十分鍾情 A Decade Of Love

在夏日國際電影節看了這部叫《十分鍾情》的香港電影，以港產片來說，這類以數個獨立故事組成的電影甚為冷門，但實際在近年國際間是十分流行的，事實上這部以十個故事組成的電影﹝其實只有九個可以在戲院睇到﹞，即使有部份以很另類的方式拍成，但基本上全都以情為主旨，令人看得很舒服，逐個講‧‧‧

林愛華《舊山頂道》，打頭陣既呢個故事，幾乎令我對林愛華重燃信心。兩個人在十年間的感情轉變，人物地點一樣，但心境上已經變得若即若離，此片把兩人在感情上的角力拍得甚為細膩，當中幾次挑釁、放棄和戰敗都捕捉得很準確。但可能係因為只屬於一個短故事，所以可以將那些情感既轉變拍得那麼有壓迫力。

陳榮照《路漫漫雞蛋赤赤紅》，這是一部很真實而又令人感到溫暖的小品，電影中一老人一中年都有著各自的承諾，老人要去搵一位無見好多年既老朋友，中年人要去派紅雞蛋，全個故事都以灣仔為背景。在全片既九個故事入面，我最鍾意呢一個，因為佢拍得當中兩位主角既快樂好真實，兩人雖然有錢銀交易，但兩人彷彿在過程中成為了好朋友。

黃精甫《清芳》，此故事把南丫島拍得像一個很安靜既小島，把一位失憶男和少女所發生既奇特愛情故事，變得特別清新。是要表達"要記得既，我都會記得"吧，這故事雖然沒有甚麼可歌可泣既愛情，但對於兩人所遇到既事，難免都會感到一份失落感。

麥子善《依然有夢》，這故事以《人間狗鎮》式場景拍攝，即是透明式場景，甚為大膽既嘗試。人類生存需要信念支持，即使植物人也需要有康復既夢想去支持。

張偉雄《遠望》，這故事表示人與人之間既關心的重要性，女主角自從母親離去後，便覺得活在孤獨的世界，但原來一直也有一位男士在遠方默默地看著她。這故事的感覺有點像村上春樹既短篇《四月某個晴朗的早晨，遇上100%的女孩》，當然故事是完全不同的，但也是以一段男女間既對話為主題。

袁建滔《紙皮爸爸》，很奇異既故事，就像在看Michel Gondry的電影，很low tech既科幻，兩位勁可愛既小朋友為此故事加左好多分，兩人穿著特製既衣服，坐上自製既太空船，飛上太空打怪物，拯救有精神病既爸爸。雖然故事有點犯搏，但當中有些位實在令人印象深刻。

林華全《獅子下山》，最搞野既一個故事，自閉少女一天發現獅子山唔見在隻獅子，原來隻獅子去左搵太平山。本故事籍一個咁奇想式既故事，講香港兩座大山及山下居民既歷史，甚為有趣。
楊逸德《最後一口價》，充滿時代感既故事，兩位靚女咩都要爭，物質主義之極致，男人都可以bid，爭到個人都爭唔到個心，賤男當道。

李公樂、司徒錦源《開飯》，很緊湊既一個故事，由一開始怒氣沖沖咁返屋企，幾兄弟姐妹亙相角力，再峰迴路轉地由阿爸阿媽打圓場，最後一齊煮飯食飯。當中短短既故事，已經俱備好多戲劇元素，情緒既推動和轉變，所以野都去得好快，要好專注咁去感覺。

很希望這種港產短篇集式電影，能夠在香港受落。總括而言，其實當中好多個故事如果拉長成一部正常電影，都會完全失去哂張力同埋緊湊既感覺，但現在以短片形式去表達，卻剛好達到最好既效果。

天水圍的日與夜 The Way We Are

終於看了《天水圍的日與夜》這部有不少好評的電影，這部電影自從在電影節首播以來，一直都得到不少正面的評價，可惜到正式上畫時，全港只得一間戲院作一日一場式既放映，有心睇都唔係咁易睇到，有少少諷刺既係，天水圍既戲院都無得放呢一部《天水圍的日與夜》，不過，我幾肯定就算有得播，大部份既天水圍居民還是會覺得這部電影甚為沉悶，原因後表，但絕對和觀眾質素無關。

這部電影講的其實就是生活，一個平凡港式家庭的生活，電影內既片段大家都應該熟口熟面，假期時在屋企hea足一日，去朋友屋企打機打牌，阿媽同鄰居異常地熟絡，阿媽闊綽地叫自己去幫鄰居，以月餅做正餐，等等既事例，或多或少都發生過係大家身上。難得既係這電影真係可以好平凡寫實咁展示出來，電視劇都經常有日常生活情節，但大多都拍得超現實，要將生活平實咁表達出來，並唔係講咁易，因為當中仲要含蓄地表達各人內心情感微妙既轉變。

話呢部電影接近真實生活，又其實有一點諷刺，因為當中有些片段可能大家以為好常見，但諗真一點，原來已經好耐無試過。最大既事例，就係一家人坐低食飯，唔駛用電視送飯，雖然係電影中我地見到佢地兩母子好似唔多對話，但好明顯可以感覺到佢地實際係好friend，好多野都可以放開咁傾，唔覺有咩秘密，呢種親子關係，用錢都買唔到。

呢一點不平凡既就係，佢地母子二人都樂天知命，縱使唔係大富大貴，但只要生活快樂，多餘既物資係唔需要既。值得一提，兩人既生命力都好強，佢地應該係屬於對環境適應力好強既人，佢地似乎好識得在現有既環境中找尋快樂，快樂其實可以好簡單。

你有壓力，我有壓力，電影內梁進龍一句不經意既說話，絕對值得大家反思一下。片中佢既老師陳玉蓮話佢情緒處理得好，有咩事都可以好冷靜，梁進龍講出一句，因為無事發生左而已。其實好多野，放開咁睇，其實都好小事，永遠都唔會有絕路，失去得多，其實都係因為要求得太多。

文首既時候，曾經話過天水圍居民唔會覺得呢部電影特別吸引，最大既原因，就係因為片中既就係佢地既生活，日見夜見既野，又有咩咁特別，值得去劇院睇？我住係元朗，同天水圍好近，都有好多住係天水圍既朋友，但從唔覺得佢地有咩問題。社會上成日講既天水圍問題，根本上就係俾人刻意放大，然後乘機抽水，最無良既其實係打造呢一個形象既人。

天水圍有三樣野特別多，屋村多窮人多南亞裔人多。屋村多實際上係全港既形象，沙田葵青等地咪又係咁多屋村，除非你係活係《四葉草》式超現實生活，我唔信你唔會無住係屋村既朋友，你又覺得佢地有無問題？窮人多根本唔代表人既質素低，人窮反而能夠提升生命力，人窮反而可以令人更珍惜自己擁有既野，踢一場波要既錢唔多，但我好肯定得到既快樂比去燒錢遊樂場推二百蚊銀仔多好多倍，一家人圍埋好迫咁食餐飯，一定開心過自己一個對住一部60吋既電視食鮑魚。香港聲稱自己係國際城市，竟然可以因為一個小市鎮有太多南亞裔人而形成一個問題？難道只有歐美係國際，南亞非洲等地就唔係國際？好老實講，我見過唔少南亞人都係好人，好多時係地鐵都以佢地既讓座速度最快，自己見到都感到唔好意思。更加值得一提既係，佢地好少向我地爭取甚麼福利，佢地多數只係要求平等對待，同大家無分別既係，只係想搵到食，可以養活到自己同家人而已。

呢篇可能講得太多社會問題，太少電影了，但其實都係想大家可以放低對天水圍人和少數族裔既偏見。

太空奇兵‧威E Wall E

舊年寫《五星級大鼠》影評既時候，一開始就話彼思大膽，勇於嘗試，睇完今年呢套《太空奇兵‧威E》，我真係唔知佢地下年仲可以點玩，到底佢地既創作力及勇氣，有無底線？

電影的頭半個鐘以上，是完全無對白的，只有一隻叫做威E的機械人係廢置左既地球四圍行處理垃圾。直至另一隻機械人Eva出現，才有一些"機械人式"既對話。故事既取材亦是極度大膽的，講述地球因為太多垃圾及污染，已經再無人居住，只剩下一些垃圾處理機械人，而當中亦只剩下一隻未壞，仍繼續工作，將壓成正方體的垃圾疊成一座座比摩天大廈更高既建築物。而地球人亦已全部移居住一隻太空船在外太空定居下來，在那架太空船上，所以事物都由中央電影控制，未來的地球人受到高度照顧，日常只需要坐在一張可以移動既椅子上，自小便被訓練成看著屏幕過世，連企起身行路都成問題。

根據艾西摩夫既機械人三大定律，機械人要以人類既安全為首要任務，但正如好多電影故事曾經預視過，過度既保護，其實係一種破壞。如果覺得《二十世紀殺人網絡》、《A.I.》難明，《威E》絕對係淺入深出之作。

電影當中其實亦道出了很多警世的訊息，第一，品牌效應，現代資本主義社會超級品牌橫行，連政府也要讓路，在《威E》這在世界，所有事物也是由一間叫B&L既公司生產，而負責處理垃圾既機械人威E，亦被設定到視B&L既出產為珍品，其他物件全部可視為垃圾。第二，過份依賴電腦，現代人不論工作還是休息，大部份時間都對著電腦，一天對著屏幕起碼十小時，此片所展現出來的過度依賴電腦既後果，相信不少人睇完都會怕怕。第三，垃圾既處理及環保，人類應該反省，無論電腦怎樣利害，最能夠破壞及挽救地球既，都係人類，減少製造垃圾，珍惜綠色植物。

電影本身亦充滿玩味，第一，威E睇i-pod，彼思係蘋果旗下既公司，賣下廣告唔算太過份，難得是似乎大家都好接受呢下Product Placement。第二，如果我無記錯，太空船艦長企起身行路那一段既配樂，正是經典級科幻電影《2001太空漫遊》，出現人類史上重大發展的時候，所播放的音樂，將人類重新站起來行路，視為另一次人類既大突破，諷刺味爆燈。第三，呢個純粹係我估，鬼佬名Bill同William可以係一樣，咁唔知Linda同Melinda又係咪一樣，在片中既品牌B&L，莫非係暗示緊Bill and Melinda？第四，就係點解B&L老闆個名，咁似美國薯仔總統既？

可以斷言，由《反斗奇兵》開始，彼思一直都"片以載道"，每一次都帶出幾個重要訊息，當中既訊息，唔似傳教式說教般難受，講既都係一些我們可能遺忘左既一些好基本既做人道理或公民責任。好開心我地呢一代及下一代可以睇到咁有意義既一系統電影，只希望大人係陪細路睇完之後，在大量買入該片既產品既同時，可以與小朋友一齊反思下，畢竟要尋找既正面又唔偏頗既教材，實在不易。

赤壁 Red Cliff

可以咁講，三國，這段歷史/古代故事對香港廿幾三十幾一代的影響力，是其他歷史/古代故事完全不可以相題並論。在小時候我們看電視播《三國演義》，滾滾長江東逝水，晚晚都聽到呢首歌，睇得熱血沸騰。還有大量港日漫畫，一些並不像《三國演義》，親劉備一派，以不同人物為主角，就像《蒼天航路》和《火鳳燎原》，讀者實行以不同角度投入這段歷史。最大影響的，應該是一系列由光榮出版的《三國志》遊戲吧，直接讓玩家置身於這一個亂世，還記得自己也沉迷過《三國志三》及《三國志四》，當中特別喜愛使用孫堅。簡單咁講，對於香港年青一代﹝特別是男性﹞，閒閒地講出魏蜀吳各方十位將領的各字﹝及特性！﹞是完全不成問題的，試問歷史上有那一段時期可以與之比美？

吳宇森是香港電影界神檯級人馬，《英雄本色》、《 喋血雙雄》、《喋血街頭》、《辣手神探》是永恆的經典，陽剛味十足，著重於描寫兄弟情義，就像三國故事一樣，為一般苦於無法展現英雄本色既現代小男人提供無限既幻想，有邊個未幻想過自己可以係酒樓既花盆拿出兩技手槍，再以一敵十。

今次呢部《赤壁》屬於吳宇森回歸華人電影之作，更以這場歷史上最聞名既戰爭為主題，一個擅長拍英雄兄弟情既導演，拍一個充滿英雄既時代，最怕係現代導演俾呢個超經典既題材反控制，失去哂自己既風格，除此之外，都諗唔到一個理由唔去期待呢一部將會是吳宇森的再一部經典作品。

據說《赤壁》是以較為忠於史實的《三國志》為藍本，捨《三國演義》而取《三國志》，可算係一個十分明顯既地方令旁人知道，這電影將有別於以往既電影劇，將以另一個角度去展現呢一個時代。

事實上亦証明了這件事，相信導演/編劇都假設左大部份觀眾都清楚認識哂三國內既人物，所以並不需要甚麼熱身，電影一開始便切入一場曹操打得劉備落花流水既戰役，從而引出一班十分出名既蜀將，而電影之後既主要時間，亦主要放在諸葛亮及周瑜的相交及曹操身上，比較特別既係電影用了不少時間去講孫權戰與不戰既鬥爭。

有人話，吳宇森在《赤壁》呢部戲，失去左自己既風格，無哂個種浪漫既英雄兄弟情。我並不認同，除左無左技槍之外，我覺得呢部戲還是拍得充滿浪漫情義既。單以第一場戰役去睇，劉備的士兵以肉身去阻擋曹操追兵，以讓平民能夠逃生，這一場戲不論係送死既士兵，還是係領兵既關羽張飛，都拍得十分感人壯觀。片內有兩段識英雄重英雄既戲，分別係曹操與關羽及諸葛亮與周瑜，相對而言，本片明顯地側重於後者兩人，這在過往的三國故事中是十分少見的。

這電影的文戲也是甚出色的，瑜亮兩人夾歌一段實屬精彩，金城武既幾場冷笑話雖然有一點唐突，但總算放鬆一下電影既張力，亦為電影角色派加多一點個人風格。

同樣係大型製作戰爭片，《赤壁》能夠將故事著重於人，並不似部份國內大導以壯觀場面壓場，實屬難得可貴。此片亦見到吳宇森在統領特大場面既能力，神檯級之名，絕對受之無愧。

文雀 The Sparrow

對杜sir呢位高手，我地當然比較高要求。一聽到呢部戲又係杜sir玩藝之作及要演繹香港中西區既情懷，立即想起另外兩部電影。

講到杜sir既玩藝作品，首推《熗火》，次選《放‧逐》，因為《文雀》呢部戲主講一班文雀，格局上較似後者，所以《放‧逐》就係第一部要比較既電影。

有睇過《放‧逐》既人都會記得幾場十分緊湊既熗戰，主要係無牌醫生屋企、餐廳和旅館三場。好多人都話《放‧逐》整體故事鬆散，但因為呢幾場戲，我地都覺得呢部電影值得一睇再睇。在《文雀》中，導演都營造左幾場比較搶鏡既偷野案，杜琪峰係呢部電影以輕鬆既氣氛去拍，幾場偷野案都配上輕快既音樂，場面亦盡量做到跳脫。但如果要比較兩部電影既經典場面，《文雀》便明顯及不上《放‧逐》了，很多地方都捉摸唔到想表達既野。

以人論戲，《文雀》四位男主角當然不能直接和《放‧逐》或《熗火》內的男角比較，畢竟級數不同，但角色性格實在不明，幾位文雀當中亦看唔出杜琪峰電影常見既男人情懷，實在可惜。杜琪峰電影少見女角色，有女演員都好少以靚樣示人，今次林熙蕾難得有得著到咁靚，但就要在片中跑來跑去，似為做導遊多於演戲。

另一部要比較既電影，就係2005年既《神經俠侶》，由阮世生導演，方平及爾冬陞監製，吳鎮宇、陳奕迅和容祖兒主演的電影，這電影的主要場景係灣仔區，舊區情懷都係賣點之一，但無《文雀》咁hard sell，但反而拍得灣仔更加人性化和有味道，而該電影的內容亦較有意義。

我一向都期待杜sir既遊戲之作，可惜此片有點捉不著主題既感覺，電影過份輕鬆，引致失去張力，實為失望之作。

深海尋人 Missing

徐克真係超勁，早幾年《七劍》我原本都想捧場，但最後因為驚徐克老士和唔想睇黎明而放棄左，後尾終於係電視睇到，真係有點兒後悔當初無入場。為免歷史重演，一早已經決定左下次要入戲院睇徐克既戲，但係天意弄人，有追開呢個網既人都會發現，我同獎門人係極少見恐怖片既，偏偏徐克既新片，就係有恐怖成份，但因為同時有張震及張震嶽演出，令到吸引力再提升，所以引到我地去睇。

睇完之後，我既感覺就係，呢部戲其實有足夠既內容去拍三部甚至四部電影，故事真係超級估唔到，集合左精神病研究、自然生態、鬼神和愛情四大主題，可能因為徐克屬於負責任型導演，講咩都要有頭有尾，所以呢部戲內容真係勁充實，但觀眾消化到幾多就係另一回事了。

在四大主題當中，以精神病研究為最主要，如果當整個故事鋪排為一隊足球隊，精神病研究就等同穩健既後衛，守住全個故事既骨架。鬼神便是中場，提高左呢部戲既娛樂性，亦增加左觀眾既投入感。愛情和自然生態便是前鋒，上腳時間雖然少，但係屬於機會主義者，甚為搶鏡。

可能因為我地少睇鬼片，同埋奧海城百老匯既音響實在太勁，我地都覺得幾得人驚。但係呢部戲最估唔到既就係故事去到尾段竟然咁反高潮，人物及故事完全大調亂，睇少三十分鐘真係等如睇左另一部戲。

呢部戲演員甚多，李心潔已經再無驚喜可言，梁家輝出鏡少但搶鏡，但張震確實做得很吸引，精彩。

整體而言，呢部戲既敗筆係過份認真及豐富，好考驗觀眾既消化能力，但確是一部故事花心思及製作精良既本地大製作。

青苔 The Moss

唔係講笑，呢部係本年度到目前為止，個人認為最好既電影，不論從故事、演員、張力去考慮，都屬於極度可觀。

電影主要以深水步和大角咀舊樓區一帶取影，講述一班邊緣人，當中有洗唔到底既古惑警察、非法妓女、乞兒、本地及南亞裔既黑社會暴徒等，佢地全部都不屬於典型香港人給外界既形象，但他們全都是確實地生活在香港，在我們的身邊維生。

余文樂所演既差人，重古惑過古惑仔，呢類角色佢已經做到好似度身訂做咁，但難得既係故事既設計，令佢真係完全表現出一個不斷在邊緣中踩鋼線，不求成名，只求生存既形象，佢同冼色麗既一次對話，完全將佢，甚至今部戲既所有人既內心講左出來。冼色麗問佢，點解有時係警察，有時係雞蟲，有時係古惑仔，余文樂答得好快，佢話，都係搵食ja。細心諗下，出賣肉體既冼色麗，搵命博既樊少皇，對外掃黃，實質叫雞，返到屋企變慈父既曾志偉，黑社會大佬廖啟志和邵音音，四出搶劫既南亞裔人，佢地全部都做緊一些好危險既工作，但背後都係為左自己，為左家鄉既親人而去犯險，余文樂和冼色麗既同一次對話，亦都講到，要相約一天去海邊，將大家背後既故事講哂出來，可想而知大家背後都承擔著無數既重擔。

故事既內容其實十分黑色幽默，當中有少少唔合情理，但整體內容絕對令人再三回味。電影一開始邵音音個肥仔去叫雞，混雜著曾志偉一班警察去掃黃個場戲，已經開宗明義咁話俾大家知，呢部戲將會係幾咁露骨地去挑戰大家既道德觀及忍耐力。

樊少皇絕對係這部電影既異數，如果要問我全片最犯博既地方係邊度，我一定會話係樊少皇既不死身，佢俾車撞唔死，俾人打唔死，俾鎗射都係唔死，真係超現實到爆。但如果再問我覺得邊個角色最搶鏡，又係樊少皇，佢既乞兒造型已經夠特別，加上連場忘命既打鬥，都未係佢最吸引人既地方，佢最勁既地方係，但似乎已經忘記左痛楚，無論點樣俾人打，佢都只係話自己無哂力，而唔係話痛。加上佢又始至終都係咁善良，佢既暴力只係源於佢保護自己所愛既決心，除此之外，佢不斷咁俾人利用，其實都幾可憐。

郭子健舊年既《野良犬》係其中一個慘被低估既好電影，今年呢部《青苔》拍得更好，希望可以叫好又叫座，唔好再錯過呢一位香港既新晉實力導演。