反斗車王 Cars

此片為彼思與迪士尼復合後的第一部作品，不得不大讚彼思在製作動畫認真之餘，對故事性亦這麼重視，此片的感人及意義比很多真人電影還要出色。其實遠至迪士尼的老舊卡通片或彼思的幾部前作，故事中都總有一些分離及無法逃避現實的傷感位，只是我覺得在這方面的處理上，彼思的進步實在是不少， 此片的手法無咁造作和感情亦較真實。

有睇過《人細鬼壞》廣東話版既人都會知道，係葛民輝既配音將呢部戲起死回生既。今次呢部《反斗車王》重要係軟硬齊出，觀眾未入場都一定已經有哂心理準備，部戲既配音一定係勁精彩。入場後，軟硬固然係永遠都無令人失望，但卻有很多意外驚喜，原來除了他兩人及林嘉欣外，其他的配音班角亦是十分利害，鍾景輝、黎彼德、朱咪咪、大口青等等等等，表現極度出色。我很好奇誰是負責這片廣東話的製作公司，在選人及撰稿上，都十分出色，以軟硬為賣點，誰知那班綠葉更為搶鏡。

講番部戲既角色設定，原先諗住今次呢部戲得幾架車，無咩特別野，心諗今次彼思係商品呢方面失左策。點知原來又唔係，睇完部戲就知，架架車既外型同心理都好配合，主角閃電王在造型上反而有點不及其他車，我諗無咩人會有異議，那架講意大利文的換胎車肯定是最令人印象深刻的角色，他大展身手那一場更是令全部觀眾嘩然。另外閃電王的大貨車及其他老爺車亦甚可愛，其中甚有趣的是那架由黎彼德負責配音，經營汽車美容公司的車，他每次出場都是噴上不同的顏色圖案在身上，就像《花樣年華》內張曼玉每次出場都有唔同衫著咁。

無辦法，我上畫第一日就去睇，睇完之後就不斷叫人去睇，因為實在太正。當一部戲的內容製作都咁正既時侯，與此同時，在片頭及片尾都有精彩既驚喜片段，唔去捧場真係好可惜。

新紮師妹3 Love Undercover 3

其實一開始對呢部戲都無咩期望，都預左係低低能能搞下笑。點知愈睇愈驚，完全係胡鬧亂來，電影初段不斷大搞誇張剪接鏡頭，就像十多年前電視台那些低級趣味節目的手法。原以為今次馬偉豪咁大膽，全片都保持呢種“經典”地低能的拍法，誰知在中段開始便變回一貫正常手法。

想當年《新紮師妹》，無厘頭之餘還有一點常理，今集的戲情簡直係完全胡來，要低能又不夠徹底，很多角色的行動也令人不解。演員的演出亦令人失望，薛凱琪完全無戲，不斷扮可愛亦令人反感。鈴木仁的演出就像不斷在拍硬照廣告，完全無戲，實際上他的角色在片中亦是可有可無。其他角色也是在落力地攪笑，可惜劇情實在太差，另外亦希望黃浩然快點認清自己的方向，要攪笑便盡情攪笑，要型就要勁型，不要再浪費自己的光陰。

對於鈴木仁，我有一些奇想，與他的演技及戲份有關。當此片的製作班底或老闆出左錢請左佢到香港，導演一拍就發現呢條友仔完全唔掂，一味識扮型仔發電，在唔用佢唔得和拍攝期有限的逼不得已情況下，唯有大改劇情，另安排一個花瓶角色給他，原來的劇本亦要大改。如果實情真的是這樣，我想我可以考慮原諒這部劇的製作人員。