將安仔由上集的少年一下就變做讀大學，當中的勇氣絕對令人起敬。

成長，是無可奈何加上避無可避，故事的感人之處，在於大家也勇於面對長大，安仔、安仔媽咪、胡迪、巴斯光年、火腿、薯仔先生...明顯地，大家也好唔捨得安仔的長大，在故事內大家也分別經歷過一個從抗拒到慢慢接受這個事實的經歷。

一班玩具們從一開始的想盡辦法去吸引安仔，到最後安於長眠閣樓，除了肉體上受到了很多痛苦，內心也受到極大的傷害，但他們就是忠於一個信念，他們是獨一無二的玩具，他們永遠也是安仔的玩具，他們和安仔一齊經歷過無數咁多既太空歷險和西部牛仔槍戰，他們就像小王子的玫瑰一樣，永遠獨一無二。

更令人感動的地方，在於安仔和胡迪，胡迪勇於將自己及一班玩具朋友，主動地令到安仔轉送給另一位小女孩，縱使本身胡廸可以跟隨安仔上大學，但他明白到安仔已經過了玩玩具的日子，他明白到他只能由一個玩伴變成一個擺設。

可能好多人都會妒忌安仔，因為他擁有胡迪及巴斯光年，但試問有幾多個人可以好似佢咁，玩同一班玩具可以由細細過玩到上大學？更難得既係，佢最後係真心將佢地交俾佢一個可信賴既新主人，縱使佢自己都好唔捨得，但他也明白這可能是最好的安排。

可能我真係大唔透，唔係誇張，我有生以來，為呢部電影流既眼淚係最多既，甚至係呢一刻，我都重係好想喊。

柯廸夫 Octave

2010-07-31T00:21:00.003+08:00

雖然已經相隔差不多三星期，當日更是一個由早上五時工作至下午二時的星期日，但在近日重溫這套音樂戲的原聲大碟時，還能夠清楚地回想起當晚的細節和興𡚒。

整部作品節奏明快，全部演員都作出了令人驚嘆的演出，最利害的不是兩位職業歌手，加上其他演員的合演部份才是最精彩，歌曲及舞蹈都很好及配合劇情。

很喜歡劇中柯廸夫的手勢，先緊握拳頭，碰一下心口，再碰一下頭，然後張開手做一個好像向上飛的手勢。正正表達出要夢想成真，必需緊握拳頭，有決心，有計劃，夢想才可以起飛。

小龍的對白設計確是拍案叫絕，稱得上係準確而到位，反映到角色既性格及感受之餘，亦吸引觀眾。但可惜全劇敗筆，亦在編劇的小龍身上，部份地方交代得過份簡略。

最明顯是張敬軒演的角色，在中學受到打擊，繼而活得像一個沒有了生命的人，我可以想像到中間的變化。一個人長期背負著自責去生活，人性總會變質，總會自暴自棄。單是幻想，我已經感到這個角色在成長期所受的內心痛苦。但在故事內，他重新振作的速度竟然可以這麼快，簡單化得過份，同樣的問題亦出現在其他角色身上。

這故事的主題是講實現在心中可能已經忘記了的夢想，一個很有意義的主題，當中重拾夢想這個環節唔應該受到這樣的簡略，我會認為這是一個避重就輕的手法，但卻足以令人感到有點美中不足了。

我認為W創作社需要成長，現在已經得到足夠既支持度去做一些更深入既劇本和演出，在叫好叫座的同時，在藝術的層面上走多一步。小龍是我由心底敬重既偶像，佢精於捕捉現代人諗法，我認為佢做得到。

鎗王之王 Triple Tap

2010-07-28T21:30:00.004+08:00

好可惜咁講，這是一部令人失望的電影。以這個幕前幕後的陣容，我會期望一流及完整的故事及表達技巧，可惜這只得算是一部很緊張的電影，有太多犯駁的地方，感情表達方面亦有錯失。

劇本的最大問題，就是有太多地方需要觀眾隻眼開隻眼閉去接受。古天樂被吳彥祖懷疑後，看似受到警察的緊密跟縱，但居然還能夠在警察視線以外做到很多事情。杜文澤明明著緊草，又係可以經常都自由行動。最難頂既地方，明明呢部係偵探片，竟然搞到要玩神打去查案，搞到原本一直型到爆既方中信好似鬼上身咁樣。

故事鋪排上都有值得一讚既地方，電影初段的那一場搶劫，好像很完整地給觀眾知道整件事的真相，點知去到最後才發現原來那個是斷章取義版，有計劃地去欺騙觀眾投入導演預設的想法，要觀眾不斷係度諗，到底古天樂以自己既能力，用一個非法既行為去做一件大眾都認為係正義既事是否有罪。這類似漫畫《死亡筆記》內引申到的問題，到達奇拿的原意是否正確？

爾冬陞一向善於表達感情，原本呢部電影都無事，我仲幾欣賞古天樂在硬食李冰冰那種過份無微不至的照料那幾場戲，雖然無對白無音樂，但當中真係連一支牙刷都有戲係入面。但係衰多手，唔知係唔夠自信定係想搞搞新意思，竟然要用到畫面上的特效去表達古天樂的內心，雖然唔係影帝，但古天樂話哂都係現時一線的“年青”男演員，唔駛用到呢一種好似將塊面變形既特效去表達佢內心既不滿呀，我就只係搞得有點兒搞笑，還有可惜。

飛砂風中轉 Once a Gangster

2010-05-22T10:40:00.000+08:00

唔駛多講，呢部戲擺明係一部惡搞既電影，絕對唔係《古惑仔》第Ｎ集。惡搞既對象表面係《無間道》和《黑社會》（反而無最經典及最令人聯想到既《古惑仔》系列），實質係惡搞香港既特首選舉制度，如果話黑社會入面講選舉係暗串，咁呢部戲就係明玩，當中有幾場甚至係直接讀出基本法。

由惡搞既話題可以睇到，呢部戲既目標觀眾係八十後，佢地未必真係有睇過《古惑仔》系列，但多數會睇過《無間道》和《黑社會》，更重要既係，大部份八十後，都係反對現有既特首選舉方法，一定會Buy明玩特首選舉方法呢一招。

講番個故仔，有人話呢部戲比古惑仔系列更能夠講古惑仔心聲，就係當年佢地入會，都係多是為了一時意氣或為勢所迫，大多事後也希望能夠轉回正行，不想留在這身不由己的地方，正好這便是本片片名的意思。

老實講，對於今時今日既年青人來講，入黑社會食煙飲酒已經一Ｄ都唔型，最型既係個一班搞社會運動既朋友同埋有獨立思維既人。新一代對政治有興趣，有認識，有參與，呢部戲既編劇知道後生仔要咩，可憐政府重未知，我地知道原地踏步比向後行來得好，亦都唔希望一世人都盲目期望有人會造一條合心水的裙給我們。

葉問２Ip Man 2

2010-05-15T09:30:00.000+08:00

實不相瞞，我是有諗過唔睇這部《葉問２》的，因為害怕續集無進步，又係一次超人打外族既表演，硬銷民族感情，但最後還是為支持港式武術片和葉偉信，入場看了這部電影。

以武術片角度去睇，今集的確有進步，無錯這又是一次神級表演，分別有一個打幾十個同埋打鬼佬，但相比起第一集，起碼會令觀眾覺得甄子丹有機會唔夠打。一個打幾十個人個場可以講係打極都打唔完，如果唔係有人插手，佢最後都會無力。甄子丹對洪金寶和大隻鬼佬的兩場比試，甄子丹都並非完全佔上風。故事當中能夠有這種差不多實力的對手，確實可增加故事的耐看性。

故事講葉問來到香港開武館，我其實幾期待故事能夠引入多一點葉問講道理的情節，畢竟現實中的葉問和其後的李小龍也著重於武術中的道理。

葉偉信作品，唔小得食飯，我還以為甄子丹救完洪金寶個肥仔之後，洪金寶會叫甄子丹一齊食飯，順便解去雙方的不和，但最後只是洪金寶一家自己食飯，但從當中亦可見到洪金寶身上的家庭負擔，葉導演用食飯講故事確係有一手。

小心！枕頭人 The Pillowman

2010-04-30T20:00:00.002+08:00

這是一個宿命嗎？上一次在葵青劇院看的話劇是《盲流感》，故事也是這麼沉重的，相比下這部《小心！枕頭人》已算有一個溫和的結局。

話劇內的主角創作了很多小故事，短小而內含深層的意義，亦配合整個劇本的發展。當中我最喜歡的，是那個講一個罪犯被捕後，忘記了自己所犯的罪，但是身邊不論是殺人犯、強姦犯、修女、謢士，都對他曾犯的罪行感到極度痛恨，直至被行刑一刻，他還是不斷在問到底自己犯了甚麼罪。這開放式結局的小故事，極具神祕感，值得細味。

一如早前看到梁祖堯的一個訪問所言，此劇對演男主角的他難度甚高，因為此角的心理轉變確實是幅度大和次數多，可見此故事的起落之深度。

聽說劇團需要較大的勇氣去製作這類非愛情的話劇，因為話劇觀眾以女性和情侶為主，雖然這看似事實，但實在希望本地能有更多非愛情或大團圓結局的話劇。

志明與春嬌 Love In A Puff

2010-04-09T19:30:00.001+08:00

雖然好似誇張左少少，但作為一個熱愛港產片的本地青年，實在要講一句，好在香港仲有彭浩翔，否則我地就既青春片就真係只可以睇王晶和葉念琛，唔係話佢地無拍過好戲，只係近年他們的故仔都比較超現實，根本唔係會係現實都出現。

彭浩翔今次以輕鬆的手法拍這和吸煙有關的故事，內容確實是捉到現代青年的真實世界，首先唔好講咁多藝術上既意義，最起碼都叫做紀錄低現在呢一個年代我們係香港發生過既事和講過既笑話。另一個角度咁講，呢一部係好專登俾香港人某一個年齡群既人去睇，並唔似近年其他電影，要適合香港人又要適合中國人，又要老中青都鍾意，結果最後件事就變左咩都唔係，睇十部都睇唔出個分別。

講番個故仔，都係個句，彭浩翔精於計算，今次加上麥曦茵一齊編劇，整部電影的大部份角色都十分有血有肉，就像看身邊朋友的故事一樣，對白亦精警到位，就像現實中的對話一樣，令人睇得好有親切感。

宅配男金色搖籃曲 Golden Slumber

2010-04-05T15:00:00.004+08:00

今年電影最後的一部電影，亦是最期待的一部。第二次看中村義洋執導伊坂幸太郎的小說，上一次是舊年電影節的《一首Punk歌救地球》，這電影被我評為2009全年最佳電影，加上本人係伊坂幸太郎的忠實FANS，所以今年點都要睇呢部新作。

講番部戲，一貫伊坂幸太郎風格，時空人物大交錯，再隨著故事發展，將所有人用一條條既關係線連埋一齊，去講一個意想不到既故事。今次既主題隻中在講社會上的幕後黑手、警察和傳媒的強大影響力，當然還有音樂和友情，作品名稱本身便是一首Beatles的歌曲，故事內亦多次提到呢首歌。

幕後黑手的故事有好多，呢部戲講警察和傳媒呢一點更值得欣賞，公園內現場直播時電視台被警察強行腰斬那一段是全片的高潮，真接命中政府封鎖消息有幾咁可怕呢一點。

很喜歡戲內那個演連環殺人犯的角色，身手靈活，行蹤古怪，有點令我想起伊坂幸太郎在《蚱蜢》內的那個殺手，但可惜他們最後也死了。

很佩服中村義洋這位導演和本片的其他編劇，雖然伊坂幸太郎的文字本身充滿電影感，但實際組織拍攝起來，那些不停地跳來跳去的劇情，難度應該極大，好想搵另一部由佢拍伊坂幸太郎既電影《家鴨與野鴨的置物櫃》來看。

蜜月勿越 Honeymoons

2010-04-03T18:00:00.001+08:00

話咁快就進入了今年電影節的尾聲﹝因為只看四部電影，所以第三晚已經係尾聲了﹞，經過之前那一部法國戲的影響，開畫前難免希望今晚可以睇番部好戲，結果這部由塞爾維亞和阿爾巴尼亞合拍的電影，亦不負我的期望。

電影講兩對分別在塞爾維亞和阿爾巴尼亞的戀人離開國家，期望往西歐過更好生活的過程。當中有很多情節也充滿張力，在與家人的關係，在國家和政黨之間的認同，對理想的追求等，也拍得出那份力度。

值得一提的是當中三位演老男人的男角都演得十分出色，暗暗地面達著對現代社會發展的無奈，他們當年也有各有理想，但最後經濟型社會的發展，卻遠遠不同於他們的預期，那種無語的演出，甚有味道。

野草 Wild Grass

2010-03-30T19:30:00.001+08:00

電影節總有出事既時侯，縱使睇過那段似是疑非的簡介及劇照，最後能否看到好電影，多小都總需要一點兒運氣。

今晚看的這部法國電影，便可算極品，整部電影也不明所以，導演又硬係要賣弄畫面，懶係多大特寫及色彩繽紛的場景，可能我實在理解能力太低，不能明白那幾位演員不斷在變的性情，總之就係到最後都唔知佢地做緊咩。

嫲嫲對婆婆 Lola

2010-03-29T19:15:00.000+08:00

這部來自菲律賓的電影，開始了我們今年的電影節。第一次看來自菲律賓的電影，初時未能習慣，感到有點悶，但適應下來後便漸漸開始欣賞電影當中那些寫實的手法及演員真實的演出。

電影以寫實的手法拍攝，用了很多很長時間的鏡頭，為觀眾以同一個視角，去睇整件事情在開始發生至完結時，在環境和人物中的變化，但這亦是容易令人感到悶的地方。簡單咁講，這電影就像在看一部兩小時的《獅子山下》，平淡地講故事，但故事卻是真實而充滿張力的。

故事發生在一單街頭殺人事件之後，講述受害者的阿婆和殺人犯的阿婆，兩家人也屬於社會上的低下階層，電影主要講他們為處理自己孫仔的事情而分別游走於不同的地方，電影大部份時間也是雙線發展，兩人當中有過幾次的見面，卻每次也有著不同的訊息和氣氛。

故事雖然發生於一個陌生的東南亞地方，但憑著當中那些寫實的手法和那極之接近人性真實的故事，還是可以感到當中的人情味。

拆彈雄心 The Hurt Locker

2010-03-25T19:15:00.003+08:00

正如畫頭字幕所講，戰爭就像毒品一樣，很容易令人上癮。有人喜歡那種置生死於一線之間的極端緊張感覺，有人喜歡那種絕對的紀律。很多人在戰場時變了另一個人，在回到家鄉後都可以做回自己，但亦有人就是愛上了在戰場那一個自己，這是一種可悲，到底人類都只不過一種動物，體內還是充滿著原始的慾望。

電影的設計十分簡單，沒有複雜的故事，卻清楚地刻劃出數人的性格，故事圍繞著一隊三人拆彈部隊在巴格達的情況，倒數著他們距離結束任務，可以回國的日子。電影一開始便講述前隊長在一次行動中身亡，之後補充上另一位充滿個人英雄主義的隊長，三人隨著故事發展開始產生默契，無數的生命不斷在他們的身邊流走。

此片並沒有十分強勁的爆炸及陣容鼎盛的戰爭場面，只有很多拆彈場面及一場遠程狙擊戰，已足以令人感到戰爭的緊張及血腥。實際上，此片更能表達到美軍在當地的無助，身處民居中的街道，美軍幾乎是任人魚肉，片中的軍人說得對，只要在街上看見一些奇怪的目光，那麼便凶多吉少，因為根本那些襲擊者和平民根本沒有分別，美軍就像一班背著高科技槍械的猴子。

講到尾，這當然是一部反戰的電影，但亦明確地指出，並不是所有人也可以安心於conform zone，就像那位英雄主義的隊長，回到美國也只能迷失於播著harmless背景音樂的巨大超市，沒有目標的人生，也是可以生出魔鬼的。

2029追殺1989 Communicating Doors

2010-03-20T19:45:00.000+08:00

第二晚睇既話劇屬於香港話劇團。故事甚精彩，講三個不同年代的女人，一夜之內，在一間酒店房穿梳時空，互相改變了命運。正如話劇團的其他出品，縱使是改編自外國劇本的作品，亦會將其本地化及加入大量有趣的元素，觀眾絕對是睇得開心的。

故事本身值得深思，有時幫助一下別人或自己做的一些決定，在即時可能影響不大，正如蝴蝶效應所言，小事經過時間的放大後，卻絕對不能夠睇少。

年年都睇香港話劇團，開始對來來去去也是那幾位男主角感到悶了，雖然係做得好好，但睇得多總會悶，第二劇團既又重未上到來，再係咁真係幾難搞。反而女角就常有驚喜，今次三位女角都十分出色。

香港式離婚 The Truth About Lying

2010-03-19T20:00:00.000+08:00

呢排睇好多套話劇，今次還要一連兩日睇兩部首映，第一晚這部是屬於香港藝術節的。

故事講一個由黃慧慈演的女律師去了一間專做離婚的律師行工作，這律師行由一對結婚多年的律師所經營，兩人本身的婚姻也亮起了紅燈，話劇便是圍著這三人和他們的一些往事及cases而發展。

黃詠詩講愛情和現代人關係一向到位，今次亦不例外，故事本身值得深思，亦有很多精警的對白。在這個不斷講離婚的故事，到最後我相信編劇想表達的，反而是在一段愛情，甚至一段婚姻當中最基本和重要的東西，就是雙方的信心和坦誠的溝通。猜測無法解決問題，只會令情況惡化，大家也不講真話，不談感情，不斷地將自己所猜測的事當成真。令到相愛的人無法相愛，背後的原因原來可笑地只是因為大家也只愛自己的面子。

睇左幾年黃慧慈，令次真係大熟大勇之作，在台上充滿戲味。兩位男角，李鎮洲和梁祖堯可算是兩種完全不同的演譯方法，李鎮洲的收藏和梁祖堯放射，各具特色。

歲月神偷 Echoes Of The Rainbow

2010-03-14T13:20:00.000+08:00

平心而論，這電影的故事真的十分之老土，絕症、窮男追有錢女、貪污、兄弟情和親情，總之就隻天災人禍於一身，有咁慘得咁慘，淨睇內容會以為自己睇緊韓劇。但以此接近韓劇質素的故事拍出來的電影，卻比常見的韓劇高章得多。

此片最出色的地方，是電影在一些重視情感表達的地方上，用了很少的對白，將訊息大量收藏在演員的表情和動作上。有兩個例子，第一次是李治廷第一次去Evelyn屋企時，發現雙方家底上那極端的差距，李治廷的自卑和Evelyn的唔好意思，在那一場戲，兩人真的被那種氣氛壓得不能呼吸，李治廷在劇中常見的自信完全消失；另一次是吳君如用手去摸任達華那隻賣掉婚介後，只剩下一條痕的無名指，吳君如吞一口氣，整個人像失去靈魂一樣。兩場戲的對白都很少，但當中所傳達的情感，卻可以直入觀眾的內心。

由此可見，導演和編劇對故事、演員和觀眾都極有信心，知道觀眾在這些位置，已經不再需要用對白去感受故事中人的感情，轉而去用表情和動作這更高層次的方式去和交流，如果咩都畫出腸，就已經唔係藝術了。

BTW，十分之off-topic，劉天蘭的出現令我好surprise，即時令我諗起另一部電影《初戀無限TOUCH》，佢又係做勁有錢阿媽，只差今次係真既男拔萃而唔係假喇沙，但係都足夠令我諗起“NO COMMON”呢段情彩對白。

作為總結，雖然故事本身比較老土及精英主義，但表達手法卻有極高的欣賞價值。

情話紫釵 The Liaisons

2010-03-06T20:00:00.001+08:00

昨晚和獎門人去了看這部今年藝術節的話劇，此故事以經典粵劇《紫釵記》crossover現代的愛情故事，我相信現場有很多觀眾和我們一樣，事前並不太認識這個經典粵劇的故事，但正如我們在中場休息及散場時所聽到，很多人也有興趣去了解更多《紫釵記》的故事，可以講這crossover十分成功地引起年青一代對這經典粵劇的興趣。

兩個多小時的話劇穿插了三組故事，第一組是林錦堂和胡美儀演出《紫釵記》內的其中數幕，第二組是謝君豪和何超儀演出現代版《紫釵記》式的愛情故事，第三組是數名現代人在觀賞《紫釵記》時對於《紫釵記》內及現代愛情的個人感想及討論。

正如第一段所講，此劇令不少人對《紫釵記》產生興趣，我相信是因為以下原因的。第一，昨晚可能是不少觀眾第一次真金白銀俾錢坐定定睇粵劇，充滿新鮮感。第二，《紫釵記》是一個經典的愛情故事，以古代和現代穿插的形式去淺嘗，自然容易受落，若果換上是真正的《紫釵記》，可能是數小時的粵曲，這便真正考驗了大家的耐力了。第三，我相信與形象有關，昨晚所見胡美儀的化妝及服裝都與平常印象中粵劇的形象不同，感覺上新潮得多，用色很簡單，只用上白和紅的配搭，出來的效果卻很鮮明。

現代版的故事及那些愛情討論相對失色，那些愛情理論大多屬老生常談，老是在談性和愛的先後和重要性，幾個後生仔圍埋一齊睇粵劇這個劇情亦有點超現實。謝君豪、何超儀和朱柏謙的聲線運用也略為誇張了，有點失實。

繼之前看過的《黑天鵝》後，再一次看張繼聰的舞台演出，更加確定此人從了前童星、謝安琪老公、遊戲節目主持人和“BE A SMART BOY”之外，作為一個演員更加值得注意。

華麗后台 Nine

2010-02-25T19:15:00.001+08:00

十分熱鬧的一部電影，我本身並未睇過經典的《八部半》，無法作出比較，只能當本片是一個全新故事去睇。

故事部份可算精彩，講這位名導演怎樣也想不到如何拍下一部電影，片場內萬事俱備，唯獨欠缺他的靈感。此故事真實地寫出創作人無靈感時的痛苦、所受的壓力和身邊的誘惑，另外亦講了身為藝術家家人的痛苦，藝術家整天也活在自己的幻想世界，難分真假，家人亦難以投入他們的世界。

大量歌劇穿插全劇，為本片的賣點，視覺效果唔錯，眾位女星亦甚搶鏡。

72家租客 72 Tenants of Prosperity

2010-02-21T09:40:00.001+08:00

好多人都話呢部《七十二家租客》低能得過份，身為當年新藝城年代的忠實fans，我倒認為此片的低能程度絕對可以接受，幾合我既口味。

個人認為，要拍一部好的笑片絕非易事，當中以取笑悲劇命運主角的笑片較為容易﹝如《喜劇之王》或活地阿倫的電影﹞。以此片為例，全片貫穿了十分之多的笑位，笑位本身的質素要控制得好，內容要跟得上潮流，笑位唔可以重複﹝其實唔係必然，但要重複得好睇難度極高，可參考《東成西就》內洪七公求死一段，為重複笑位的經典﹞，每個笑位的長度及節奏亦要控制得宜，絕不能出現拖泥帶水的感覺，觀眾一覺得悶就出事。

以本片而言，基本上能夠附合到以上的條件，只要懷著一個開放的心情去睇，必定可以睇得十分開心。

若果問我最難頂的地方，我會選擇電影剛開始時兩間電話鋪員工唱歌那一段，明顯地過長及十分老土，坦白講我當時真係有諗過離場。

情婦的情夫 Broken Embraces

2010-02-07T12:20:00.000+08:00

本片有一個古怪的中文名，情婦的情夫確實是表達了片內角色的關係，卻流於表面，未能表達到故事的主題（幸好，這中文名已經比近期另一電影援膠女郎AirDoll來的略好）。本片的英文片名叫做Broken Embraces，YAHOO字典將佢直譯為破碎的擁抱，這正是台灣的譯名，典型的台灣譯法，保存了意思但全無美感可言。

無可否認，艾慕杜華在這電影講的還是愛情，但並不是單純的相愛，正如片名所言，這是一種Broken的愛情。Broken了的愛情，有人會選擇完全抽身，有人會默默在心中保存這段關係，各人有不同的看法。

男主角在一次車禍後，失去情人，失去視力，加上不久前還失去了自己一手導演的電影作品，一連串的打擊，令他拒絕了自己原本的身份，把自己收在另一個身份之內。

演男主角經理人的女角亦有一段已經不存在的愛情，但她選擇繼續把對方的兒子養大，亦一直守在對方的身邊。當中並無任何恨意，只是存在著一份只在自己心中的關愛。

BTW，值得一提，相隔三年多，繼看了艾慕杜華的《浮花》後，再看這部《情婦的情夫》，竟然令獎門人揚言要看回艾慕杜華的其他舊作，可見艾慕杜華的吸引力。

柏納大師奇幻Show The Imaginarium Of Doctor Parnassus

2010-01-24T09:45:00.001+08:00

呢部戲都真係無改錯名，果然係十分之奇幻。我們在劇院出來之後，經過一輪討論，還是未能明白劇中的一些事件及背後的意義。

此片片長124分鐘，但某些重要的地方還是不太表達得清楚，整個故事就像夢境一樣，無法得知那些情節是真實，那些人物是真心。以那塊“魔鏡”為例，由此至終都欠缺了解釋它的功能的，但此鏡卻幾乎是全片最重要的道具。柏納大師的神秘力量亦過於神秘，除了知道他是長生不老之外，其他東西總是含糊不清。

經過我盡力的思索後，我相信此片是講人在面對誘惑時的決擇，當柏納大師為進入魔鏡的參與者在魔鏡內的世界實現夢想時，魔鬼便會在幻想世界內出現，以永恆的夢境和無盡的慾望去誘惑參與者出賣靈魂，同時這亦考驗了人的慾望是否永無止境，還是能夠滿足於淺嘗夢想。柏納大師本身便是多次在決擇時被魔鬼利用，引致縱有長生不老之身，亦活得不快樂。

當然，以上一段只是我的猜測。

因為希夫烈格在拍攝中段離世，所以此片在幻想世界中便出現了另外多位頂級紅星補上他的戲份，這亦成為本片的一大特色。

神探福爾摩斯 Sherlock Holmes

2010-01-13T19:20:00.001+08:00

繼《夠薑四小強》後，事隔多年，終於再一次睇佳列治的作品，中間佳列治已經結左一次婚甚至已經離埋婚，日子真係過得好快，佳列治亦都已經成為一名著名導演，幸好強烈的個人風格依然存在。

故事中最有趣的，莫過於福爾摩斯的打交部署，以慢鏡去表現他腦內的推算，再以快鏡去實行，充滿玩味的玩法，英式導演特別喜歡在鏡頭及剪接上花心思。

故事有別於傳統的福爾摩斯故事，最明顯是福爾摩斯和華生都十分好打，另外是福爾摩斯的古怪人格，網上有說這是他的波希米亞精神，我想倒不如說他是一個GEEK，擁有異於常人的智慧和想像力，卻不善於交際。

較出人意表的是電影內的查案方法，竟然類似於2007年的港產片《神探》，不知是心靈相通還是向東方學習。

花鼠明星俱樂部2 Alvin and the Chipmunks 2

2009-12-28T19:30:00.000+08:00

最初曾經擔心這是一部傳統美式校園劇，盡是金髮陽光大男孩和大胸粗腿少女，諗起就驚，因為是免費的緣故，我們便打著唔好睇就走人的心理準備。幸好，故事比想像中有趣，我們亦睇至散場。

故事講三隻花鼠在上集成名後的故事，主角花仔太出位，以致差點忘記了兩位好朋友，另外亦多了三位花鼠女出場，同時亦加入了一位人類角色，此人學生時期受盡欺凌，大時成為一名宅男，在片中負責臨時料三位花鼠及提供笑料及少到無既愛情線。

故事講唔上吸引，咩都有少少咁樣，唔會刻意說教，亦唔拉布，當作散心輕鬆之節目亦唔錯。

茱莉對茱莉亞－隔代廚神 Julie & Julia

2009-12-04T15:10:00.002+08:00

一部期待左好耐既電影，係無心插柳既情況下睇左，感覺心滿意足。

電影雙線發展，穿插兩個年代的故事。由梅麗史翠普演的茱莉亞在四十年代跟隨丈夫由美國去法國的巴黎生活，十分鍾情於當地美食，甚至打破當時傳統，跟一大班男人在藍帶廚藝學校學廚，後來她推出了幾本用英文教煮法國菜的食譜和拍了一些電視節目，大受美國人歡迎。故事便是由她初到法國開始講，由投入當地生活至整個出書的過程，甚至她的個人生活也有講，拍得甚為寫實。

現代的故事講一位普通文員茱莉，生活苦悶，最鍾意既活動就係煮野食，最尊敬既人就係茱莉亞。故事講佢有一日係屋企對住老公發牢騷，因為佢既朋友剛剛在雜誌上報導了她苦悶既生活，佢老公提議佢用一年時間整哂茱莉亞食譜上既所有食物，總共五百幾報，整個過程在網上用blog記錄。

我幾喜歡這種目標達成型的電影，可以看見當事人的努力和遇上困難的情況，身同感受，但係實際上觀眾只需要安坐椅上。

其實我寫呢個blog，咪又係為左一個堅持，堅持要為每一部去戲院睇既電影都作一個記錄，記下我的感想，有其他人睇甚至留言支持，我當然開心，縱使沒有，閒來自己睇番都另有一番味道。

20世紀少年-最終章-我們的旗幟 Twentieth Century Boy Part III

2009-11-28T15:10:00.000+08:00

正如我係前一集既影評所講，要將全套二十世紀少年在第一和二集剩下既野，在第三集全部拍哂是十分困難的，所以我曾經估計有第四集或二十一世紀少年的出現。

事實的確如此，為求埋尾，今集既內容可算係飛快，交代得甚為求其，把故事簡化了很多，沒有了那種時空交錯的感覺，中間那一個多小時，拍得十分散漫，完全沒有追看的吸引力，令人感到沉悶。完全放棄表露人物的性格是一大可惜，本來漫畫的特色就是著重眾人的心理，一干主角本應也有很多值得發揮的地方，可惜電影版將大量細節減少，以萬丈目為例，他的起伏和內心便十分值得講。

相信是為了令到故事簡單化，所以電影版只有一個朋友，雖然有點可惜，但無疑是減少了漫畫內令人不明所以的地方，但改編的最大敗筆在營造吉常是朋友這一點，吉常在電影版慘遭冷落已經可惜，更要被扣上可疑人仕的身份，令人痛心。

總括而言，電影版只是齊集了漫畫內的經典場面，像一個沒有內涵的東西。

總之得就得 Whatever Works

2009-10-19T20:00:00.001+08:00

事先聲明，我是由《美蓮達與美蓮達》開始睇活地阿倫既，所以今次回歸紐約，感情上對我意義不大，但無可否認，主場就係主場，很多地方都明顯睇得出主場上陣既得心應手，活地阿倫可以用埋場景去講故事。最明顯既分別，在於角色們生活的地方，活地阿倫不論在英國還是西班牙，都要拍景點，但正如呢部電影所講，當地人又點會成日去景點？另一個例子，港產片都唔會經常出現ifc和山頂，外國片來香港就要，因為佢地識既地方唔多，本地導演就可以用一些本地人見到有感情和體驗的地方。在這電影，導演便用了一些很平民的酒吧和咖啡室，最精警是那個甚麼奇豆餅，男主角一句食了幾十年也不知它到底是甚麼，可以肯定當地人立即點頭。另一有趣的場景，就是男女主角經常都在華人地區購物，到底是自身投射還是另有意思，便木宰羊了。

有人說導演在講自己的故事，當然吧，還有別的可能嗎？今次專登搵另一個人去演自己，當然要狂講道理和發牢騷了，既怕死亦厭世，對所有人和事都不滿，覺得整個世界都唔健康，但事實最唔健康既係自己。只是兩小時，涉及到的題材已經包括愛情、性、社會、民主、人權、宗教、種族，真係講過不停。

無論如何，電影既主題其實好簡單，就係想講，縱使世界幾咁錯，人生在世，連活地阿倫一個咁多愁善感既人都唔使死，唔好諗咁多對與錯，總知得就得啦。

生命最後一個月的花嫁 April Bride

2009-10-10T17:00:00.000+08:00

其實在中文版小說初推出時，我已經被它的書名及故事所吸引，但基於實在唔想睇這類對淚線太刺激既書﹝我比較喜歡那類冷笑型小說﹞，所以一直與它無緣。現在總算是鼓起勇氣，去看這部一聽個名就知係勁慘既戲，入場之前滿腦子都是本人早前在看《禮儀師の奏鳴曲》時的極度誇張失控感動情況，加上自從讀過一篇《信報》專欄作者遊清源所講關於要戴著潛水鏡睇這類感人電影後，每次遇上這些感動場面，我也會忍不住又喊又笑，旁人睇見實會以為呢條友精神有問題，咁慘都笑得出。

講回這部電影，其實都唔係真係十分摧淚﹝幸好不是由韓國人拍﹞，只要做足心理準備，未必捱不過去。這電影最特別的地方，是先後有兩次由女主角父親及女主角朋友對男主角的道謝，這不期然提醒了大家，作為一個情人，他不似病人的親人或知己，他是可以選擇離去的，但他從沒有這樣的想法，反而一直陪在女主角的身邊。這個感謝由一直也是比較沉默的女主角父親所講出，倍派感動。

女主角父親一角最令人喜愛，沉點內歛的角色，但十分愛護自己的女兒，後期亦對男主角表現出信賴，表情唔多，但感受到他那份強忍著的感情。

意外 Accident

2009-09-20T14:00:00.000+08:00

意外。意外地好失望。

我最初對這電影是甚有期望的，我一向對鄭保瑞的作品有好感，亦受得了銀河系列的風格，但在這電影，我看不到鄭保瑞的黑暗感，銀河式的黑色拍法卻出現了，但不完整，像A貨。

故事本身有問題，整個故事都因為古天樂一個人的多心，其他角色的作用全部都只是為了出來送死及任賢齊負責殺人，人物關係十分薄弱。

古天樂一幫人在電影中利用意外場面去殺人，但整個故事只有兩次的出手機會，加上電車那一次完全令人感到專業不足，甚有博一博的感覺。縱使加入了他們計劃行動一段，亦無助觀眾信服他們的利害。

手法上亦出事，在意外場面上明顯地使用了銀河式的拍法，但和銀河以住的經典相比，不論日間還是晚上的場合，都高下立見，只有閃來閃去的感覺，卻沒有令人緊張的感覺，十分可惜。

唯有期望這只是鄭保瑞加入銀河後第一次的不健全作品，將來可以拍出一些個人風格的作品。

求婚的惡魔 The Proposal

2009-09-13T17:40:00.000+08:00

獎門人說我們難得地看這類喜劇型大片，其實我都唔反感既，我一向反智，只係“巧合”地比較少睇這類電影吧。

說回故事，男女主角的設定也很明確，觀眾幾乎可以立即掌握兩人的性格。加入移民局人員這個反派，同時亦增加了故事的娛樂性。女主角和男主角家人的關係發展甚老土，但大部份時間都屬於可接受的感動，未有過火。

用了剛剛好的時間去講兩人在公事上的情況，剛足夠表達兩人最初的關係及性格，又不會過多去影響故事的主題。

故事充實，節奏輕快，加上靚景，這電影確實是令人看得嘗心悅目。

LAUGHING GOR 之变節 Turning Point

2009-08-22T19:00:00.001+08:00

成日都話，做臥底，兩邊不是人。我而家先知，原來睇戲都一樣咁多矛盾，特別係當你對住一些想睇又唔太想睇既戲。

想睇呢部戲，因為覺得幾得意，人物性格個個都好出位，又有警察和黑社會元素，仲要係邱禮濤導演，又有黃秋生和吳鎮宇，點都有一定水準。

唔想睇呢部戲，因為佢太潮，睇完自己都覺得唔夠型。因為佢同無線有關，又係睇完自己都覺得唔夠型。因為佢為拍而拍，加上佢係事後追加既前傳，必定出現“事後追加前傳現象“，多數有呢個現象既戲都好睇極有限。

經過一番內心鬥爭，終於我都係去左睇呢部《LAUGHING GOR 之变節》，淨係睇呢個中英混合加上簡體字既名，已經覺得唔知想點，特別係個GOR字。

坦白講，以一部黑社會戲來說，算是不錯，如果要講埋臥底既心聲，便唔係咁好了。因為大人物太多，黃秋生和吳鎮宇都勁搶鏡，又要搵位放阿LAUGHING GOR，以致有點兩頭唔到岸（OH，唔通係想觀眾更加有兩邊不是人的感覺？），唔係咁易俾人真心咁認同LAUGHING GOR既苦況，畢竟港產臥底片已經拍得太多和太好，一比之下好易出洋相。

故事方面，黃秋生條線要做到佢係一個心理不太正常的人，所以在造型上十分特別，加上“四條女”，確係甚特出，但奈何太少講佢既背景。吳鎮宇個角色設定有點怪，開頭專登營造到佢有咁狂得咁狂，鍚哂個妹無問題，問題在於佢在尾段連對著其他人也無哂那種狂態，唔得連貫。

講番事後追加前傳現象，簡單咁講就係所有在前傳新加的角色，在最後必定需要全部清除，否則唔連戲。呢一個清除，好考功夫，以本片而言，當然就係要整死哂全部人。最後那場槍戰便負起這個重大責任，算是不過不失吧，能夠將咁多個人清哂，都唔算過份地誇張。但十分可惜，編劇可以更利用這場戲去表現LAUGHING GOR的心理和為何將來他會變成這樣的性格，陳法拉和黃秋生之死都可以好好利用。相比之下，星戰前傳第三集在這點便做得較好了。

沖天救兵 Up

2009-08-16T13:20:00.004+08:00

又到左睇彼思呢個年度例牌動作，舊年部《太空奇兵‧威E》雖然都好評好潮，但係我都會繼續將佢放係2008年最被低估的電影。正如有人話如果《禮儀師の奏鳴曲》有入圍奧斯卡最佳電影的話，便可以勝出一樣，我認為相同比喻亦可以放在被歸類為動畫的《太空奇兵‧威E》之上。《太空奇兵‧威E》之好，在於製作人員的膽色和故事的深重意義。

我在《太空奇兵‧威E》影評第一段寫的問題應驗了，以創意和膽色去比較，今年這部《沖天救兵》絕對是退步了，但從故事去看，還是繼續保存了彼思一貫的優良傳統，大講造人道理，而且今次更是成熟了很多。

我認為全片最重要的訊息，在於叫觀眾珍惜自己所過的日子。老人家的回憶是全片的主導，老人和伴侶的故事相信感動了很多人，這對伴侶一直也希望可以四出探險，老人更因為未能和老伴去探險而十分遺撼，那一本相簿正好反映了他的人生。

正如大部份人一樣，少年時滿腦子都是幻想，長大後因為生活的各種原因，幻想被埋在現實底下。當想起自己的幻想時，便認為自己白過了一生，錯過了很多好東西，就好像老人一直也以為那本相簿從成年後便空白一偏一樣。

這電影便告訢大家，在這些沉重的生活和現實之間，也存在著很多珍貴的東西，這個道理便是做了甚麼並不是最重要，與甚麼人一起做和是否快樂更為重要一樣。老土咁講，就係你細過同一班老友去長洲玩一晚，重開心過發左達自己一條友去歐洲豪番晚。

我也被這電影深深感動了，電影中那種珍惜生活經歷的感覺，和那部講兩個老人死前故事的《玩轉身前事》十分相似。

竊聽風雲 Overheard

2009-08-02T09:40:00.001+08:00

在看電影的時候，我們經常都會對一些班底和題材有期望，或稱為最低要求，相反地，對一些新人或十分另類的題材，我們的包容性便會相對增加。以這電影為例，近乎無敵的班底，一位資深影帝加兩位最有前途的男演員，監製有爾冬陞和方平，導演和編劇是麥兆輝和莊文強，另外這電影的題材賣點是警察和內心的鬥爭，對於這個組合，我們當然是抱著十分高的要高去看這電影。

平心而論，這電影的節奏掌握得很好，完全無冷場，但相對於兩位導演近年的作品，這電影便少了一份他們的風格，在我寫的《傷城》和《大搜查之女》的影評內，我都特別提到他們利用了特別方法去表達一些情節，令人印象深刻，在這部最新的作品便沒有了。固中原因可能是導演便刻意求變或是之前的手法並未能得到太多好評。

這對編劇組合一向給人信心，故事完整唔在講，人物性格亦大多造到立體及多樣化，今次亦不例外﹝除了結局之外﹞，三位主角的背景立場都清晰，王敏德一角係異數，港產片少有既壞人仲有型過好人，落在他身上的筆墨亦不少，最特別是排練演講一段，大大提高他成功的真實性﹝政府官員好應該學下，連黑社會大佬都會為左一個演講綵排，我諗香港現時既高官只有任總一人有認真地綵排，最低限度都要背左稿同埋知道邊度係重點同邊度係呼吸位。﹞。

總體而言，這電影是不錯的，尾段草草收場是敗筆﹝我相信有很大的理由是來自國內市場的絕對正義性﹞，整個故事亦欠缺了一個最大的重點支撐，到底炒股、私隱還是金錢人性之戰才是本片的主題？

哈利波特混血王子的背叛 Harry Porter and the Half-Blood Prince

2009-07-19T09:30:00.000+08:00

我是一個半途出家的哈利波特影迷，頭幾集我是看電視的。誠然最吸引我的是當中的正邪對決，我當佢卡通片咁睇，其他校園生活或主角成長過程，我實在興趣不大。

那麼你應該可以知道，這一集對我既吸引力係幾咁低。呢一集花左好多時間去講主角們踏入愛情世界，本身無咩問題，但可惜手法實屬極端無聊。

另一方面，原先以為今集石內卜會大顯身手和大爆身世，點知原來出得咁少。佛地魔既少年版出左幾次，但其實無咩料到，唔係好見到佢有幾利害和邪惡（講開又講，少年佛地魔個笑樣勁似《二十世紀少年》入面那些壞人細路。）。

當然，作為尾二個集，有些東西是無可避免的。正所謂黎明之前係最黑暗既，無可避兔的就是去製造一個十分之不妙的情況，給主角們在最後一集去化解，幾十年前既星戰，甚至可能幾百年前既長篇故仔都已經行緊呢條路。

那麼這電影又如何？我就覺得好一般，效果是做到，因為校長之死和石內卜之背叛，確實令到正義一方一下子失去了兩名似乎係戰爭力最強的人，但係呢兩件事發生得太急，逼埋係個尾到，前段及中間太少伏線和太多無聊野，搞到有不少悶場，實屬可惜。

殺人犯 Murderer

2009-07-12T14:10:00.002+08:00

我覺得很多人在談論這電影時，都向了一個錯的方向思考，大部份人都急於表達這故事的不合理性。當然，這故事內確實是有不少犯駁，我們亦不能夠把所有這些犯駁都因為郭富城在劇中的精神失常而默默接受。縱使如此，但我認為這電影的重點只有一個，不是關於故事的合理性或情節有幾咁緊張，而是探討邪惡的產生。

近年的報紙經常都會提起一些重犯的“成魔之路”，這電影便確實地是一個“成魔之路”的紀錄片。簡單而言，這故事內有兩個邪惡的人，一個從故事一開始已經邪惡得像個魔鬼，戲內會由他自白自己的成魔之路，另一個便是隨著故事發展而慢慢都變成一個魔鬼，觀眾可以親眼目賭這個過程。

比較兩人的成魔之路，會發現兩人的成魔原因雖然不同，但去到最後都是利用或傷害了身邊的人去達成目的。第一個人的入魔是因為長年受到極慘和不公平的對待，害苦了自己最重要的親人，最後為了過活，利用了別人對自己的愛，做出一些極度可怕的事情。另一個人的入魔是因為身邊親人被殺及受到極大的壓力，因為極端的不安，成為了一隻魔鬼。

這故事的另一可怕之處，在於我們會對先前提到的第一個魔鬼產生同情心，常人簡直無法想像他前半生所受過的心靈痛苦。這些痛苦的經歷令他產生超強的復仇心態和極端的生存方式。

不要再浪費時間去批抨這電影的不合情理了，倒不如認真地想想這個心理學的問題，如果現實世界真的發生了這些事在一個人身上，那麼他到底是會如電影那樣成魔？還是默默地接受所有的痛苦？

坦白說，如果你真的是那種會認真思考的人，那麼我便不建議你看了，因為這實在太可怕，很容易便會抽身不來，不斷想起角色們的可怕經歷。

誰和誰和誰有路 Black Ice

2009-06-03T21:45:00.000+08:00

好像是第一次看北歐的電影，其實除了語言不同及比較多雪影外，分別也不是太大。

故事本身很不錯，兩位女角的感情變化很大，最利害之處在於，兩女角雖然經常處於不同立場，但真正的角力其實一場也沒有，其他的多數場合，也是只有其中一人在內心掙扎，一鬆一緊。這個設定，令到兩位女角的內心世界變得十分立體，不是只為復仇，亦加入了很多同性之間的憐愛及支持。

電影的設計甚簡單，人物不多，主要集中在兩位女主角及一些家人，有一些旁枝，但只是十分輕力地提到，在不影響主線的同時，亦能令角色更加立體。

宣傳說這是一部驚慄電影，也說得不錯，電影內確實是有幾個位令人甚為緊張的。

整體而言也是一部不錯的電影。

天使與魔鬼 Angels & Demons

2009-05-31T19:25:00.002+08:00

有一類電影，在你入場之前已經清楚知道，這電影的質素是不錯的，但亦不會有太大驚喜，總知就係必定合格之作，這部《天使與魔鬼》便屬於這個界別。

如果你有睇過前作《達文西密碼》的話，我便可以好簡單咁同你講，這電影在整個故事的節奏和起伏，和前作完全一樣，只是故事的內容改變了。這樣你應該可以知道，觀眾在看這電影應該是幾緊張的，應該沒有悶場，亦預期到電影會有好多有神秘色彩的資料。

簡單咁講，這是一部計算準確的超大型製作，由選角、故事、地點和宣傳手法，也是經過詳細計算，一定無死錯人。

故事本身有一個位我幾欣賞，那就是加入了歐洲的強子實驗，我唔清楚寫於數年前的原著有沒有這個情節（我相信是後加的，因為這個實驗也只是在2008年中才開始被大眾討論的。），但這個實驗確實地顯露出宗教和科學在創世上的不同立場，十分配合整個故事。

正如《達文西密碼》最後有一個位改變了整個故事，Ewan在最後三十分鐘的變化亦完全改變和解開了電影之前一直引出的迷團，這個“轉”位十分出色和驚人，較可惜的是，和前作一樣，在“合”那一個位是過於普通的，但求在最後取得各方（包括故事內及現實世界）的和平相處，唔會令到任何人難做，感覺上十分造作和刻意。

怪誕隨意門 Coraline

2009-05-15T19:00:00.002+08:00

今次係我第一次睇stop-motion既動畫長片，雖然我睇過幾部Tim Burton既戲，但其實佢兩部《怪誕城之夜》和《怪誕屍新娘》我都未睇過，一直視為一大可惜。今次終於看了《怪誕城之夜》導演的新戲，更是第一次看3D電影，感覺實在新奇。

先說故事，正如獎門人所說，故事的前後分配不平衡，女孩在那個幻想世界享樂的時間比打倒那個世界的時間長很多，擊退幻想世界的過程亦甚為兒戲和簡單。

內容本身是有趣的，壞人以夢幻般的世界去吸引小朋友，那裡所有東西和人也是最好的，然後壞人便使小朋友放棄真實世界，但在交易後，小朋友便被關起來吸去生命。

此故事的說教味道並不太重，只是提出真實的家人雖然有缺點，但始終是最親的人，亙想接鈉便會發現大家的優點。

電影的3D效果並不是十分強勁，只是在片頭那些比較強，在故事中段其實效果唔大，有點失望。

題外話，說起stop-motion動畫，我最有印像的便是小學教肓電視健教科，講病毒王國那兩集，當年簡直是驚為天人，那些泥公仔，竟然可以好像真的會動那樣。不知現在的教育電視還有沒有這個水準。

花吃了那女孩 Candy Rain

2009-05-03T14:25:00.002+08:00

這不是一部新電影，好像遲了兩年，終於在香港上畫了。

這電影由四個故事組成，四個也是女同性戀者的愛情故事，四個故事的角色都很獨特，打破了平常人心目中同性戀者的固有型像。電影亦拍得很自然，有一些生活化的片段加例牌台式風景。愛情橋段方面亦沒有強行去講女同性戀和異性戀的分別，應該係刻意強調，同性戀都係講愛情，講感覺，不要想得太過色情狂。

除了最後林嘉欣那個故事外，其他三個的感覺都很舒適和明快，男仔頭既張榕榕完全係另一種感覺。林嘉欣那一段絕對是刻意搞鬼的，原本以為終於可以有一套林嘉欣唔駛睇佢個種招牌不知所措樣，點知希望最後都係落空。

花吃了那女孩是最後那一個故事的名稱，值得一提得是，四個故事的主角，都是在不同時期住在同一個單位，他們都收了一盒不知從那裡寄來的糖果。而Candy Rain應該是指片末落的那一場雨。

電影除了這四個故事外，片頭和片末亦有另一班演員的一些演出，有點摸不著頭腦。另外，此片的班底強勁，最後睇字幕才知道，原來負責全片旁白的就是陳綺貞，今次真係枉我自稱fans，竟然完全聽唔出。

禮儀師の奏鳴曲 Departures

2009-04-19T14:10:00.001+08:00

終於都看了這部電影，我曾經認為自己是不會入場看這電影的，就像早陣子的《海角七號》，好評如潮，自己亦都想睇，但係就係一直無睇，等等下就落埋畫。

無可否認，這的確是一部很好的電影，有一種看破生死的感覺，電影亦很強調死亡並不可怕，屍體亦並非不潔，生與死只是一個過程，人最重要的還是人與人之間的尊重、關心和愛。

這電影的感人之處，在於純真地表現出一些很簡單的愛，一種很基本和家人和朋友之關的愛。

此故事的轉合亦很大路，男主角由一開始的抗拒到開始接受，在剛開始接受時，家人和朋友卻出現強烈的反感，形成一種對立，男主角堅強繼續這份工作，並遇上一些事情，令他更重視這份工作。之後浴場阿婆的死去，一下子令到家人和朋友正視他這份工作，並看到這份被外間認為不正經的工作，其實是十分之莊重的。緊接而來的是男主角失散多年父親死去，將故事引入另一個高潮，在這個段發展中，男主角對父親的感情，由恨變為原惊再變為後悔，最後放開一切，確實地將整個故事帶去另一個境界。

故事本身很簡單，轉拆位亦做得很乾淨，加上很動人的音樂和一流的鄉郊景色，成功地將這電影變成一部經典。

20世紀少年 --第2章-- 最後之希望 Twentieth Century Boy Part II

2009-04-13T11:30:00.001+08:00

我認為對於電影製作人來說，拍攝長篇故事的續集最考功力的一件事情。成功的續集，往往會被譽為整個系列中的最佳作品，例子有《教父》和《星球大戰》。續集的難度，在於沒有了第一集的新鮮感，亦沒有結局的緊張。續集的作用是發展故事，當中可能只含有很少的起伏，製作人需要使用特別多的心機，去令觀眾可以全場都集中在電影之上。

這部《20世紀少年 --第2章-- 最後之希望》便算不上一部很好的續集了，氣勢上造不了漫畫的效果，失去了一些令觀眾更緊張的機會。幾個場合其實亦值得造得更盡，去特顯朋友掌權後社會的重大改變。

除此之外，感覺上這電影少了很多幻想或回憶的片段，可算係有好有唔好，漫畫內會被這些現實／想像／回憶／虛擬攪到十分迷失，現在電影便沒有了這種感覺，的確是令到整個作品較易入口，但卻失去了一份特色。

坦白講，要將一部咁複雜的漫畫拍成電影，確係一件難度極高既事，到目前為止，故事上的表達尚算不錯的，期望下集可以更好吧。

順帶一提，看完片未的第三集預告後，我強烈相信第三集是未足夠講哂全個故事的，好大機會有第四集或21世紀少年既出現。

靚太查案記 Crime is Our Business

2009-04-07T19:15:00.001+08:00

每年電影節也總會遇上一些電影，是怎樣也沒法投入的，可能是因為節奏、故事、語言、文化或當時的身體情況。

這部《靚太查案記》便是今年的例子，節奏是不太慢的，但可惜就是投入不到那個故事，故事本身是輕鬆有趣的，其他人也經常在笑，但我卻看得想中途離場。主要原因是可能因為聽法文和追英文字幕對於工作了一整天的身體而言，實在有點有心無力的感覺。

電影本身亦沒有甚麼緊張／高潮位，一直也是一個輕快的節奏，查案和破案也是很普通的，最後指出誰是殺人兇手那一幕，更令我有失笑的感覺（只怪我近期也在看東野圭吾的《名偵探的守則》，對於這些偵探片的經典場口也有很多古怪的聯想）。

最後我只好承認，我距離幽默的境界還是差很遠很遠很.............遠。

新宿事件 Shinjuku Incident

2009-04-05T19:30:00.000+08:00

我是滿有期待去看這部電影的，很可惜看不到電影節的原版，但正場版也是不錯的，唔知道電影節那個版本多了甚麼。看完電影後的感覺是，整個故事應該是被刪減了一大部份，引致在多個情節及人物的性格轉變上也有過快的感覺，不知道將來會否有一些導演版出現。

這電影的主角雖然是成龍，但我覺得整個故事放了更多時間去令吳彥祖的性格更立體的。由早段的幾場對話，可以看得出他是一個安份守己及怕事的人，然後是中段害怕參與成龍的非法行為，最後變形為一個壞人，整件事也是很統一的，特別是最後壞人那個造形，因為他本身不是壞人，加上膽小，所以他才需要一個這樣勁的造形去支撐自己。

相反成龍那個角色的轉變便很奇怪（又可以稱為過急），因為番唔到轉頭，便決心走黑路，到退出，整個過程也是很莫名奇妙的，莫名奇妙得就像劇中他說的那句“擊炸東京”一樣，觀眾不容易掌握到他性格的轉向。

片未那一場爭執戲，感覺有點可惜，本身整個場合的設計是很有趣的，內有一眾以吳彥祖為首戈9中國黑幫，有中國黑幫前阿頭（成龍），有日本警方，有日本黑幫大佬，外有台灣黑幫，有背叛日本黑幫大佬的手下。整個設計存在著很多的對立，有軟有硬，現在的確已經造了一個很緊張的氣氛，但在這個製作CAST下，我會要求在爆發前的張力去得更強，令觀眾可以在未爆發前已經有緊張到要吞口水的感覺。

一首PUNK歌救地球 Fish Story

2009-04-05T12:45:00.001+08:00

今年電影節只選了五部電影，十分慶幸自己有睇這一部《一首PUNK歌救地球》，本片絕對是一部驚喜之作，無論是故事、氣氛、演員、音樂和節奏也十分出色。我為了這部電影，興𡚒了足足數天。

電影的故事原自伊坂幸太郎的同名小說（呀！又係伊坂幸太郎呀，我已經完全地成為佢既FANS LA！！！），極度喜歡這個故事的原因，是此故事既寫實亦十分超現實。

寫實之處在於故事內出現了大量現實世界中出現過的流行文化／圖騰，Velvet Underground、Sex Pistol、超人戰隊、鐵人28、諾查丹瑪斯、功夫等，只要是經歷這些流化文化洗體的人，必定倍加喜愛這故事。作者的功力在於完全將這些東西熔入了故事，並沒有失控，簡直是將真實生活展現出來。

超現實之處是這故事用了很多很大膽的情節，現實世界間唔時會有那些音樂錄音內藏怪異聲音的傳言（URBAN MYTH的一種），但作者夠膽死玩到一首歌入面可以有分幾鐘無聲，然後仲要話有緣既人會聽到有女人既慘叫聲，簡直係聽見都想笑，但作者竟然可以將呢一件事，玩到串起成個故事，影響左足足三代人，然後最後又覺得好似幾合理咁樣，確係超勁。

另一玩野之處，是那個撞地球的行星，今時今日竟然仲有人可以夠膽死玩世界未日呢條橋，作者自己都不斷搵呢樣野去玩，係咁講世界未日，講諾查丹瑪斯既恐怖大王，笑《絕世天劫》，十分惡搞。

作者應該係蝴蝶效應既支持者，呢部戲根本就係一個示範，由最初出錯書，去到最後女仔上太空炸行星救地球，根本就係一連串人為既事件，只要當中有小小既發展唔同左，結局已經完全唔同左。

這部電影實在十分出色，令到我有點害怕將來看小說時的感覺，實在矛盾。

帶我去遠方 Somewhere I Have Never Travelled

2009-04-01T19:15:00.001+08:00

這電影的整個故事也發生在台灣一個偏遠的小鎮，主角是一個色盲的女孩。在這個小鎮，有一些人一直也夢想著離開，去外地過另一種完全不同的生活；有一些人每日也做著重覆的事情，世界變得怎樣也與他們無關；不同人有不同的生活，縱使是一個平淡的小鎮，亦有各式各樣的故事。

女孩由小朋友講到少女，兩位演員的氣質很相似，有一種頑固及抽離的感覺。在故事內她雖然分不清顏色，但看得不到不同人的心情，她沒有怨甚麼，她只是一步一步地行她的人生，為身邊的人打氣。

女孩的哥哥那一個角色令人看得可惜，大好青年，極之善良，可惜就是想得太理想，活了在自己的世界，結果就是受不住現實的殘酷。

這是一個幾特別的台灣電影，香港比較少機會可以看到台灣電影有這種小鎮風情。因為近乎沒有明星演出，亦加派了一些寫實感。

陽陽 Yang Yang

2009-03-31T19:00:00.001+08:00

《陽陽》這電影就是關於一個叫陽陽的女仔，她是一個中法混血兒，長得像一個外國人，但其實一句法語也不懂（聽說這和女主角真人的情況一樣）。她身邊的人把她當作與眾不同，就像高人一等一樣。

陽陽就是知道自己外形出位，所以經常收藏自己的痛苦，以別人的感受行先。這種性格令她遇到很多問題，身邊的人亦處處提防她，男仔亦大多對她不懷好意。這故事便是關於陽陽一直便對很多問題，但也一直堅強地走她的人生。

故事內的其他人物亦很立體，陽陽的姐姐是一個本來不錯的女孩，但可惜就是多了一個與別不同的妹妹（她們是異父異母的），令她很害怕被比下去，對於很多東西只要和妹妹有關便變得很偏激和執著。

那位男學長，即陽陽的經理人的設計亦不錯。他與陽陽的關係有一種張力，似有還無。一方面希望可以令陽陽出名，一方面亦十分珍惜她。片中的幾場Tango戲，雖然睇唔出他們舞技驚人，但感受到男女之間的角力。

舞吧！昴 Dance, Subaru!

2009-03-29T15:55:00.001+08:00

本人是由《舞吧！昴MOON》開始追這部漫畫的，之後看回全套《舞吧！昴》，此故事的作者曾田正人是我一直支持的漫畫家，已經自過他多部漫畫了。相比他的其他作品，這個《舞吧！昴》是甚為不完整的，甚至有點唔連戲和斷尾的感覺。幸好，這故事還可以看到他精於描寫人類在極限時的精神狀態。當我一得知這漫畫會有電影版的時候，怎可能拍到那種在死命邊緣跳舞的感覺？還有就是有那些演員可以演得出那種失神和忘我的精神狀態？

答案原來好簡單，就係唔拍。電影版完全將女主角昴在漫畫內的那些強烈內心戲抹去，變為一部單純的跳舞戲，可算是令人極之失望。

話雖如此，電影版亦有一些地方改善了。電影版加入了幾位新角色，亦改寫了部份原著的劇情，令故事變得較為完整及合理。

但可惜，綜合而言，這只是一部普通的跳舞戲，無特別意義，原著中那些充滿張力的情節亦完全失去味道。

青之烏 The Blue Bird

2009-03-28T10:30:00.000+08:00

這電影以很緩慢的節奏去講一個關於承認錯誤的故事，這個速度更讓人可以慢慢地感受角色的心情。

悔過書的作用到底是甚麼？故事內講到學校要求學生寫一篇限定是五頁紙的悔過書，內容更加需要得到全校老師的審查，悔過書成為學校的一個紀綠，証明學生已經知錯，並且意識及語調正確，十分諷刺。

除去學校的因素，悔過書的作用亦值得深究，悔過書是否就如告解一樣，完成後就可以假設自己已經得到原諒，可以重新做人，過開心快樂的另一天？

做錯事是一件已經改變不了的事實，寫完悔過書或告解之後便把事情忘記得一乾二淨，正如阿部寬在電影所言，這只可算是一種自欺欺人的自私行為。

正確的做法是正視錯誤，認清自己對別人所做成的傷害，將來要更加注意理會別人的感受，一句對唔住唔係大哂，最重要是發自內心，以及避免再對其他人過成傷害。

讀愛 The Reader

2009-03-22T11:50:00.002+08:00

《讀愛》這個故事講了一些很值得深思的東西，關於尊嚴和內疚。

有些人認為這電影的前部份有太多性愛，我卻不以為然。這故事以男角的成長為主線，可算是以他的身份去講這個故事。那些陳年舊事，可以理解為他的回憶。若同意這個立場，便明
白性愛的場面多也是有道理的，一個十多歲的男仔，滿腦子除了性，還可以有甚麼？

言歸正傳，這電影中段的幾幕法庭審訊，可算是本片的精要。我肯定琦溫絲莉是知道男主角身在現場的，她始終不肯親口承認自己是一個文盲。她的角色徹底就是一個掘強的人，這是她的堅持，為了堅守這個秘密，她選擇承現控罪。男主角在法庭內亦極度焦急，一方面從內心憎恨當年離開他的琦溫絲莉，一方面想指出她的清白，做和唔做和唔夠膽做，就像要谷爆他那個剛長大的腦袋。現場還有其他人的角力，猶太人的指控，其他德國婦人的奸計，把整場審訊營造得很緊張。

本片最強的一幕，卻出現在故事內數十年後，男主角去探琦溫絲莉一場，兩人的心情在當中變化了數次，由期待到失望，由愛變為關心，由近變為遠，兩人的演出也很利害，情感沒有誇張地外露，只是在小動作展現出來，那些眼神和嘴角的小變化，可算係出神入化。

這亦是一個令人很沉重的故事，有點可惜，但最後男主角總算選擇面對了自己的過去，解開內心的深鎖。

愛到底 L-O-V-E

2009-03-04T20:50:00.000+08:00

這電影由四個故事組成，正如這電影的名稱，四個故事也是關於愛情的。

九把刀始終係一位專業作家，文字運用上很利害，本故事最能夠感動人的，也來自范逸臣的獨白。故事本身亦很特別，有新意亦很年輕。

方文山那一部令人感覺良好，有清新的感覺，用輕快的節奏去講一個簡單的故事，另外亦插入了一些娛樂圈的現象。

陳奕先的那一部實驗性比較重，沒有很詳細的內容，有很多空白的地方，需要一些想像和忍耐力。有嘗試去營造張力，但不太明顯，出現了混亂的感覺。故事的埋尾亦比較倉卒。

黃子佼那一部是一部玩味之作，如果作為一個電視節目﹝一星期五至十分鐘那種﹞會較佳，有特色，但十分之考驗觀眾的容忍力，其無聊程度可算是過界。

保持愛你 Love Connected

2009-02-21T14:15:00.000+08:00

這電影比我預期的來得好，起碼有些地方還是很感人的。

愛情有時唔夠真實，我們需要一些確實的東西去把那種感覺捕捉下來。在謝安琪和梁祖堯那個故事，我們看到一支筆和一件毛衣。這些定情信物，在不同的時期，有不同的意義。在熱戀的時侯，那是甜的，是充滿希望的。在分開的時侯，那是令人傷心的兇器。在這個故事，那支筆，便負責在不同的時侯，寫不同意義的字，同樣是簽名，可以在結婚証明書，可以在離婚証明書。這支筆，代表了一個希望，一個承諾。這支筆，用得妙。

I love you boys和森美那兩個故事也是很有趣的，I love you boys個段講對人的心意，森美個段玩神秘，但最後那個花店女友的鬼計實在利害，成功斷了森美的米路。

胡清藍和唐素琪那段實在古怪，唔明葉念琛在愛情路上受過咩野打擊，經常都要咁樣玩，硬係要令人覺得套劇並唔係咁單純，但係真係“硬“過頭。

浮生路 Revolutionary Road

2009-02-14T14:40:00.001+08:00

對於這部電影，我久久都未能諗到應該點樣去分析這一個故事，當中展示出來既男女角力和恩怨，實在坦白得令人感到可怕。

女主角既心理變化來得很強，配合她在戲中的演員身份，由一個生活平淡，對所有事情都抱怨，直至對生命重燃希望，最後幻滅的過程，我們可以清楚看到她的情緒化。希望愈大，失望愈大，在戲中一個由她所計劃出來重生計劃，原本令她以為，可以照亮整個家庭，為老公的生命重點希望。雖然咁講好殘忍，其實很多事情也是她一箱情願希望出來的，為老公重點希望，都只是將老公變回她心中那個形象，可能並不是老公真正希望的。

男主角展現的，在社會／大企業機器中一個無奈的小角色，不得志是必然的，在愈大的公司工作，眼界愈細，這似乎是必然的定律。在無意中可以確實地得到一個被賞識的機會，這種確實的成功，對比於夢幻般的想像，誰勝誰負，顯而易見。老婆並不知道／了解這種成功感，亦不能想像到老公有這種志向，悲劇在所難免。

故事的其他角色的故事也十分出色，完全將死守關係的病態展現出來，實在可怕。

親密 Claustrophobia

2009-02-13T16:10:00.000+08:00

這故事的主題，應該是想講一種張力的，一種男女的感情關係，在產生和抗拒之間所產生的一種張力。

在感情似有還無，快要發生的時候，男女之間都會有一種張力，大家都知道對方有野，但就偏偏未開始，這種張力，大多是快樂的。但在這故事，兩人的感情，卻有同公司和第三者的問題存在，令到兩人都覺得這感情是不應該發生的，這種反抗，便形成了另一種張力。

這電影是以倒序的形式發展的，一開始便是張力最強的地方，之後再講這段感情的發生經過。對於這不斷向後退的故事，我並不太欣賞，雖然可以看到一些東西在一點點地積聚，但卻有點失去焦點的感覺，同時亦完全地令這電影失去緊張的感覺，畢竟張力在一開始已經完結了。我曾經以為在一輪倒序後，會回到現在，但始終都沒有出現，有點可惜。

另外，那些配角的枝節故事也甚古怪，和主題故事無關，但都可算係另一種男女角力的故事。

奇幻逆緣 The Curious Case of Benjamin Button

2009-02-07T13:30:00.000+08:00

在這一部電影，我們幾乎看了一整個人生。這個人生大體上在平常人一樣，有無數既既起起趺趺，唯一分別，亦係這故事的最奇幻之處，便是這個人的身體，在出身時是一個老人，卻隨時間而變得年青。因為這一個分別，這人的一生比平常人更加難行，在嬰兒及老年期，和常人一樣需要別人的照顧，但更需要多一些的運氣，才能生存下來。

這故事的良好之處，在於它只有一個奇幻位，除此之外，所以事情也很合情理，令人更容易投入這一個故事。說它合情理，因為我們可以看到故事的角色們，和我們一樣，在人生中經驗了很多事，有成功既時候，有失去既時候，有放縱既時候，有迷失既時侯。

很喜歡女主角在劇中所說，他們兩人是在最好的時間結合了。這說話令人感慨，他們兩人可算青梅竹馬，在成長期亦有機會可以一起，但最後都在他們經驗了人生很多得失後，才終於成為一對。那些得失，令他們更加珍惜對方，亦令他們更加明白愛是甚麼。

這故事的講故事技巧很好，以這種由第三者去讀故事的電影很多，但這電影為觀眾在這裡帶來了一些驚喜，觀眾在整個欣賞過程，和這位說故事的人一樣，要多次猜測這位說故事的人的身份，多次的轉變令這說故事的過程變得不一樣。《忘了‧忘不了》的讀故事技巧是另一個經典，一直都很平實，但到最後卻出現了一個極大的劇變。

曾經講過唔再講演技，因為唔識，但今次真係要讚畢彼特。佢係片中得知女主角懷有自己的身孕時，那一個反應，有點茫然，有點驚嚇，完全表示到佢擔心自己的身體問題傳了給孩子，佢好清楚明白呢一件係好痛苦既事情。就係呢一下反應，可以睇到佢係完全投入角色，清楚明白角色既內心，並以一個表情，對白都唔需要，咁去表達左出來，實在很利害。

這電影雖然有點長，但可算係完全唔悶，縱使我睇既時候，鄰座的那位人兄，講了廿多次電話，但因為故事實在太精彩，所以完全無影響到我既投入。

超級零零狗 Bolt

2009-01-28T13:20:00.000+08:00

呢部戲最正既地方，便是在片頭有一段《反斗車王》的小故事，之後的《超級零零狗》，實在係相形見拙。

超級零零狗的故事其實好簡單，諗落都幾似《反斗車王》，又係主角最初以為自己好勁，之後無哂自信，然後經過一個旅程，最後重新認識咩野先係最重要。故事差唔多，但係表達既重點唔同，《反斗車王》著重角色既心路歷程，《超級零零狗》無咩點講零零狗既心情起伏，反而似一部公路電影，講佢地由東岸去西岸既歷險過程。但是在這段旅程，其實無咩特別驚險或深刻既事發生，出現得最多既係講零零狗點樣去學做一隻寵物狗。

較古怪既係，在旅程尾段，貓仔突然想定居下來，之後攪到拆夥，不過最後都係番埋一齊，好似搵戲做咁樣。

差唔多既故事，用唔同既方法去講，邊個好就見人見智。但係《超級零零狗》既賣點係特技，所以故事都唔應該有多大期望。

Pixar送佢一部《反斗車王》特別版做片頭，我個人感覺就靠害居多，畢竟質素實在相距甚遠。

赤壁 - 決戰天下 Red Cliff II

2009-01-27T11:30:00.000+08:00

首先大家要知道，這部電影並不是叫做《三國演義》或《三國誌》，這是一個重新創作的故事，所以和大家一直認識的會有出入。要睇原版大可睇電視版或小說，實際上，要將原版故事放進電影，亦不實際，因為原版的故事十分龐大，要極度簡化才可成為一部電影，強行抽出一段的話，亦會缺乏電影應有的節奏，所以再創作是無可厚非的﹝日本人也喜歡拿我們的古籍作重新創作，但有人會認為這是盜取中國經典，這是另一個話題﹞，起碼在這電影，幾位主角都重可以保住男兒身及基本性格，已算還得神落。

林志玲演既小喬上集可有可無，今集就成為重要人物，大大影響了曹操一方的戰鬥力，這是在以往的三國內從未出現，可算特別。她的出現，成為奸雄曹操的心理缺乏，出現難得一見的弱點。

周渝及諸葛亮在此戰的重要性分配，亦比《三國演義》來得合理，因為孫權一方的實力比劉備在當時強得多，而諸葛亮在此時應該尚未立過大功，所以周渝在此擔大旗實屬合情合理。

另一個特別之處是趙雲的角色，傳統上關羽和張飛都是最強的角色，但在這裡趙雲便略為比兩位重要，趙雲更加可以和周渝並肩作戰，實在令人意相不到。這是否配合了演員本身的知名度，便不得而知。

趙薇的故事是此片的敗筆，不論是做探子或是最後的大戰，也不合情理，大大影響了整個故事的完整性。

這故事最另類的，便是結局一段，赤壁一戰可謂雙輸，大家也失去了一些重要的東西，電影再一次展示戰爭的殘酷，籍以宣揚反戰的意識。關羽係呢個故事無得放生曹操，但係有一句精警既對白，佢係最後對曹操講一句"你過時了"，實在值得再三回味，過時的是到底是甚麼？是他的霸道、野心？還是觀眾對傳統故事的追求？

崖上的波兒 Ponyo On the Cliff by the Sea

2009-01-18T12:05:00.001+08:00

其實這是我第一次係戲院睇宮崎駿的電影，多少都有一點朝聖既心態。有幸大師終於回歸簡單既圖畫及故事，此片亦實在能夠帶來生活的一點輕鬆。

電影入面中介的媽媽講得無錯，呢件係一件神奇而不可思異既事，故事絕對不講常理，但我相信好多人都唔介意，畢竟我地都重有少少想像力剩低，即管一起去投入這個神奇的故事吧。

宮崎駿的電影總是令人喜歡上故事內的簡單生活，看似遙不可及，但其實在於生活上點樣取捨。環境的問題繼續存在，但並無太刻意去講，大師喜歡小朋友自己思考人和大自然的關係。

作為一個給觀眾放鬆心情，投入幻想世界的工具，這作品絕對一流。色彩繽紛的海洋世界，單純而輕鬆既生活，彷彿公仔麵都好似比現實好食得多，還記得《龍貓》內，小妹妹去農田食青瓜粟米嗎？我得承認我真係睇到想食埋一份。

勇氣及愛都係主題，海女神對於中介及波兒的信任，兩位小朋友的勇氣，波兒喜歡中介的直接，都值得學習。

大師有自己一套對於動畫的見解，簡單生活及愛護大自然始終都係佢既主題，佢同一般卡通既分別，值得大家深思，都係個句，係買玩具等相關產品既時候，唔該諗多少少，愛護及認識一下呢個地球，龍貓唔一定存在，但各種各樣的植物卻可以在大家的照顧下天天長大。

歌舞廳最後一夜 Mrs. Henderson Present

2009-01-14T19:30:00.000+08:00

諗唔到呢一部《歌舞廳最後一夜》咁有趣，片中講一位老婦買了一間歌舞廳，並在經理的協助下，把歌舞廳攪得有聲有色，在世界大戰期間更大受本土士兵歡迎，可算是一部令人看得幾舒服既作品。

片中歌舞連場，亦有很多演員的內心劇，特別是老婦的外堅強內柔弱及活潑性格，十分可愛及討好。經理的風度及動作亦有別樹一格的風采。片內有少少講到歌唱演員和脫衣女郎的不和，但沒有影響全片的氣氛。

一干人等在劇內經過幾次波折，氣氛掌握唔錯，是一部值得細睇既電影。

榴蓮飄飄 Durian Durian

2009-01-12T19:30:00.000+08:00

想不到相隔了這麼多年，我才看到這部陳果回歸三部曲的第三部半。

這電影講了兩個本來都不屬於香港這地方的女子，都因為不同原因來了香港，但兩人最後都離開了，並且兩人都不打算再回來。香港本來便是一個有很多不同國籍人士的地方，陳果特別愛講較草根的一班。導演在這故事並沒有為這班人故作可憐，而只是平實地講他們的故事，他們的快樂生活。

快樂和財富沒有直接關係，片中小女孩的一家較貧窮，但全家也活得快樂，正所謂知足常樂，一家人在一起便已經很快樂。小女孩在後巷見著妓女行來行去便搵到錢，睇到各種人事，對於各種事既好奇亦害怕。最後還是覺得回家可以和朋友繼續讀書最開心。

秦海璐可能是當時陳果少有的專業演員，確實地把角色演得不錯。在香港賣淫生活可算是做得神似而不過火，特別是在日常生活的地方，沒有任何淫亂的感覺。回鄉後更是考演技，要演回乖女，不願談香港的生活，但身邊的人卻個個都想去香港搵錢。

香港作為城市，有很多過客，亦是很多人的夢想，在這裡各自過著不同的生活，但這班人當中，有很多還是會回去自已的家，香港只是他們回憶的一部份。

葉問 Ip Man

2009-01-10T09:55:00.000+08:00

已經是第二次看葉偉信加甄子丹的組合了，上一次既《導火線》可算係由頭打到尾，超勁。其實一直都有睇葉偉信的作品，小品文戲一流。兩人竟然可以合作到第三次，真係有小小意外。

我認為這電影是為了提醒大家武術作為一樣興趣及康樂活動的真正意義，特別是在電影早段日本仔出現之前。葉偉信今次再有食飯戲，講既係新拳館教頭上門搵葉問比試一場，兩人食完飯歎埋茶才閉門比試，招式點到即止，純粹為了比試一下大家的功夫，真正的以武會友。行宇作為一個武術滿有熱誠的年青人，亦示範了縱使未成大師，但喜歡武術亦未必亂用力量的人。

樊少皇和池內博之便是故事內誤用武術之人，樊少皇以為武力壓倒一切，池內博之尊敬武術，但都誤會了武術只有勝負之行。相比之下，甄子丹演的葉問便在比試中追求更多，兩位武者在一場比試中，可以是兩者得益，公平地到達武術及心靈上的頂峰。

此片當然有不少打鬥場面，大多十分精采，可惜我睇唔出各人是否真係打緊唔同派系的招式。文戲方面，在幾個小地方都見心思，睇到眾人的性格，尚算立體，文武平衡比《導火線》好得多，加上甄子丹在古裝片上少了一種老土的感覺，此片實屬兩人合作多次的收成之作。

大搜查之女 Lady Cop & Papa Crook

2009-01-03T09:50:00.000+08:00

無可否認，《大搜查之女》是一部氣氛良好的電影，情節的推動、剪接的爽快、畫面的精準和音樂的配合，令人產生一種投入的感覺，加上適時有新演員出現，的確成就了一部電影感不錯的作品。如果有睇過同一制作班底的《傷城》，會發現兩電影在節奏及感覺上甚為相似，相信這已是一種風格。《大搜查之女》是一部易食的電影，製作人亦已將所有野編排的很好，觀眾不用放上太多心思去思考劇情。

實際上思考都無用，因為故事的變數實在很多，甚至過多，特別是在主線綁架案上，連續不斷的變數，彷彿是為了要放入更多的演員，去到尾段變化得太大，觀眾基本上無可能去參與查案的過程，甚至會出現迷失。故事的重點，可能並不在綁架案上，反而更似是要講查案時黑白兩道的合作、男女主角各自的心理狀況。

當然，大家都會發現這電影給予了鄭秀文很多表演機會，佢可以盡情咁演出佢既招牌神經質性格，性情古怪但工作效率奇高，是現代女性的特點吧。陳奕迅演一個要平衡家庭及社團利益的人，驚喜不算太大，他的吸引力唔錯，亦都試過唔少類型的角色，將來總會有一些代表作吧。

黑白兩道的合作為這部電影帶來了不少有意思的畫面，特別是清晨在陳奕迅家上一齊向關二哥上香一段，在情節的調配上便可見心機，先以一段黑幫街頭大戰引起緊張的氣氛，再以警察出現救人帶來高潮，返到屋企後，以一組無對白純音樂既畫面去迎接黎明，最後以一齊拜關公為這一連串事件作結，氣氛連貫及控制得一流。

這是一個略為單薄及失控的劇本，但幸好在各方配合下，戲味還是不錯。但不要忘記，這個無間班底，曾經以劇本嚴謹見演，《傷城》還是不錯，這次便有點自拆招牌了。

大耳仔走天涯 The Tale of Despereaux

2009-01-01T13:20:00.000+08:00

我想，作為一部故事，在創作的最早期，都應該設計好目標的觀眾是那一類型。像一部以小朋友在主要對象的動畫片而言，最傳統莫過於以一個簡單有趣的故事，帶出一些很基本的人生道理。講道理最強和最受歡迎的，當然是宮崎駿和Pixar的一系列作品，當中所講既道理和社會問題十分嚴肅，最重要係他們的故事在講道理的時候不失完整性和趣味。

反觀這部《大耳仔走天涯》，便有故事失控及講道理流於表面既問題。這故事以多線發展，久久都進入主題，幾位主要角色都用左唔少時間去講，但係當中既故事唔連接和單薄，特別係水手老鼠和肥僕人的造反情節，更加係可算係全無先兆，十分古怪。當然，作為一部故事唔完整的電影，此片用上不少旁白去講劇情，絕對入型入格。

故事失控，但係製作人似乎好多大道理想講，例如小朋友返學，最緊要就係學識點樣去驚，呢個係一個好值得反思既問題，但係這故事只係不斷重覆大耳仔唔識驚，其他老鼠朋友就咩都驚一餐，整部電影都無講呢樣野有咩教訓及值得深思。另一個道理就係和水手老鼠和肥僕人的造反有關，兩人都係因為公主的一時之氣，傷害到兩人的心靈。第二個道理大家會有較深印象，因為旁白好清楚咁朗讀過，加上係兩個角色身上重覆左。但係如果無左旁白，大家又會點？

為小朋友著想，以卡通去教導一些道理，如愛護大自然及尊重別人，當然是十分好，但眼高手低和野心太大，都會影響到效果，用一個簡單的故事去講一個眼得明的道理，遠勝於用一個鬆散的故事去講好多個睇唔明既道理。

粉紅色的一生 La Vie En Rose

2008-12-05T19:45:00.000+08:00

因為高先十周年電影回顧展既緣故，所以才有機會在戲院睇到呢部當時錯過既電影，總算無走寶。

這電影講述法國傳奇歌后伊蒂琵雅芙（Edith Piaf）的一生，全片以打亂哂既時序去進行，好處是令到觀眾可以睇到一些事件所引致既後果及令到情緒更加一致，壞處是令到一些好像我這些並不認識這位歌后的無知觀眾，睇到一知半解。但平心而論，縱使我事前並不認識這位歌后，但此片仍然能夠深深地感動我。

在電影內，伊蒂琵雅芙一生可算是充滿不幸及經常被上天所玩弄，擁有天籟般既歌聲，除了令她的人生大發光彩，其實增加了她從波折中跌下的痛楚，幸好她生命力強，可能是因為她實在太喜歡唱歌吧，所以能夠得到法國國寶級歌后既美譽。她的歌曲亦得以在後世流傳，經常被引用及翻唱。

演出這位歌后的瑪莉安歌廸娜，由少女時期演到病重死亡都十分神似，當中情緒既演繹彷彿就好像當事人親身演出一樣，真的是十分利害。

CIA光碟離奇失竊案 Burn After Reading

2008-11-28T14:00:00.000+08:00

對於呢部戲，其實真係唔應該有太大期望。以內容來說，只是一大堆既錯摸及猜疑引發出一個戲劇性既發展，當中再加入不少諷刺性話題，整體並不完整及合理。故事既發展，建基於現代人心中都存在既心理問題，如緊張、不安和缺乏自信，幾位主角在戲內都善於無中生有，整個故事便是靠這些所有事情總是向壞的一方發展而構成。

故事並不出色，但節奏不錯，幾乎全片既劇情都係一平一轉，不會太悶，但有點在一個壞劇本上鑽牛角尖似的。縱使那些對各種制度的反諷，亦流於表面及造作。

有點可惜是平白浪費了一班好演員，但此片似乎好似一直都以遊戲作品為宣傳，所以，都係唔應該有太大期望。

爆粗BAND友 Detroit Metal City

2008-11-08T13:35:00.000+08:00

之前睇過呢部電影既第一期，覺得內容好有意義，好多野都值得一再反思，但因為得知就快會有電影版，所以決定製造一次未睇漫畫先睇電影既機會俾自己。據說這部漫畫在第三期便已經有片商決定發行電影版，可算是極快，相信與近年以日本漫畫改編的電影十分盛行有極大關係。

這故事內其實有好多野都係以兩極化形式存在，金屬狂迷既崇拜和日式達人既崇拜，其實都係一樣咁極端瘋狂，被神化既人被包裝成過著一種與常人不同的生活，一邊係一分鐘內強姦十一個女人，另一邊係生活上所以細節都充滿型格，但其實真相係一個就不情不願既薯頭，另一個就係不會尊重人的溝女王。這故事直寫金屬狂迷既瘋狂，其實亦暗串了很多日式達人，難免令人看得痛快。

生活的真實環境及夢想亦是一個大對比，松山研一喜歡流行型格音樂，卻成為重金屬狂魔，他的其中一個金屬頭號支持者，真正職業卻是正義戰隊的紅戰士。生活與夢想往往都好像事與願違，但這故事其實亦令人充滿希望，事與願違都可能只係一個短暫的時期，或是達成夢想的一個途徑，片中松山研一最後都終於可以在大舞台表演自己最愛既音樂，頭號支持者亦憑扮演紅戰士的工作，得到追隨偶像所需要的金錢。

漫畫其實比電影來得更瘋狂，值得思考既地方較多，空白位亦較多，電影感覺上好多野係畫埋出腸俾人知，但這個始終都係一個值得反思既故事。到底追求流行和過度崇拜，是否其實係同一樣野？夢想既追求和基本既生活，又應該點樣平衡？表面上追求既夢想，會否只是一種基於某種崇拜而產生，並唔係真係自己內心的願望？

甜言蜜語 Sweet Rain

2008-10-26T19:50:00.000+08:00

這部電影可算是完全唔跟封面，甜言蜜雨之名完全係牛頭唔搭馬嘴，令一個咁好既電影大失吸引力。故事講金城武演既死神，負責到人間用七日決定目標人物應唔應該死還是可以繼續生命。香港既雜誌雖然都有介紹，但睇完之後都覺得那些介紹大多流於表面及樣板化，並無講到原來呢部電影對於生命及希望既重要含意。好坦白講，如果唔係有金城武，我未必會選看這電影。如果中文譯名可以直接用《死神的精確度》，雖然字面意思難明，但應有較大吸引力。

中國人有謂死有輕於鴻毛，重於泰山，此故事其實都有相近意思。電影內描述了死神在不同時期執行的三次任務，在第一次任務，死神最後給那個女人繼續生命，因為這個女人終於找到自己生命的一份光，一個生存的希望。在第二次任務，我地見到死神的決定不止影響了一個人的生死，亦影響了這個目標人物身邊的人。雖然在這任務死神最後都決定了目標人物死去，但死因及時間的不同，卻令到這目標人物的手下，增加了自己對信念的信心及勇氣。在第三次任務，死神重遇第一次任務中的目標人物，事隔數十年，死神雖然對目標人物只有很小的記憶，但這名女子，並沒有浪費自己幾乎失去的生命，雖然身邊的人相繼死去，但始終珍惜及愛護自己的生命，並活出了一個有意義的人生。

這三個任務發生在不同的年代，電影對於第一及第三個的時期表達得比較混亂，觀眾只係能夠估到一個係十幾年前，一個係好多年後，但基於這名目標女子的年齡，相信相隔應該不多於40年，但由第一個咁老士既年代，去到第三個有靚女機械人，只係短短四十幾年卻好似不太可能。不過，這只是一個表達上的美中不足，對於電影想表達人對於希望及生存的勇氣及意義，並沒有影響。

情迷巴塞隆拿 Vicky Cristina Barcelona

2008-10-26T14:35:00.000+08:00

活地阿倫來到巴塞隆納，講既都重係連橫既錯摸事件和愛情之中既口不對心，當然不忘對藝術家及現代人心理來一場反諷。內容保留到一貫既水準，可惜表達技巧上卻出現一種很悶既感覺。

故事講兩位美國女孩去西班牙的一場旅行，兩人對愛情有不同的想法。本片暗暗地想表達愛情其實是自我內心信任和滿足的感覺，好多時一個小諗法唔同左，整個愛情觀便不同了。片中一句對白應該可以成為經典，"I love him, but i am not in love with him"，值得細味既一句，但係咪其實真係諗得太多？唔可以"in love"，會唔會係因為有太多野放唔低？為何總要徒派煩惱？

史嘉麗祖安遜在片中有一個不安於現狀心理病，病情係當佢身處於一個太幸運安穩既環境既時候，會感到無法忍受，總想逃之夭夭。這聽來可笑，但其實十分常見，起因是我地都太安穩，物質上也大都容易得到滿足，所以內心便產生一種對抗的魔鬼。如果可以找到真正既心靈滿足，相信可以不藥而癒。

之前話套戲做得悶，其實好坦白講，係因為部戲實在用得太多旁白去交達劇情。觀眾在聽旁白時看著畫面中人好似無無聊聊咁等講完對白繼續做戲，感覺好古怪，大減投入感。

20世紀少年 20th Century Boys

2008-10-04T11:25:00.000+08:00

好老實講，對於《二十世紀少年》電影版，我內心既感覺係難以簡單咁講出來的。事前聲明，我係《二十世紀少年》漫畫版既超級忠實支持者，極度喜歡這部充滿神奇和科幻的奇情故事，更喜歡當中以大量文化產物去描繪一個年代的手法。當我得知此漫畫將會拍成電影時，我既興奮亦害怕，興奮在於可以在大銀幕看到這部原本已經很有電影感的故事，害怕是電影版會失去左漫畫既精髓。我甚至一度決定唔睇電影版，以保持自己一份收藏在內心既期盼，但幸好在獎門人既支持下，我們終於看了這部《二十世紀少年》。我甚至在中段既時候，對於自己喜愛既漫畫場面，能夠真實化而感動。

講番呢部戲，總體上好多場合都做到漫畫既效果，我想電影和漫畫既最大分別，應主要有兩點。第一點是電影版少在好多對七十年代文化既描寫，雖然都有係咁意提下迷幻音樂、廿八歲不死之困惑和Woodstock音樂會，但都只是係咁意，文化傳承及年代投入感都大大不及漫畫版。

第二點係電影版觀眾只需要等兩次，就係睇完第一集等第二集，睇完第二集等第三集，但係漫畫迷當年可是期期都要等，故事既複雜程度更令我當時次次睇新一期都覺得有需要由第一期重看一次，電影版觀眾便少了這種痛苦﹝可能其實是樂趣﹞。

明顯地整個故事及未來兩集既發展，好多睇過漫畫既人都會知道，但事後咁睇番，真係好佩服浦澤直樹既講故事能力，當時追漫畫既時候，曾經一度以為此作又係一個偉大得失控既故事，誰知去到最後竟然真係收到尾，同埋竟然有少少反高潮和夾到做朋友一齊玩呢個關係，實在係令人歎為觀止。

期待《二十世紀少年》第二及第三集，但是以現時既進度，三集係咪真係可以拍哂架？

秘岸 Lost Indulgence

2008-09-29T21:40:00.000+08:00

之前睇過張一白《好奇害死貓》既影碟，好坦白講，《秘岸》遠及不上前作，但可能這全因本片的主題─秘密─被過度運用。

故事想講人心中都有一些秘密，縱使一家人之間也有秘密，隨著少年長大成人，秘密便愈來愈多，愈來愈需要收藏。但可惜過左火位，導致在完場時，觀眾大多只有很多個問號。

以電影故事講道理係無錯，但明顯係眼高手低，故事內可以有秘密，但係唔可以無底線﹝Bass line﹞，如果唔係好易會失控，特別是在一部刻意要玩弄技巧既電影。此片可能在剪接時剪走左好多過場片段，引致很多時候有一些不明所以既事情發生。

可以咁講，這部電影令我只有一些片段式既印象，並不是一個整體既故事。

保持通話 Connected

2008-09-27T12:00:00.000+08:00

我並未看過這部電影的原作《駁命來電》，但我認為這部《保持通話》整體上是令人滿意的。

導演陳木勝長於拍攝特技動作片，之前拍過好多部叫好叫座既動作片，特點是在連場既驚險動作下，尚能保持到整體的流暢性及節奏，少有出現其他動作片常見既困局，如全個故事只為了個別三數場打鬥場合而強行打通。在陳導演的舊作中，發現一部比較特別的電影《歡樂時光》，此片由劉青雲、陳小春、許志安和張智霖演出，講劉青雲幫後面個三位人兄打官司，全片可以講得上無咩動作場面，印象中最動作既都係一場成大幫友仔係架扶手電梯到仆親。此片和當時既另外幾部戲感覺相似，都係講現代發達社會人與人之間既關係，幾部電影都很有趣，值得一看。

講番呢部《保持通話》，可以講得上全片大部份時間都令人透不過氣來，十分緊張。有好多飛車和打鬥既動作場面，甚至幾場文戲都做得很有張力。故事上最令人覺得古怪既就係在開首的時候，刻意去強調徐熙媛係一個電子設計師，所以能夠即時令一部爛左既電話運作係一點兒都唔出奇既呢一點，如果呢下可以掌握得更自然，相信效果會更佳。

演員方面，此片可謂卡士十足，有一大班英皇人客串，另外片中做壞人個班外國人其實好多都熟口熟面，幾乎全部都係以前既電影見過，唔通要搵識打既西人真係咁難？張家輝和張兆輝一對是甚有意思的一個配對，但如果提得太多的話會令故事離題，所以現在講d唔講d既安排甚好。次次睇親古天樂都覺得佢唔錯，次次都覺得香港如果多幾個同齡既男角會更有趣。劉燁在此片充分發揮出佢既陰氣，實在係幾得人驚。

香港既動作片始終係十分出色既，希望係將來的電影創新及國際化之餘，亦能保留到呢種咁有特色既戲種。

媽媽咪呀 Mamma Mia!

2008-09-12T19:45:00.000+08:00

呢部係一部睇得心擴神宜既歌舞劇電影，全片在地中海小島拍攝，年青既都是體型優美既健康少男少女，上左年紀既都係事業有成既型男和好有性格既靚姐，配合大量靚歌，想唔心擴神怡都幾難。

為左營造一個快樂既氣氛，我幾欣賞呢部戲既形象設計，真係下下片到盡。後生仔後生女一律沙灘裝，全部都係健康咁展露美好既身段。三位疑似阿爸都各自散發著中年男人既吸引力，有高大威猛型男，有冒險家，仲要三位都有過一段瘋狂既年青歲月，符合哂所有令老中青少女迷倒既條件。幾位阿姐都好野，女人到左一個年紀就好易俾人麻煩和長氣既感覺，但呢三位都完全無呢種感覺，更有比年青人更豪爽既感覺。

全片有幾個位都令人印象深刻，三位阿爸撞見阿媽個段夠驚險搞笑，幾位阿姐引到全村女人一齊跳舞跳到跳海個段令人興奮，梅麗史翠普和皮雅斯布士南係山邊送嫁後一段夠蕩氣迴腸，幾個場合都可以深深打人觀眾心入面。

美麗誘情 The Edge of Love

2008-09-07T14:00:00.000+08:00

在看這部《美麗誘情》之前，覺得近幾年好似多左好多這類半古裝既西片，有些演員重要重複在幾部電影以類似既造型出現，我真心相信幾年後睇番劇照都講唔出係出自邊一部電影，巧合既係，在這電影的開場預告，正是另一部同樣有姬拉麗莉主演既古裝片。

講番呢部戲，好多人都講片中兩個女人在那種時勢下既友情和對抗，不過我更有興趣既係片中既兩位男主角。

兩位女角可謂理智與感情的角力，姬拉演既女歌女，雖然對詩人尚有感覺，但佢更重視係邊個俾到佢實在既感覺，詩人既浪漫太過超現實。姬拉係最後所講要一個令佢感到真實存在既對白，竟然和漫畫《獨男》內既結局，男主角所講既野意思幾乎一樣。另一位女角可算係愈是錯愈是愛，講到底就係唔肯放手，佔有左就唔肯放手，但其實根本從未真實擁有，令人唏噓。

我唔識呢位英國著名詩人狄倫湯馬斯，唔知佢個真人係咪真係咁衰格，但呢套戲真係完全拍唔出佢既才氣，亦十分成功咁營造左佢一個勁黑人憎既形象。相反另一男角卻令人產生好感，對佢既景況好生同情，特別係到佢大罵個班文藝界人士既時候，真係好似舒左一啖氣咁。

我幾喜歡姬拉演既女歌女，人要向前行，捉緊現在和建造將來才是最重要。

十分鍾情 A Decade Of Love

2008-08-24T19:30:00.000+08:00

在夏日國際電影節看了這部叫《十分鍾情》的香港電影，以港產片來說，這類以數個獨立故事組成的電影甚為冷門，但實際在近年國際間是十分流行的，事實上這部以十個故事組成的電影﹝其實只有九個可以在戲院睇到﹞，即使有部份以很另類的方式拍成，但基本上全都以情為主旨，令人看得很舒服，逐個講‧‧‧

林愛華《舊山頂道》，打頭陣既呢個故事，幾乎令我對林愛華重燃信心。兩個人在十年間的感情轉變，人物地點一樣，但心境上已經變得若即若離，此片把兩人在感情上的角力拍得甚為細膩，當中幾次挑釁、放棄和戰敗都捕捉得很準確。但可能係因為只屬於一個短故事，所以可以將那些情感既轉變拍得那麼有壓迫力。

陳榮照《路漫漫雞蛋赤赤紅》，這是一部很真實而又令人感到溫暖的小品，電影中一老人一中年都有著各自的承諾，老人要去搵一位無見好多年既老朋友，中年人要去派紅雞蛋，全個故事都以灣仔為背景。在全片既九個故事入面，我最鍾意呢一個，因為佢拍得當中兩位主角既快樂好真實，兩人雖然有錢銀交易，但兩人彷彿在過程中成為了好朋友。

黃精甫《清芳》，此故事把南丫島拍得像一個很安靜既小島，把一位失憶男和少女所發生既奇特愛情故事，變得特別清新。是要表達"要記得既，我都會記得"吧，這故事雖然沒有甚麼可歌可泣既愛情，但對於兩人所遇到既事，難免都會感到一份失落感。

麥子善《依然有夢》，這故事以《人間狗鎮》式場景拍攝，即是透明式場景，甚為大膽既嘗試。人類生存需要信念支持，即使植物人也需要有康復既夢想去支持。

張偉雄《遠望》，這故事表示人與人之間既關心的重要性，女主角自從母親離去後，便覺得活在孤獨的世界，但原來一直也有一位男士在遠方默默地看著她。這故事的感覺有點像村上春樹既短篇《四月某個晴朗的早晨，遇上100%的女孩》，當然故事是完全不同的，但也是以一段男女間既對話為主題。

袁建滔《紙皮爸爸》，很奇異既故事，就像在看Michel Gondry的電影，很low tech既科幻，兩位勁可愛既小朋友為此故事加左好多分，兩人穿著特製既衣服，坐上自製既太空船，飛上太空打怪物，拯救有精神病既爸爸。雖然故事有點犯搏，但當中有些位實在令人印象深刻。

林華全《獅子下山》，最搞野既一個故事，自閉少女一天發現獅子山唔見在隻獅子，原來隻獅子去左搵太平山。本故事籍一個咁奇想式既故事，講香港兩座大山及山下居民既歷史，甚為有趣。
楊逸德《最後一口價》，充滿時代感既故事，兩位靚女咩都要爭，物質主義之極致，男人都可以bid，爭到個人都爭唔到個心，賤男當道。

李公樂、司徒錦源《開飯》，很緊湊既一個故事，由一開始怒氣沖沖咁返屋企，幾兄弟姐妹亙相角力，再峰迴路轉地由阿爸阿媽打圓場，最後一齊煮飯食飯。當中短短既故事，已經俱備好多戲劇元素，情緒既推動和轉變，所以野都去得好快，要好專注咁去感覺。

很希望這種港產短篇集式電影，能夠在香港受落。總括而言，其實當中好多個故事如果拉長成一部正常電影，都會完全失去哂張力同埋緊湊既感覺，但現在以短片形式去表達，卻剛好達到最好既效果。

天水圍的日與夜 The Way We Are

2008-08-17T14:00:00.002+08:00

終於看了《天水圍的日與夜》這部有不少好評的電影，這部電影自從在電影節首播以來，一直都得到不少正面的評價，可惜到正式上畫時，全港只得一間戲院作一日一場式既放映，有心睇都唔係咁易睇到，有少少諷刺既係，天水圍既戲院都無得放呢一部《天水圍的日與夜》，不過，我幾肯定就算有得播，大部份既天水圍居民還是會覺得這部電影甚為沉悶，原因後表，但絕對和觀眾質素無關。

這部電影講的其實就是生活，一個平凡港式家庭的生活，電影內既片段大家都應該熟口熟面，假期時在屋企hea足一日，去朋友屋企打機打牌，阿媽同鄰居異常地熟絡，阿媽闊綽地叫自己去幫鄰居，以月餅做正餐，等等既事例，或多或少都發生過係大家身上。難得既係這電影真係可以好平凡寫實咁展示出來，電視劇都經常有日常生活情節，但大多都拍得超現實，要將生活平實咁表達出來，並唔係講咁易，因為當中仲要含蓄地表達各人內心情感微妙既轉變。

話呢部電影接近真實生活，又其實有一點諷刺，因為當中有些片段可能大家以為好常見，但諗真一點，原來已經好耐無試過。最大既事例，就係一家人坐低食飯，唔駛用電視送飯，雖然係電影中我地見到佢地兩母子好似唔多對話，但好明顯可以感覺到佢地實際係好friend，好多野都可以放開咁傾，唔覺有咩秘密，呢種親子關係，用錢都買唔到。

呢一點不平凡既就係，佢地母子二人都樂天知命，縱使唔係大富大貴，但只要生活快樂，多餘既物資係唔需要既。值得一提，兩人既生命力都好強，佢地應該係屬於對環境適應力好強既人，佢地似乎好識得在現有既環境中找尋快樂，快樂其實可以好簡單。

你有壓力，我有壓力，電影內梁進龍一句不經意既說話，絕對值得大家反思一下。片中佢既老師陳玉蓮話佢情緒處理得好，有咩事都可以好冷靜，梁進龍講出一句，因為無事發生左而已。其實好多野，放開咁睇，其實都好小事，永遠都唔會有絕路，失去得多，其實都係因為要求得太多。

文首既時候，曾經話過天水圍居民唔會覺得呢部電影特別吸引，最大既原因，就係因為片中既就係佢地既生活，日見夜見既野，又有咩咁特別，值得去劇院睇？我住係元朗，同天水圍好近，都有好多住係天水圍既朋友，但從唔覺得佢地有咩問題。社會上成日講既天水圍問題，根本上就係俾人刻意放大，然後乘機抽水，最無良既其實係打造呢一個形象既人。

天水圍有三樣野特別多，屋村多窮人多南亞裔人多。屋村多實際上係全港既形象，沙田葵青等地咪又係咁多屋村，除非你係活係《四葉草》式超現實生活，我唔信你唔會無住係屋村既朋友，你又覺得佢地有無問題？窮人多根本唔代表人既質素低，人窮反而能夠提升生命力，人窮反而可以令人更珍惜自己擁有既野，踢一場波要既錢唔多，但我好肯定得到既快樂比去燒錢遊樂場推二百蚊銀仔多好多倍，一家人圍埋好迫咁食餐飯，一定開心過自己一個對住一部60吋既電視食鮑魚。香港聲稱自己係國際城市，竟然可以因為一個小市鎮有太多南亞裔人而形成一個問題？難道只有歐美係國際，南亞非洲等地就唔係國際？好老實講，我見過唔少南亞人都係好人，好多時係地鐵都以佢地既讓座速度最快，自己見到都感到唔好意思。更加值得一提既係，佢地好少向我地爭取甚麼福利，佢地多數只係要求平等對待，同大家無分別既係，只係想搵到食，可以養活到自己同家人而已。

呢篇可能講得太多社會問題，太少電影了，但其實都係想大家可以放低對天水圍人和少數族裔既偏見。

太空奇兵‧威E Wall E

2008-07-26T17:50:00.003+08:00

舊年寫《五星級大鼠》影評既時候，一開始就話彼思大膽，勇於嘗試，睇完今年呢套《太空奇兵‧威E》，我真係唔知佢地下年仲可以點玩，到底佢地既創作力及勇氣，有無底線？

電影的頭半個鐘以上，是完全無對白的，只有一隻叫做威E的機械人係廢置左既地球四圍行處理垃圾。直至另一隻機械人Eva出現，才有一些"機械人式"既對話。故事既取材亦是極度大膽的，講述地球因為太多垃圾及污染，已經再無人居住，只剩下一些垃圾處理機械人，而當中亦只剩下一隻未壞，仍繼續工作，將壓成正方體的垃圾疊成一座座比摩天大廈更高既建築物。而地球人亦已全部移居住一隻太空船在外太空定居下來，在那架太空船上，所以事物都由中央電影控制，未來的地球人受到高度照顧，日常只需要坐在一張可以移動既椅子上，自小便被訓練成看著屏幕過世，連企起身行路都成問題。

根據艾西摩夫既機械人三大定律，機械人要以人類既安全為首要任務，但正如好多電影故事曾經預視過，過度既保護，其實係一種破壞。如果覺得《二十世紀殺人網絡》、《A.I.》難明，《威E》絕對係淺入深出之作。

電影當中其實亦道出了很多警世的訊息，第一，品牌效應，現代資本主義社會超級品牌橫行，連政府也要讓路，在《威E》這在世界，所有事物也是由一間叫B&L既公司生產，而負責處理垃圾既機械人威E，亦被設定到視B&L既出產為珍品，其他物件全部可視為垃圾。第二，過份依賴電腦，現代人不論工作還是休息，大部份時間都對著電腦，一天對著屏幕起碼十小時，此片所展現出來的過度依賴電腦既後果，相信不少人睇完都會怕怕。第三，垃圾既處理及環保，人類應該反省，無論電腦怎樣利害，最能夠破壞及挽救地球既，都係人類，減少製造垃圾，珍惜綠色植物。

電影本身亦充滿玩味，第一，威E睇i-pod，彼思係蘋果旗下既公司，賣下廣告唔算太過份，難得是似乎大家都好接受呢下Product Placement。第二，如果我無記錯，太空船艦長企起身行路那一段既配樂，正是經典級科幻電影《2001太空漫遊》，出現人類史上重大發展的時候，所播放的音樂，將人類重新站起來行路，視為另一次人類既大突破，諷刺味爆燈。第三，呢個純粹係我估，鬼佬名Bill同William可以係一樣，咁唔知Linda同Melinda又係咪一樣，在片中既品牌B&L，莫非係暗示緊Bill and Melinda？第四，就係點解B&L老闆個名，咁似美國薯仔總統既？

可以斷言，由《反斗奇兵》開始，彼思一直都"片以載道"，每一次都帶出幾個重要訊息，當中既訊息，唔似傳教式說教般難受，講既都係一些我們可能遺忘左既一些好基本既做人道理或公民責任。好開心我地呢一代及下一代可以睇到咁有意義既一系統電影，只希望大人係陪細路睇完之後，在大量買入該片既產品既同時，可以與小朋友一齊反思下，畢竟要尋找既正面又唔偏頗既教材，實在不易。

赤壁 Red Cliff

2008-07-20T09:10:00.000+08:00

可以咁講，三國，這段歷史/古代故事對香港廿幾三十幾一代的影響力，是其他歷史/古代故事完全不可以相題並論。在小時候我們看電視播《三國演義》，滾滾長江東逝水，晚晚都聽到呢首歌，睇得熱血沸騰。還有大量港日漫畫，一些並不像《三國演義》，親劉備一派，以不同人物為主角，就像《蒼天航路》和《火鳳燎原》，讀者實行以不同角度投入這段歷史。最大影響的，應該是一系列由光榮出版的《三國志》遊戲吧，直接讓玩家置身於這一個亂世，還記得自己也沉迷過《三國志三》及《三國志四》，當中特別喜愛使用孫堅。簡單咁講，對於香港年青一代﹝特別是男性﹞，閒閒地講出魏蜀吳各方十位將領的各字﹝及特性！﹞是完全不成問題的，試問歷史上有那一段時期可以與之比美？

吳宇森是香港電影界神檯級人馬，《英雄本色》、《喋血雙雄》、《喋血街頭》、《辣手神探》是永恆的經典，陽剛味十足，著重於描寫兄弟情義，就像三國故事一樣，為一般苦於無法展現英雄本色既現代小男人提供無限既幻想，有邊個未幻想過自己可以係酒樓既花盆拿出兩技手槍，再以一敵十。

今次呢部《赤壁》屬於吳宇森回歸華人電影之作，更以這場歷史上最聞名既戰爭為主題，一個擅長拍英雄兄弟情既導演，拍一個充滿英雄既時代，最怕係現代導演俾呢個超經典既題材反控制，失去哂自己既風格，除此之外，都諗唔到一個理由唔去期待呢一部將會是吳宇森的再一部經典作品。

據說《赤壁》是以較為忠於史實的《三國志》為藍本，捨《三國演義》而取《三國志》，可算係一個十分明顯既地方令旁人知道，這電影將有別於以往既電影劇，將以另一個角度去展現呢一個時代。

事實上亦証明了這件事，相信導演/編劇都假設左大部份觀眾都清楚認識哂三國內既人物，所以並不需要甚麼熱身，電影一開始便切入一場曹操打得劉備落花流水既戰役，從而引出一班十分出名既蜀將，而電影之後既主要時間，亦主要放在諸葛亮及周瑜的相交及曹操身上，比較特別既係電影用了不少時間去講孫權戰與不戰既鬥爭。

有人話，吳宇森在《赤壁》呢部戲，失去左自己既風格，無哂個種浪漫既英雄兄弟情。我並不認同，除左無左技槍之外，我覺得呢部戲還是拍得充滿浪漫情義既。單以第一場戰役去睇，劉備的士兵以肉身去阻擋曹操追兵，以讓平民能夠逃生，這一場戲不論係送死既士兵，還是係領兵既關羽張飛，都拍得十分感人壯觀。片內有兩段識英雄重英雄既戲，分別係曹操與關羽及諸葛亮與周瑜，相對而言，本片明顯地側重於後者兩人，這在過往的三國故事中是十分少見的。

這電影的文戲也是甚出色的，瑜亮兩人夾歌一段實屬精彩，金城武既幾場冷笑話雖然有一點唐突，但總算放鬆一下電影既張力，亦為電影角色派加多一點個人風格。

同樣係大型製作戰爭片，《赤壁》能夠將故事著重於人，並不似部份國內大導以壯觀場面壓場，實屬難得可貴。此片亦見到吳宇森在統領特大場面既能力，神檯級之名，絕對受之無愧。

文雀 The Sparrow

2008-06-21T12:50:00.001+08:00

對杜sir呢位高手，我地當然比較高要求。一聽到呢部戲又係杜sir玩藝之作及要演繹香港中西區既情懷，立即想起另外兩部電影。

講到杜sir既玩藝作品，首推《熗火》，次選《放‧逐》，因為《文雀》呢部戲主講一班文雀，格局上較似後者，所以《放‧逐》就係第一部要比較既電影。

有睇過《放‧逐》既人都會記得幾場十分緊湊既熗戰，主要係無牌醫生屋企、餐廳和旅館三場。好多人都話《放‧逐》整體故事鬆散，但因為呢幾場戲，我地都覺得呢部電影值得一睇再睇。在《文雀》中，導演都營造左幾場比較搶鏡既偷野案，杜琪峰係呢部電影以輕鬆既氣氛去拍，幾場偷野案都配上輕快既音樂，場面亦盡量做到跳脫。但如果要比較兩部電影既經典場面，《文雀》便明顯及不上《放‧逐》了，很多地方都捉摸唔到想表達既野。

以人論戲，《文雀》四位男主角當然不能直接和《放‧逐》或《熗火》內的男角比較，畢竟級數不同，但角色性格實在不明，幾位文雀當中亦看唔出杜琪峰電影常見既男人情懷，實在可惜。杜琪峰電影少見女角色，有女演員都好少以靚樣示人，今次林熙蕾難得有得著到咁靚，但就要在片中跑來跑去，似為做導遊多於演戲。

另一部要比較既電影，就係2005年既《神經俠侶》，由阮世生導演，方平及爾冬陞監製，吳鎮宇、陳奕迅和容祖兒主演的電影，這電影的主要場景係灣仔區，舊區情懷都係賣點之一，但無《文雀》咁hard sell，但反而拍得灣仔更加人性化和有味道，而該電影的內容亦較有意義。

我一向都期待杜sir既遊戲之作，可惜此片有點捉不著主題既感覺，電影過份輕鬆，引致失去張力，實為失望之作。

深海尋人 Missing

2008-06-14T12:40:00.001+08:00

徐克真係超勁，早幾年《七劍》我原本都想捧場，但最後因為驚徐克老士和唔想睇黎明而放棄左，後尾終於係電視睇到，真係有點兒後悔當初無入場。為免歷史重演，一早已經決定左下次要入戲院睇徐克既戲，但係天意弄人，有追開呢個網既人都會發現，我同獎門人係極少見恐怖片既，偏偏徐克既新片，就係有恐怖成份，但因為同時有張震及張震嶽演出，令到吸引力再提升，所以引到我地去睇。

睇完之後，我既感覺就係，呢部戲其實有足夠既內容去拍三部甚至四部電影，故事真係超級估唔到，集合左精神病研究、自然生態、鬼神和愛情四大主題，可能因為徐克屬於負責任型導演，講咩都要有頭有尾，所以呢部戲內容真係勁充實，但觀眾消化到幾多就係另一回事了。

在四大主題當中，以精神病研究為最主要，如果當整個故事鋪排為一隊足球隊，精神病研究就等同穩健既後衛，守住全個故事既骨架。鬼神便是中場，提高左呢部戲既娛樂性，亦增加左觀眾既投入感。愛情和自然生態便是前鋒，上腳時間雖然少，但係屬於機會主義者，甚為搶鏡。

可能因為我地少睇鬼片，同埋奧海城百老匯既音響實在太勁，我地都覺得幾得人驚。但係呢部戲最估唔到既就係故事去到尾段竟然咁反高潮，人物及故事完全大調亂，睇少三十分鐘真係等如睇左另一部戲。

呢部戲演員甚多，李心潔已經再無驚喜可言，梁家輝出鏡少但搶鏡，但張震確實做得很吸引，精彩。

整體而言，呢部戲既敗筆係過份認真及豐富，好考驗觀眾既消化能力，但確是一部故事花心思及製作精良既本地大製作。

青苔 The Moss

2008-05-31T09:50:00.001+08:00

唔係講笑，呢部係本年度到目前為止，個人認為最好既電影，不論從故事、演員、張力去考慮，都屬於極度可觀。

電影主要以深水步和大角咀舊樓區一帶取影，講述一班邊緣人，當中有洗唔到底既古惑警察、非法妓女、乞兒、本地及南亞裔既黑社會暴徒等，佢地全部都不屬於典型香港人給外界既形象，但他們全都是確實地生活在香港，在我們的身邊維生。

余文樂所演既差人，重古惑過古惑仔，呢類角色佢已經做到好似度身訂做咁，但難得既係故事既設計，令佢真係完全表現出一個不斷在邊緣中踩鋼線，不求成名，只求生存既形象，佢同冼色麗既一次對話，完全將佢，甚至今部戲既所有人既內心講左出來。冼色麗問佢，點解有時係警察，有時係雞蟲，有時係古惑仔，余文樂答得好快，佢話，都係搵食ja。細心諗下，出賣肉體既冼色麗，搵命博既樊少皇，對外掃黃，實質叫雞，返到屋企變慈父既曾志偉，黑社會大佬廖啟志和邵音音，四出搶劫既南亞裔人，佢地全部都做緊一些好危險既工作，但背後都係為左自己，為左家鄉既親人而去犯險，余文樂和冼色麗既同一次對話，亦都講到，要相約一天去海邊，將大家背後既故事講哂出來，可想而知大家背後都承擔著無數既重擔。

故事既內容其實十分黑色幽默，當中有少少唔合情理，但整體內容絕對令人再三回味。電影一開始邵音音個肥仔去叫雞，混雜著曾志偉一班警察去掃黃個場戲，已經開宗明義咁話俾大家知，呢部戲將會係幾咁露骨地去挑戰大家既道德觀及忍耐力。

樊少皇絕對係這部電影既異數，如果要問我全片最犯博既地方係邊度，我一定會話係樊少皇既不死身，佢俾車撞唔死，俾人打唔死，俾鎗射都係唔死，真係超現實到爆。但如果再問我覺得邊個角色最搶鏡，又係樊少皇，佢既乞兒造型已經夠特別，加上連場忘命既打鬥，都未係佢最吸引人既地方，佢最勁既地方係，但似乎已經忘記左痛楚，無論點樣俾人打，佢都只係話自己無哂力，而唔係話痛。加上佢又始至終都係咁善良，佢既暴力只係源於佢保護自己所愛既決心，除此之外，佢不斷咁俾人利用，其實都幾可憐。

郭子健舊年既《野良犬》係其中一個慘被低估既好電影，今年呢部《青苔》拍得更好，希望可以叫好又叫座，唔好再錯過呢一位香港既新晉實力導演。

華麗孽緣 The Other Boleyn Girl

2008-05-12T16:05:00.001+08:00

這電影描寫一個古典英式中產家庭的悲劇，這家庭擁有兩個美麗聰明的女兒，大女妮坦莉寶雯有野心，細女史嘉麗祖安遜甘於平淡，可惜都逃唔過命運及家庭的折磨。

電影內兩人先後被英皇睇中，有人為爭權無所不用其極，有人只想安逸，卻事事為勢所逼。此故事將個人既影響力拍得很小，強如皇帝，也為了得到一個女人而受盡來自宗教、傳統及人民既壓力而萬分痛苦，又例如戲內機關算盡的妮坦莉寶雯，最後能否得寵都依靠於肚內孩兒是否男嬰，個人的表面上的權力和能力，與組織及天意對比時，其實都少得可憐。

此片以古代權力鬥爭為主題，其實都幾老土，手法上亦然，特別係去到故事結尾史嘉麗祖安遜看著幾個小朋友在草原上玩，刻意去做到與電影最初主角三姐弟在孩童時期的片段去首尾呼應，令人有硬食既感覺。另一硬食位係緊接其後既旁白，講英皇後來都係無仔繼承皇位，得由妮坦莉寶雯的女兒繼承，而佢亦即是舉世聞名的英女皇伊利沙伯一世，彷彿想再一次講命運既意想不到，但感覺極度硬食。

一個好爸爸 Run Papa Run

2008-04-12T10:00:00.001+08:00

係《一個好爸爸》呢部戲入面，其實總共有三個好爸爸。第一個當然係主角古天樂，佢由最初抗拒有小朋友，至接受，再變成極度溺愛，幾個階段既轉變都好鮮明，雖然表達方面係誇張左，但無所謂，表達到故事才是最重要。古天樂在劇中是典型港產片黑漢，對朋友兄弟極重情義，對屋企人亦極好，戲入面佢千方百計咁去俾最好既野自己個女。

第二個好爸爸是狄龍，佢係劉若英既爸爸，佢係戲入面既身份好簡單：有教養既人，女兒讀完書成為律師，但係偏偏個女鍾意左個黑社會，雖然極度不滿，但係都阻唔到個女，雖然唔鍾意古天樂，但始終都尊重女兒既決定。戲入面因為古天樂自小在單親家庭長大，所以佢同呢位"阿爸"既關係好奇妙。

第三個好爸爸，其實係女人，就係戲內做古天樂母親既苗可秀。苗可秀在戲內身兼父職，佢唔似戲內既另外兩位媽媽，佢表現出父親應有既"硬"，她與古天樂既感情，似父子多過似母子，其實更似朋友。佢地呢段關係，個人覺得其實比古天樂既父女情更感人，相信張艾嘉投入左好多個人感情落去。

兩代之間，無論如何點都會有少少隔膜，我覺得只要肯包容，同埋試下係對方既角度諗，咁樣就可以發現到對方既可愛之處。

儘管如此我沒做過 I Just Didn't Do It

2008-03-30T21:00:00.000+08:00

今個電影節既另一部戲，都係日本電影，周防正行既《儘管如此我沒做過》，超出想像咁精彩。故事一開始就直入正題，講述平凡青年加瀨亮搭火車去見工，點知係車上俾人話係痴漢，非禮女學生，如果佢肯認(又或者食死貓)賠錢了事，咁佢就可以咩事都無咁離開差館，但係加瀨亮覺得自己真係無辜，唔肯認罪，點都要打官司，去取回自己既清白。

原本呢類爭取正義既故事好普通，但偏偏佢同火車痴漢和非禮女學生拉上關係，好難令人聯想到佢真係無辜。所以係戲入面，幾乎所有人，包括警察、律師、法官、朋友和大眾都先入為主咁覺得佢有非禮女學生，只係唔肯認。電影入面有好多唔同種類既角色，除了主角和與他有直接關係既人外，有一些同樣被無辜捲入非禮案既人士，亦有一些純粹為左睇這類咁精彩既故事而入法庭聽審既好事之徒。

本電影其實好重話劇感覺，場影唔多，好多場法庭內既審訊都拍得好真實緊張，演員亦都演得很出色，令觀眾可以睇得好投入。故事本身亦好有卡夫卡式既悲劇感，無論如何都打破唔開重重既障礙，所有既努力都係徒然。

不同角度既觀點戲內都有提到，呢部戲唔係想偏向支持被屈既人，而係想人反思法律既公正性。片未加瀨亮在法官宣讀判詞既時候那一段自白，一語道破法律係可以幾咁可笑，佢話查左咁耐，審左咁耐，當大家都等待法官宣讀判詞既時候，其實，呢個世界上真正知道真相既人，其實只有一個人，就係犯人本身。

悲傷假期 Sad Vacation

2008-03-29T12:30:00.000+08:00

今年電影只選看了兩部電影，這是第一部。選中的主要原因係淺野忠信，雖然有佢演既戲一般都比較悶，但我地總喜歡捧佢場。另一原因係因為好耐之前係雜誌一張劇照，該電影是《人造天堂》，是本片導演青山真治的舊作，該片亦有淺野忠信和宮崎葵﹝她的處女作﹞，相片內只見兩人靠在一起，坐在窗旁，感覺十分平淡，兩人都充滿無奈及超強既透明感，我之前只在《Nana》認識宮崎葵，從這張相開始，我對佢完全改觀，自覺要從新認識這位年青女演員，難得今次三人再走在一起，當然唔可以錯過。

電影講述淺野忠信要向當年離家出走既母親報復，故事主要發生在母親既現任丈夫的小型物流店，該店收留了很多不為社會所收容既人，電影便圍繞在這些人身上。

以劇情而論，此片其實幾充實，如果換另一種風格去演繹，絕對可變成一部娛樂性十足既復仇片。但本片的風格，卻強調於生活的無奈及人的細小，縱使好多野係事前安排，但總在實行時枝節橫生。以淺野忠信為例，佢滿以為報仇後可以得到解脫，但原來只是趺入更深的痛苦。

談到氣氛，一如我既期待，本片真係充滿無奈感，導演將人放得好無重要性，所有角度都是被環境逼著走。全部角色都是十分之小人物，演得很平淡，很透明。

幸好，故事到最後都得到解脫，生活雖然悲傷，但總得面對，何不以輕鬆既心情去面對？

韋氏風雲 Charlie Wilson's War

2008-03-22T13:30:00.000+08:00

政客、情報人員和商人，好多國際問題其實未必一定需要去到國家級咁去解決，只要當中人物有足夠既實力，打通到人物關係，好多野都可以好低調快捷咁去解決。但係一個問題既結束，可能產生左更多既問題。

政治對香港人來說比較陌生，我地無政客，只有政府。我地既議員，無大方向，無大計劃，只有民生事項。我地既商人，只有愛國商人，反共商人大多十分低調。政治角力甚至較深層既社會發展計劃從來沒有，議事庭內只有跟著大眾傳謀既口號式呼喊，今日要求既野，後日出事後可以大聲要求別人問責。

此片講到好多冷戰時期發生既事，雖然好多野我都唔係好清楚，但係都睇得幾緊張。

片未一段好似講到差少少，只要做多少少野，埋個尾埋得好一些，就可以減少好多後既仇恨，911都未必會發生。雖然有點做作，但希望真係得到教訓。

玩轉身前事 The Bucket List

2008-03-02T14:00:00.003+08:00

你有無一條願望list，係希望自己可以係死之前做到？

呢部戲講兩個老人，一個好有錢既大闊佬和一個無咩錢但係好有學識既工人，兩人咁橋係醫院住埋一間病房，先後咁知道自己就快死，經歷過一輪憤怒、傷心、失望和無助既心理改變之後，佢地決定一齊放下家庭和事業，在剩下既日子，去達成一些自己最後既願望。

有錢佬目中無人，好多野都好似可以垂手可得，但係偏偏得唔到最簡單最重要既親情和愛。工人自小開始養家，一直都背負著重大的家庭擔子，佢夢想佢為一個學者，雖然無得接受正規教育，但佢都把握所有自學既機會。

兩人在這生命的最後一段路，都對生命有了新的啟發，重新認識了自己生命最重要的東西。

如果你有願望，咁你有無向住佢進發？

我想同自己講，最好既時機永遠唔會來臨，你最需要既支持就係自己勇氣，唔付出係唔會有機會得到更多。

L之終章: 最後的23天 L: Change the World

2008-02-17T14:20:00.001+08:00

今次呢部死亡筆記續集，已經無左死神、死亡筆記和奇拿，只係得番L，及多左幾個其他英文字母人，好像K和T。故事是全新創作，並不是由漫畫改編。劇情亦由人性和鬥智變成生化和動作。所以唔應該以睇續集既心情去睇，要當兩部係完全獨立既電影咁睇，咁樣大家先可以用一個較持平既感覺去評價呢一部"續集"。

電影一開場，就講原來L曾經係捉奇拿既時候，在死亡筆記寫上了自己的名字，所以一開始佢就只係得番廿三日命。我覺得呢個咁唐突既安排，應該係有兩個原因。

第一，整死L，跟番漫畫劇情。假如死亡筆記漫畫真係有續集，講N既故事，咁而家電影就可以照跟，唔駛考慮點處置未死既L好。

第二，配合今集既劇情，令到L唔可以係到期前死亡，所以佢唔怕中毒，又怕跳飛機趺死。

我覺得第一既機會好大，因為呢部電影都交代左N呢個角色，而電影商有商業考慮亦係十分理所當然既事。第二就係捉到鹿識得脫角既例子，既然唔怕死，就玩大佢。

雖然今集少左鬥智，但以一部標準既偵探片來說，佢都算係上品，全片都保持到一定既張力和緊張，當中亦夾雜了少許輕鬆位，編排得唔錯。

魔街理髮師 Sweeney Todd

2008-02-03T14:30:00.000+08:00

這是一個關於命運的故事，故事中人人都各懷鬼胎，最後全都受到命運的玩弄。

是不是所有人既內心都是黑暗的？本片中的最大奸角係法官，但係我又唔會話Johnny Depp係正派，因為係部戲入面佢殺人無數，邊個可以話個班人係有罪？法官咸濕本身無問題，可惜佢濫用私權去滿足自己。Johnny Depp報仇本身已經係一種罪過，之後還要濫殺無辜，亦都唔值得同情。Helena Bonham Cater講大話去欺騙Johnny Depp，最後亦得唔到好下場。

電影中一個主題係罪人最後必定會受到命運所教訓，劇中人全部最後也陷入無奈收場。復仇令人變得失明，自己既愛人及女兒都唔認得，在復仇的過程，人生既其他所有野都無哂意義，完全迷失自我，不斷為自己製造更多既悲劇。

Tim Burton與Johnny Depp既合作絕對是本片的最大賣點，兩人以往既多次合作都製造到好多驚喜，今次亦唔例外。全片的感覺十分黑暗，接近九成劇情以音樂劇形式唱出，但絕唔會覺得悶，幾次高潮位亦營造到很緊張的氣氛，本人亦十分感受到劇中人既無奈，這是一部氣氛及內容俱佳既電影。

長江七號 CJ7

2008-02-02T16:40:00.000+08:00

數數手指，《2046》和《藍莓之夜》及《功夫》和《長江七號》所相距既時間原來係差唔多，唔通諗住拍住上？

《功夫》係我寫既第一部影評，我十分讚賞呢一部電影，因為佢有效咁樣幫周星馳去無厘頭化和減少戲份，亦如《少林足球》一樣，幾位配角十分搶鏡。其實周星馳係對上幾部電影都已經加入左一些人生既意義，《食神》和《喜劇之王》等都有佢要講既道理，不過唔係重點咁講，都只係略略咁提下。

今次呢部《長江七號》，在開首的半部戲，用左好多時間去講貧富懸殊，周星馳亦都不斷咁講佢做人既道理，但係亦都到此為此，成為本片最大既敗筆。好坦白講，徐嬌從來都無顯出受佢老豆周星馳影響，佢無真正咁學到窮人既骨氣，佢得到長江七號後，便顯出一朝得志，語無倫次的樣子，甚至到最後，亦唔覺佢真係受到咩教訓。徐嬌和其他富貴小朋友既和解，亦無咩因果關係可言。

《少林足球》和《功夫》入面都有幾位好搶鏡既配角，今次呢部《長江七號》卻好可惜地完全無一位配角係得人歡心，個幾位奇型怪狀同學仔及老師都唔討好，角色設計唔立體，無性格可言。甚至係徐嬌，都唔覺得特別好。可能因為太注重玩長江七號，攪到個故仔咁弱。

其實周星馳玩科幻唔係第一次，《百變星君》和《整蠱專家》等都有好多科幻野，周星馳一方面想抽身減少演出，又想用故事講道理，又想玩小朋友加科幻狗，太多諗頭，反而令到好多野都唔受控制。

藍莓之夜 My Blueberry Night

2008-01-20T15:50:00.000+08:00

這應該又是其中一部我最喜歡的王家衛電影。事先聲明，我勁鍾意《重慶森林》，所以對於呢部很多人都話似《重慶森林》既《藍莓之夜》，多少都有點期望。

王家衛既電影，當然唔少得佢兩樣最利害既武器，時間和距離。要走幾遠，要去幾耐，先足夠去沖洗自身，重新上路？人生在世，又點止個幾百個鐘、幾千公里？王家衛最喜歡捕捉當中那一小段時間。

《重慶森林》和《藍莓之夜》一樣，都有一個很重要的場景，《重慶森林》入面有梁朝偉既屋，王菲係入面玩得好開心個間，《藍莓之夜》就係Judy Law間餐廳，王家衛拍場景既功夫好利害，將間餐廳入面既食物、人客和佈置都好有味道。

Norah Jones既公路洗心革面之旅係本片既主題，佢遇到了幾個人，令佢對人與人之間的愛情和親情有新既體驗，有人不懂愛，有人不敢愛，有人不肯愛，有人不去愛，有人不相信人。這些都是現代人既心理問題，唔好話王家衛電影無劇情呀。

唔同既經驗令Norah Jones有新既想法，重回起點，內心既已經完全唔同哂，佢已經準備好了。

哈，重唔係勁似《重慶森林》？王菲都係去左加洲一年先返來搵梁朝偉啦。

破事兒 Trivial Matters

2007-12-26T11:20:00.000+08:00

破事兒，北京話小事一件咁解，即係類似廣東話既濕碎野。電影中有七個小故事，正如戲名所言，全部都是小事，問心個句，在這時代巨輪下，唔係期望我地做到件大事出來咁搞笑下話？

七個小故事，彷彿都想撞破逃避現實的人，彭浩翔，搞到人地家破人亡，婦離子散，朋友都無得做，你玩得咁大呀？

交功課式既性愛，每次上床都要抱著考試既心態，只管交足功課，做齊所有以為對方會興奮既野，可惜卻從末真心問過對方既感受。我倒擔心一些結式婚一段時間既夫婦，感同身受，乘機發難，不過肯講清楚都算有轉機，我相信大部人都好像戲中兩人咁樣，始終都係唔覺得自己有問題。

朋友到底係點樣計算？朋友多但係唔真心，還是相反好？有時朋友之間既意見，係咪真係句句真心先？唔好睇小一件小事既決定，因為隨時有好多你估唔到既野跟著發生，命運便是在這些地方左右著。

成日話而家呢一代做野唔認真，睇下係咪好似余文樂做殺手咁樣？殺人應該係一件大事，但係佢卻被一連串小事所影響，最後更因為夠鐘收工而放左陳子聰一命。為咩？殺手都係打份工，夠鐘就梗係收工吧。

幼稚，又如何？陳冠希溝鄭融所講既野，極其低能，陳冠希所講自己既偉業，固然得啖笑，但講真，你又會點樣証明自己係一個好人？難道你話自己會賣旗？我諗係話自己會扯旗比較受歡迎。

我地做人既目的係咩？為左愛情？為左搞野？

陳奕迅為左搞野，千方百計引到女朋友同居，之後再做哂研究搵節日，搞咁多野，撞哂鬼咁樣，都係為左搞野。

一個外太空星球上既人，睇番自己既歷史，竟然發現自己星球既命名和一個中學生為左女朋友而講既謊話有關。關智斌既故事正好話俾大家知，細節改變命運，小事都可以化大。我地就係咁無聊，但係邊個知將來會點？

甚麼是愛情的感覺？杜汶澤和妓女搞完野，妓女洗完白白，想叫杜汶澤幫佢部電話充值，杜汶澤正換衫走人，兩人坐在床尾，妓女把頭倚靠在正在理頭苦幹打電話的杜汶澤的膊頭上，兩人一言不發。幾分鐘前，兩個人還在進行性交易，現在，男方正不收分文地幫女方做野，女方默默地等待，可能這是近年其中一幕最浪漫既畫面，亦表現了的我們不斷逃避愛情下產生既奇特愛情。

一部電影竟然搞到咁多個問號出來，係咪玩挑釁呀！

安娜與安娜 Anna & Anna

2007-12-05T16:05:00.001+08:00

之前睇《神探》講精神分裂，幾日之後睇既《安娜與安娜》更利害，成個人分裂左出來。我地成日講，如果當年無咩咩咩，而咩咩咩，而家就會點點點，呢部戲就將呢個如果實體化，真係變左兩個人出來，各行各路，但係事實係咪真係會點點點呢？

故事中的兩個Anna，在各行各路後，都覺得有所不足，對當年的決定感到後悔，在一次機緣巧合，她們發現了對方，更決定交換身份，可是這又如何？最後她們還是各自行回當年所選擇的路，縱然後悔，但路還是繼續走。

這是一個有趣的故事，但可惜發展得唔係咁好。導演林愛華寫故事能力唔錯，表現到現代人既愛情觀，可惜總是拍得不夠張力，戲味唔夠，觀眾容易分心。當年《十二夜》，因為故事有趣，加上陳奕迅、張柏芝和盧巧音等人做得入哂格，所以令人印象深刻。到了《尋找周杰倫》和《大丈夫II》，故事都係有趣，但係太散，無咩焦點，皆是可惜之作。

神探 Mad Dectective

2007-12-02T12:20:00.000+08:00

這是一篇遲來的影評，距離上映都已超過一個月了。回想這故事，心中有鬼，實在可怕而真實。

戲內描寫的那一種鬼，並不像我們傳統認知的那種情神分裂，因為那些鬼並不是支配了身體，而是內心的某種性格既分解，而這種分解，在潛意識上指導著行動。這是將真實擴大的一種表達，我們返工一個樣，放工一個樣，對屋企人一個樣，對朋友一個樣，表面溫文有禮，火爆的時候殺人放火，我們不認識我們的潛意識，但我們的潛意識左右著我們所有行動，這是一個避無可避的宿命。

潛意識生成於我們由孩童至今的生活經歷，從戲中的安志杰，我們看到他那膽少鬼及狡猾鬼的誕生，還有他及林家棟本性的拋棄。生活經歷產生製造潛意識，同樣地，環境亦製造潛意識。
我們都知道很多軍人，他們在進入戰場前，在自己的國家是一個仁慈的人，但在戰場，魔鬼自動誕生，殺人放心，殘害無辜，有些退伍軍人，在回復和平後，也唔明白自己點解會做過那些殘忍既事，甚至唔認為自己做過。

套用呢部電影既鬼，我會咁樣描述鬼係呢個軍人身上既誕生及拋棄。在進入戰場，當佢第一次殺人既時候，殺戮鬼誕生。當佢第一次進入那些平民的家，看見到些年青既少女，最重要佢地完全無反抗能力，咸濕鬼誕生，這兩隻鬼在戰場為佢保平安。和平了，士兵退伍，當他們回到家園，看見自己可愛而無知既女兒時，殺戮鬼及咸濕鬼便被收藏至內心中的最深處，靜靜地等待‧‧‧

劉青雲在訪問中被人讚佢好演技，將一個能夠看到別人內心的鬼既角色演活，佢話，佢唔算利害，將內心有鬼呢樣野諗出來既人，即編劇韋家輝更加利害。

Oh, I agree.