破事兒 Trivial Matters

破事兒，北京話小事一件咁解，即係類似廣東話既濕碎野。電影中有七個小故事，正如戲名所言，全部都是小事，問心個句，在這時代巨輪下，唔係期望我地做到件大事出來咁搞笑下話？

七個小故事，彷彿都想撞破逃避現實的人，彭浩翔，搞到人地家破人亡，婦離子散，朋友都無得做，你玩得咁大呀？

交功課式既性愛，每次上床都要抱著考試既心態，只管交足功課，做齊所有以為對方會興奮既野，可惜卻從末真心問過對方既感受。我倒擔心一些結式婚一段時間既夫婦，感同身受，乘機發難，不過肯講清楚都算有轉機，我相信大部人都好像戲中兩人咁樣，始終都係唔覺得自己有問題。

朋友到底係點樣計算？朋友多但係唔真心，還是相反好？有時朋友之間既意見，係咪真係句句真心先？唔好睇小一件小事既決定，因為隨時有好多你估唔到既野跟著發生，命運便是在這些地方左右著。

成日話而家呢一代做野唔認真，睇下係咪好似余文樂做殺手咁樣？殺人應該係一件大事，但係佢卻被一連串小事所影響，最後更因為夠鐘收工而放左陳子聰一命。為咩？殺手都係打份工，夠鐘就梗係收工吧。

幼稚，又如何？陳冠希溝鄭融所講既野，極其低能，陳冠希所講自己既偉業，固然得啖笑，但講真，你又會點樣証明自己係一個好人？難道你話自己會賣旗？我諗係話自己會扯旗比較受歡迎。

我地做人既目的係咩？為左愛情？為左搞野？

陳奕迅為左搞野，千方百計引到女朋友同居，之後再做哂研究搵節日，搞咁多野，撞哂鬼咁樣，都係為左搞野。

一個外太空星球上既人，睇番自己既歷史，竟然發現自己星球既命名和一個中學生為左女朋友而講既謊話有關。關智斌既故事正好話俾大家知，細節改變命運，小事都可以化大。我地就係咁無聊，但係邊個知將來會點？

甚麼是愛情的感覺？杜汶澤和妓女搞完野，妓女洗完白白，想叫杜汶澤幫佢部電話充值，杜汶澤正換衫走人，兩人坐在床尾，妓女把頭倚靠在正在理頭苦幹打電話的杜汶澤的膊頭上，兩人一言不發。幾分鐘前，兩個人還在進行性交易，現在，男方正不收分文地幫女方做野，女方默默地等待，可能這是近年其中一幕最浪漫既畫面，亦表現了的我們不斷逃避愛情下產生既奇特愛情。

一部電影竟然搞到咁多個問號出來，係咪玩挑釁呀！

安娜與安娜 Anna & Anna

之前睇《神探》講精神分裂，幾日之後睇既《安娜與安娜》更利害，成個人分裂左出來。我地成日講，如果當年無咩咩咩，而咩咩咩，而家就會點點點，呢部戲就將呢個如果實體化，真係變左兩個人出來，各行各路，但係事實係咪真係會點點點呢？

故事中的兩個Anna，在各行各路後，都覺得有所不足，對當年的決定感到後悔，在一次機緣巧合，她們發現了對方，更決定交換身份，可是這又如何？最後她們還是各自行回當年所選擇的路，縱然後悔，但路還是繼續走。

這是一個有趣的故事，但可惜發展得唔係咁好。導演林愛華寫故事能力唔錯，表現到現代人既愛情觀，可惜總是拍得不夠張力，戲味唔夠，觀眾容易分心。當年《十二夜》，因為故事有趣，加上陳奕迅、張柏芝和盧巧音等人做得入哂格，所以令人印象深刻。到了《尋找周杰倫》和《大丈夫II》，故事都係有趣，但係太散，無咩焦點，皆是可惜之作。

神探 Mad Dectective

這是一篇遲來的影評，距離上映都已超過一個月了。回想這故事，心中有鬼，實在可怕而真實。

戲內描寫的那一種鬼，並不像我們傳統認知的那種情神分裂，因為那些鬼並不是支配了身體，而是內心的某種性格既分解，而這種分解，在潛意識上指導著行動。這是將真實擴大的一種表達，我們返工一個樣，放工一個樣，對屋企人一個樣，對朋友一個樣，表面溫文有禮，火爆的時候殺人放火，我們不認識我們的潛意識，但我們的潛意識左右著我們所有行動，這是一個避無可避的宿命。

潛意識生成於我們由孩童至今的生活經歷，從戲中的安志杰，我們看到他那膽少鬼及狡猾鬼的誕生，還有他及林家棟本性的拋棄。生活經歷產生製造潛意識，同樣地，環境亦製造潛意識。
我們都知道很多軍人，他們在進入戰場前，在自己的國家是一個仁慈的人，但在戰場，魔鬼自動誕生，殺人放心，殘害無辜，有些退伍軍人，在回復和平後，也唔明白自己點解會做過那些殘忍既事，甚至唔認為自己做過。

套用呢部電影既鬼，我會咁樣描述鬼係呢個軍人身上既誕生及拋棄。在進入戰場，當佢第一次殺人既時候，殺戮鬼誕生。當佢第一次進入那些平民的家，看見到些年青既少女，最重要佢地完全無反抗能力，咸濕鬼誕生，這兩隻鬼在戰場為佢保平安。和平了，士兵退伍，當他們回到家園，看見自己可愛而無知既女兒時，殺戮鬼及咸濕鬼便被收藏至內心中的最深處，靜靜地等待‧‧‧

劉青雲在訪問中被人讚佢好演技，將一個能夠看到別人內心的鬼既角色演活，佢話，佢唔算利害，將內心有鬼呢樣野諗出來既人，即編劇韋家輝更加利害。

Oh, I agree.

野良犬 The Pye Dog

都已經唔記得等左呢部戲幾耐了，可能從舊年開始吧。舊年上既《父子》和今年上既《野良犬》加埋下年上既《長江七號》，後人會將它們稱為一老一少三部曲嗎？三部戲雖然唔同時間上，但《野良犬》拍完好耐，《長江七號》拍左好耐，基本上唔應該懷疑佢地係跟風既。

呢部係導演郭子健既第一部戲，拍攝手法上有小小新意，主要係開頭介紹個度，反而故事及對白更見其功力。唔睇唔知，呢部戲都有好多明星，出得一陣有李麗珍、林子祥、張國強，當中以張國強既殺手最型，有機會俾佢講佢個段型到爆既對白，相信導演獲得幾大既自由度。

戲內的小朋友自小無父親，又唔多鍾意講野，講佢同陳奕迅個段感情其實幾感人。陳奕迅第一次見到佢變身打同學友個陣，可能諗番起自己，所以有同嗚。反而陳奕迅個角色原本係小小自悶，但對住林宛呢位老師，竟然咁鬼主動，又好似有少少唔夾，可能又係有小小獨行殺手既同嗚吧。

呢部戲有幾個位都幾感人既，三人搭建既表演台，陳奕迅著燈個下，雖然簡陋在小小，但心意和暖意度滿分。壞人也有好的，舊了的物件也有重用的價值，荒野的犬亦可以是善良的。

夏天的尾巴 Summer's Tail

又一部令人妒忌既台灣電影，無可否認，台灣係比香港多好多以年青人為主既電視劇和電影，當然，當中有好多係低能白痴到見到都驚，但亦有一些是質素高，值得回味既。反觀香港，主角還是那班中男中女老男老女，最值得回味既電視劇，係2000年港台既《青春Y2K》和《Y2K前的暑假》，無記近年都有拍過一些學生片，但那些內容，比較似科幻驚嚇片，名我都唔想提，總知就係幾塊葉個D。

青春電影絕對係台灣比香港優勝得多，應該是由《籃色大門》開始吧，一發不可收拾。台灣青春既特色係充滿鄉士味，拍攝地方多在鄉郊，絕對係青草地溪水旁，將青春味道發得更濃。可能呢個就係香港少青春片既原因，你睇台灣、日本和韓國既青春片，背景都是在半發展既地方，香港人便是少接觸鄉郊，總是活在城市，造出這麼多黑幫、警罪和倫常戲。其實香港都有很多地方可以取景架，元朗都仲有好多自然環境架。

講番部戲，患病音樂少女﹝《太陽之歌》？﹞和幾位同學，各具特色。無錯了，青春片便是有這種率性，主角們仲細，仲可以無後顧之憂咁率性而行，其他片種既角色如果咁樣，就會俾人話幼稚。但率性而行，都要性格立體，這電影故事簡單，加上有歌附和，感覺上睇得甚為痛快。

可惜此片在香港實在上得太少戲院了，一部青春片，幾位主角在台灣都算有名氣，卻落得像一部歐洲藝術片般的發行方式，實在可惜。

兄弟 Brothers

好早之前，我曾經對呢部戲有過期望，但當上畫後睇多左介紹，便開始無哂期望了。這類一部戲入面有咁多個明星既電影，通常分三類。第一類，以更霸道既故事去運用呢班明星，例如《無間道》，任你幾出名都好，都只係一個角色，演員做好本份，便能成就一部好電影。第二類，玩味型，故事可以係少少弱智、少少唔合情理，最緊要係好玩，好像《家有喜事》和《Ocean Eleven》，演員可以玩下野，娛人可以娛己。第三類，在眾明星中找一兩個做主角，其他明星做一些不太配合既角式，未能入型入格，以致出現怪相，原本認真的故事，為了分配戲分，變得不知所謂。

好不幸，呢部戲屬於第三類，如果將個故事變得極度無厘頭，佢可以變做第二類，甚至成為一部大受歡迎既電影。故事本身係認真既，最後亦落得咁壯烈既結局。可惜錯在中間既發展，同一時間講得段兄弟情，可能太貪心了，兩頭唔到岸，電影既格調亦都唔配合。最初我一睇黃日華和湯鎮業既黑社會造型，我係幾興奮既，又型又怪，可惜只限於造型，黃日華有少少睇頭，佢上半部既造型和對白都夠奇怪，下半段即係當開始要保護陳奕迅個陣就無哂料到，完全變哂一個普通人，浪費了之前既設計。湯鎮業就更加係失望，如果可以加插一下佢既故事其實仲好，佢本身有能力扮色情狂變態佬，又做一個壞人大佬既仔，絕對可以將佢寫成一個極度邪氣既角色，絕對係一種浪費。

劉德華和林家棟做一對有少少搞鬼，但係都破到案既警察，其實呢類玩野警探係黑幫片經常都有，只係因為呢次係劉德華，加上其他角色做得太平淡，先令到佢感覺上比較好。苗僑偉都只係普通，苗僑偉只係做到沉實，但未見到佢既狠和絕。陳奕迅就有點用錯左既感覺，發揮太少。

總結咁講，對一部大卡士既制作，我們有較高要求係應該既。拍得唔好，就係資源錯配，浪費人力金錢。

色，戒 Lust, Caution

呢次係我第一次睇李安既戲，人地話佢善於將感情含蓄地表達，講故事多於玩技巧，睇完呢部戲，我都幾認同這些意見。我無睇過張愛玲既原著，但聽講係一個短篇故事，將一個短篇變成長篇，本身有難度，但因為身處真正歷史動亂時期，取材較為容易。梁朝偉呢次真係好野，表情動作對白都表現到佢係一個極度小心和心理失衡既人士，佢落車入屋個下動作，有理由相信係經過設計。

睇見戲內那些反日團體既幼稚，真係令人心痛。在這些反日組織，高層人士既無能及舉棋不動，導致忠誠既低層只落得白白犧牲既下場。歷史一直在重演，據說李安唯有在台灣看此片時落淚，是因為台灣的民主同樣係咁幼稚，就像永遠停留在口號式呼叫，以熱情去感動人，而不是以實政去收人心。香港何嘗唔係，甚至更甚，那些號稱民主派的人士，為了收買人心，開出比共產黨更加共產既空頭支票，在得到市民支持後，便挾持民意去和當權者去爭取自身既利益，民意只是工具，只是隨時可以交易的籌碼，空頭支票永遠都只係一個口號。

第二個傳說中令到李安哭的原因，是國人對歷史的認知。莫講汪精衛偽政府了，他發現台灣人快連中華民國也快忘了，大家也被教育了。

其實，我們都應該哭。

出埃及記 Exodus

數數手指，原來這已是我看彭浩翔導演的第四部戲。當中最得我歡心既，始終都係《買凶拍人》和《公主復仇記》，那些破格的故事及輕快的節奏，實屬可遇不可求。唔知係真有料定係抄得似，《伊沙貝拉 》和《出埃及記》都充滿大師級既手法，長鏡既運用、鏡頭擺位、佈局、顏色等都經過安排，十分利害，但可能過多了，容易令人吃不消。另外相信是為了配合劇情，近兩部作品都無左早期作品既輕快。

故事一向是彭浩翔既強項，今次亦唔例外。神秘女人組織要殺盡男人固然充滿玩味，但最令我印象深刻既，反而係一句說話。任達華係劇面引述一句佢初初做警察時聽到既說話，就係當一樣係係離譜到一個地步，就算佢係真，都無人會信。例子就係警察局入面有蛙人打犯或者女人要殺哂所有男人，都係一樣咁無厘頭，都係咁難信。

這其實和人既接受能力和想像力有關，當眼前發生既事和我們既認知相差太遠時，我們內心便會自動將這些事隔離，視而不見或自欺欺人。古往今來，都唔知幾多科學家和哲學家，因為新思想新發現而被殺死。亦有幾多家庭，因為接受唔到年青人既狂熱，而攪到家無寧日。

我好大膽咁講，如果大家都提高自己既包容，咁世界會和平好多。

巴黎戀曲 Love Songs

《巴黎戀曲》是我們在這個夏日國際電影節的唯一節目，香港一年有幾個電影節，有最出名既國際電影節，現在既夏日國際電影節，遲下有亞洲電影節，重有一些較小型既電影節，希望重質又重量吧。

《巴黎戀曲》入面唱左好多歌，當然係法文，可能係中文翻譯既歌詞無咁傳神，又可能係我唔夠字幕快，所以只係覺得那些歌旋律輕快，並沒有深刻感覺。

故事當然係講愛情，三人行既時候我腦內閃起《祖與占》。第三個加入呢個關係既唔一定係壞人，唔一定係破壞者，這個三角關係，少了任何一角都會出事。

女主角死後，男主角迷失的那段日子，表達得好實在。開始既時候，悲傷不是太大，之後變得對所有野都無所謂，不懂拒絕，最後一下子重拾感覺，去到墓前一段，男主角好夢初醒，像重獲新生一樣，整個過程其實幾感動。

戲內的巴黎不像我們常見的巴黎，經常下著雨，陰天，其實更像倫敦。

導火線 Flash Point

舊年無睇《殺破狼》，我一直都覺我好可惜，因為香港現在真係少左呢類陽剛味超級強既電影。今年因為特別原因，可以係太子既豪華戲院睇呢部《導火線》，算係一次幾特別既經驗。

豪華戲院是舊式大型戲院，即係有超過三百個位個種，一個院大到可以夠其他戲院分造三個院個種，相信有咁上下年紀既都會知道係邊種。十幾年前，當香港電影還是十分強勁既時侯，香港各區都有好多呢類咁大既戲院，稍為想像下當時爆場既情況，都覺得好鬼勁。但今時唔同住日，呢類戲院好多已經關門大吉，新型集團式迷你戲院提供觀眾更多既選擇和更舒暢既環境，連帶入場人數近年急遽減少，大戲院實在係好難做，新一代既年青人甚至覺得這些舊戲院是專播咸片，即係一張飛睇一日個種，實在可悲。

以我星期三晚入場為例，全場不足廿人，空置率達90%以上，打散咁坐，一個人可以坐兩行。但係估唔到，在這廿人中，竟然看到一些平時無咁常見既觀眾。除了數對情侶外，其他都是單身男性，年約三十至五十歲，外型就像旺角某些商場內賣四仔賣老翻既阿叔，原來，他們也是影迷。佢地睇睇下戲，可以旁若無人﹝雖然真係無咩人﹞咁食煙，原來，他們只係造緊十幾年前已經開始做既野。入場睇戲，食番幾支煙，係佢地細細個時候已經係咁。今時今日，只有呢類戲院才可以容許佢地咁樣做。此時此刻，我幻想，當一間又一間舊式戲院結業時，這班影迷，都會到現場抽一口煙，作為一種儀式，為了這間即將結業的戲院和失落於茫茫人海既自己。

舊戲院加一部B部片，好容易聯想起昆頓塔倫天奴與羅拔洛迪格斯的《Grindhouse》，亦即是《索女．喪屍．機關槍》和《玩命．飛車．殺人狂》，好可惜，我無睇呢兩部戲。但係當我一聽戲入面呂良偉一出聲，我已經絕對夠膽講，《導心線》既CULT片指數，絕對可以比得上佢地，甚至更強。

暴力血腥噁心誇張打極都唔死，我實在唔識形容，總之就係拍案叫絕，甄子丹和鄒兆龍最後那場打鬥，真係超勁，竟然可以打咁耐，當時我個種感覺就好似睇一套四仔，個男主角攪足一個鐘都未攪完咁，無錯，就係挑戰底線，挑選觀眾既底線，要打就要打到夠，打到死，唔要偷工減料。嘩，玩到咁絕，正。

呂良偉雖然唔係第一男主角，但係佢係入面既誇張演出，真係夠哂味道，出哂位，如果少左佢絕對會大為失色。

葉偉信導演，我雖然還會回味你的《朱麗葉與梁山泊》和《爆裂刑警》，但此片展現了一些近年港片所無既野，確是難得。

五星級大鼠 Ratatouille

睇彼思一年一部既動畫，似乎已經成為好多人既例行公事，期望當然愈來愈大，難得彼思更夠膽作出挑戰。

講起煮野食既電影，香港人一定會諗起《食神》，一定記得家燕姐食完周星馳煮既叉蛋飯個種感動。講起片通，又咁上下年紀既又會諗起《伙頭智多星》入面味吉陽一煮野食，細過睇完一定會覺得肚餓。

電影同片通都做過食物電影，咁《五星級大鼠》有咩咁大膽？第一，用最噁心既老鼠煮最出名既法國菜，不過，米老鼠都咁受歡迎，無咩特別。第二，就係 佢示範左點樣去形容味道，不同材料有不同味道，原來混合調教得宜，係可以產生一種與別不同既味道。以上呢個咁簡單既道理，係人都知，不過唔係全部老鼠都知，當一隻老鼠形容俾另一隻既時候，原來佢係會咁樣去表達。效果如何我唔講，但係我欣賞個份嘗試既心。

近排電視有得一部叫《Hell Kitchen》既遊戲節目，大大咁增加左我對廚房既認識，而對比返呢部《五星級大鼠》入面既廚房，就會發現《五星級大鼠》模擬得好真實，一個廚房分成唔同既部份，電影入面都應有盡有，扮得幾逼真。

好多人話呢部戲睇食物之外，其實亦同時比喻緊電影業。廚師和食評家的關係就像電影製作人員和影評家的關係，如果無人生產，評論家自己都自身難保，但偏偏對作品最多批評既又係評論家。戲入面既食評家話，挑骨頭比欣賞容易及受歡迎，最後佢才發現，學會欣賞，尊重別人，再學會分享，把最好的介紹給別人，才是最高境界。

彼思今年既功課，觀眾睇既時候心滿意足，走左之後又有少少得著，再一次滿分完成，好野。

不能說的．秘密 Secret

除左利害之外，我只能夠講可惜，因為這是一個不能說的秘密。

周杰倫除了是本片的主角及導演外，亦是本故事的原創者，編劇則是杜致朗。杜致朗係香港人，簡單咁介紹，之前編過《江湖》及《霍元甲》，題材都幾廣泛。

點解要專登講原創者和編劇先？因為此電影的鋪排實在出色，好坦白講，包括我和女友，我相信好多觀眾老早便知道係有少少古惑，但偏偏又有幾下係好似要推翻那些疑點。我今次睇得勁專心，我幾乎可以肯定，最早和最有機會可以睇得穿全個故事既地方，就係桂綸鎂教周杰倫個度，如果有人可以係呢場之前，已經可以清楚估到條橋，個位人兄真係勁聰明。

可以將個故事包到咁精密，真係要講一聲利害。可惜之處，係我唔好意思係度爆橋，因為真係爆左就無哂驚喜，即時減分，係度要多謝哂所以之前話俾我聽呢部戲好睇，又肯保守秘密既人。要再講多次利害，這電影竟然將一個故事上的秘密，變成一個現實生活中的秘密。周杰倫你好野，竟然可以算得咁準。

睇戲既時候，有一個位我真係忍唔住想拍手掌，拍手掌當然唔係因為兩位鬥琴者技術之強勁咁簡單，無錯，我想講既就係鬥琴，即係Hip Hop友最鍾意既Battle。係人都知，Hip Hop友最鍾意Battle，Rap有Battle，Sratching有Battle，Breakdance有Battle，Battle可以講得上係和Respect一樣，都係Hip Hop精神軸心。想像下將琴換成咪，兩個人你一段我一段，那位學長變成DJ，簡直係睇緊Eminem既《8 Mile》。我最初諗住呢個一定周杰倫既主意，但諗諗下又覺得可能係杜致朗既主意，點都好，掌聲都係屬於佢地，竟然夠膽死將Battle放入呢部充滿古典味的浪漫電影，個效果竟然係咁好，而最利害之處係，呢段並唔係特登加入去俾周杰倫演野咁簡單，只係對故事推進有實際幫助，又係秘密，唔講得。

作為導演處女作，此片實在係出色之作，故事細密，拍得有起承轉合，掌握唔同既氣氛既亦很好。此片實在值得一睇。

哈利波特 - 鳳凰會的密令 Harry Potter and the Order of the Phoenix

將一本厚到打得死人既書，拍成兩個多小時既電影，故事內容是必定豐富的，問題是怎樣去取捨，我無睇過原著，亦無睇過第一、二和三集，是一個半途出家的觀眾，事前聲明，我既評論，絕對係不可靠。

鳳凰會，我並唔知呢個會係前四集有無提過，如果呢個會係今集先第一次曝光，草草幾句，加張原創人相片，就咁攪掂，連佢地做過咩都唔係好提，咁既出場就實在係太無威勢了。

如果我係由第一集開始睇，睇到而家，我相信我會對哈利再俾佢那些壞同學欺負覺得厭惡，哈利在長大，他的朋友都在長大，但那些學校的反派智商還是像一個低能，壞學生去到呢個年紀，就算唔販毒開片，都應該稍稍表現一下對張秋或妙麗等女主角有非份之想。可惜，作者在照顧主角的長大時，竟然忘了這班可憐的壞份子。

有無人知，到底鄧不列多好打，定係佛地魔好打？講到呢個佛地魔咁鬼勁，但係都好似只係同鄧不列多打成平手，如果加埋其他鳳凰會既人，咁佛地魔重有得企？

每當變幻時 Hooked On You

唉，這是一個講足十年的故事，講一個港女由少女變成中女。

我唔係女人，唔知道羅永昌導演到底了解幾多女人心事，但從這部《每當變幻時》和前作《天生一對》看，我想他是真的成功擊中了女性心靈上的一些神經線。

其實係好多年前，一部港產片入面已經講過，女人愈老愈驚，要求愈老愈低，耐性愈來愈少，此片將此概念延續開去而已。今時今日，或者從來如此，有才華和幸福總係唔係咁容易同時發生係一個女人身上，套用《信報》原氏物語和國金外望的術語，單身大長今的另一事例。

各位大長今身經百戰，日理萬機，合心水既男士，不是很早便被落單，便是拖著一個可以做佢個女既女朋友，妳話點可以唔愁？

另外呢部電影和《老港正傳》及《女人本色》一樣，話俾人話有紀念回歸十年既意義，個兩套我都無睇。《每當變幻時》無咩政治味道，主要係將一些個別事件作放大演繹，表現平常人在當中的際遇。如果俾我期待一部講港人回歸十年既電影，我首選陳果。

跟蹤 Eye In The Sky

人在做天在看，世界上有兩種人叫狗仔隊，一種壞人最驚，一種藝人最驚，幾年前的港產片《A1頭條》講過後者，今次這部《跟蹤》講前者，叫做天上的眼(Eye in the sky)。到底天係咪真係有眼？壞人最後係咪一定會受到制裁？

天空有時都會俾污雲阻擋，看少了一些人間事，讓壞人有機可乘。既然係咁，一班人便成為天上的眼，負責看一些天空可能看不到既事，即是監視。監視的權力、限度從來都是人權的大議題，被監視的人尚未證實有罪，為何要被一班人知道哂生活既一切？減去善惡的主觀感覺後，警察監視別人生活和戲中梁家輝一邦人偷窺對面屋女人換衫無分別。那麼，善惡是由誰去決定？

社會上如果出現過份的監視，便會出現人心惶惶的情況，生活無哂私隱，人與人之間無哂信任。在《有妳終生美麗》內，數學教授便經常害怕被人監視，想像一下如果情況發生係自己身上，便會明白將一切公開的可怕。任達華係戲入面講得好，佢地只係負責監視，唔負責分析。邵美琪都講得好，一單case還一單。幾專業，希望香港警察真係咁樣。

此片為銀河王牌編劇游乃海第一次執導，繼承銀河作風，唔好要求故事咁有邏輯，最緊要係以有效既方法講到想講既野。以氣氛而言，此片簡直係十分緊湊，片長90分鐘，但看來覺得更短更快。在那些跟蹤場合時，我簡直投入到覺得身處control room，好想同邵美琪一齊講粗口，那些快、慢、長、短鏡的交替感記一功。

可能銀河入面既人都覺得，那班演員實在用得太多，所以在近幾部作品都喜歡搞一些特別的形象，今集就有任達華大肚腩和邵美琪講粗口，不過邵美琪既演出真係好唔自然，有點失望。

綁架 Kidnap

與其說這電影是導演羅志良的前作《救命》的再版，倒不如是鬥智版《怪物》，三部戲都有林嘉欣，都係兩女大博鬥，但《怪物》和《綁架》相似在兩位女角都是為了保護家人最愛，發揮出極限的能力，而《救命》則比較係為了自己。

綁架綁錯人呢條橋可能係參考左《天國與地獄》，但除此之外，故事發展及意義都完全唔同《天國與地獄》，所以算不上抄襲。片中內地富商的造人處世之道，殘忍但現實，算是將香港一些怪現象縮影入片內。張兆輝個角色比較特別，有點兒似《救命》入面既廖啟智，但張兆輝個角色比較溫柔，中和返兩位女主角既強剛，佢既死雖然係一早預左，但估唔到咁震撼，幾好野。故事較為美中不足的地方是，片內所有警察除了張兆輝外，全部都係無咩料到，相信現實中既香港警察無咁差，咁做係可能想特顯被綁架者屋企人報警後的無助。

呢部電影對林嘉欣既演技無咩考驗，希望佢可以走出呢個位，觀眾反應雖然好，但係都唔好困死自己。我未見過阿媽俾人綁左個仔，但係劉若英既反應就真係好激動，我唔敢講係咪誇張左，但對於佢係得知兒子後既唔同階段都俾到明顯地唔同既表情，就深感佩服。

故事好，但係電影中有幾段直升機鏡頭就顯得有點格格不入，雖然係警察捉綁匪，但唔駛做到咁大路。

加勒比海盜：魔盜王終極之戰 Pirates of the Caribbean: At World's End

有興趣可以先睇我對第二集既感想，當時我曾經講過以大海故事為題材的好與壞，太偉大的背景會令故事失控，這問題在這集可算表露無遺。這系列到今集為止，人物和利益集團實在太多，因為劇本的不完整，令到角色關係十分混亂。另外，這電影實在太喜歡營造氣氛，好像周潤發、海盜會議、海魔女、東印度公司，全部都係只有前戲，沒有高潮的段落，十分之唔過穩。

睇完第三集既動作特技，我真係十分懷念第二集充滿成龍風味既動作，再一次證明鬼佬真係唔識拍動作喜劇，成龍萬歲。

故事既結局可算失敗，甚為討好既奧蘭度布林竟然落得此下場，相信唔係大家希望見到既結局。

唔應該有期望，所以唔會有失望。

刺青 Spider Lilies

這是一個關於記憶的故事。

以一些不願記起既事和人為題材的電影，實在多不勝數。西毒張國榮在《東邪西毒》會同你講，佢有一些朋友，可以幫你殺死那些你不再想見到的人。係《無痛失戀》入面，又有人發明了可以選擇性地清洗某段記憶的技術。

在《刺青》內，兩位主角都有不願記起的往事，但各有處理方法。梁洛施身上的刺青及弟弟的病情，無時無刻地提醒著她曾因為自已的一些越軌行為，令到家人受到傷害。對此她十分自責，變得從此拒絕對別人產生感情。楊丞琳孩童時被母親捨棄，只與失明婆婆過活，她欺騙別人母親已死，日間生活她無所事事，晚間她在網絡世界沉淪，內心卻經常想著孩童時期鄰家的男性化打扮姐姐。其實戲內梁洛施弟弟對往事的反應最為利害，因為親眼目睹家人死亡，驚嚇過度，變得自閉及自我封鎖有關記憶，對日常事物都很敏感。

在這電影，演繹了不同人對於往事的態度，有人逃避，有人自責，有人自我欺騙，好的故事令人有反思，這電影確實做到。

梁洛施簡直是香港電影新希望，張曼玉都要到出哂名先會選擇劇本，亦都拍過大量胡混電影。相反梁洛施十分受保護，出道至今，雖然產量不多，但全部都有質素保證，更難得是角色變化大，未被定形，希望她的經理人公司可以繼續以這方式去處理她，為香港新一代演藝界創造一位真正的明星。

愛情回水 Cashback

今次電影節我只選看了一部歐西片，同時亦是我今次電影節的最後一部電影，這便是來自英國的《愛情回水》。這電影繼承了《迷幻列車》等戲的講故事不忘爆笑風格，電影的主角是一名藝術系學生，失戀後失眠，在一間超市返夜班，在那裡工作的都是怪人，加上男主角一位老死，搞出大量不文低級趣味笑料，而在這些日子，主角發現他擁有了停止時間的能力。他把時間停頓，係咁畫係咁畫，將人美麗既一面捕捉，最後得到畫廊賞識，大團圖結局。

雖然片內存有大量不文笑料，但我相信導演是一名十分之追求美感的人，從電影中大量的鏡頭取景，都以背光拍攝去令人物變得美艷動人便可証明，那些女角的頭髮，在背光下閃閃發光，面目輪廓清明，普通女仔在鏡頭下都變哂索女。另外，在轉場方面，這電影亦用上了很多特效，鏡頭一橫拉，電影的主角便在現實及回憶中來回，十分有趣。講起特效，不得不提片中那些停頓時間的場面，而當中以最後男女主角在雪景中一幕最為難忘，兩人在停頓的雪走過，在空氣中遺留下一個人形，十分精細，而女角在走動時，面部撞向停在半空中的漂雪亦十分得意。

呢部戲令我諗起南韓電影《我的野蠻女友》，兩片都是在講故事時搭上大量笑料及特效鏡頭，令人看得賞心悅目。《我的野蠻女友》叫人為愛人搭機會之橋，而《愛情回水》就叫人珍惜相愛的一刻，時間不是敵人，討厭時間只是因為討厭自己，此片教我們應該享受一分一秒。

此片的笑料實在不容錯過，當中亦充分反映出現代青年在色情氾濫，前路茫茫下，捉不著時代的變遷，失落於生活，只有狂喜才能稍為生活加一些意義，可悲，但我絕對是當中的一份子。

莫失莫忘 Love Conquers All

身為香港人，睇來自馬來西亞或新加坡等南亞地區的電影時，總有一點精神分裂的感覺，因為那些角色一時講廣東話，一時講國語，一時講唔知咩話，而那些人唔似香港人，亦唔似內地人，又唔似台灣人，一時間文化背景總是好像搞錯哂咁，甚至連故事發生係咩時代都搞唔清楚。

這部電影原本叫《愛情征服一切》，後來改左名做《莫失莫忘》，都幾大轉變，基本上的唔明咩係莫失莫忘。部戲係講一年由外地搬入某地方的女仔，被當地一名男仔追，後來俾人呃，要賣淫救男友。

在這電影，有一個手法被運用了很多次，就是將角色在不同的時期放置於相同的情境。好像女主角打電話俾在舊地的男友，開頭是專心開樂地談心，中期被新男友擁著去打電話，後期更係拿著電話筒都唔撥唔出電話。全部事物都是相同，只有人面全非，就像在做科學化的對照實驗。相同的技巧，在女主角在家睇電視和買衫俾男友時都有出現。

坦白講，我唔肯定呢部戲既主題係咩，可能係講一些人認為愛情能夠戰勝一切，為了情人能夠心甘情願做一些傷害自己既事，亦單純地認為情人會變好。

我覺得，相信愛情係一件好事，如果雙方都是真心相信。

底下 The Basement

《底下》呢部戲所指的底下，除了是故事發生在大廈的地下室外，其實亦指人類面具底下的內心，我們以面具示人，即使情侶間亦然。電影的內容係講一位電影女工作人員，假日都返公司工作，舞蹈員男友到場陪佢，後來一名神秘人出現，要脅兩人在他面前搞野，更加要拍得兩人的親暱場面，三人不斷角力，最後情侶的關係終於破裂，雖然平日某程度上都在演戲，但被攝影機對著時反而對演戲反感。

此片的氣氛其實幾悶，剪接、配樂和鏡頭都無特別配合，自然簡單，取材上亦捨棄了很多枝節，全片都集中精力去令面具底下的黑暗填入觀眾的腦內，直令人有種吃不消的感覺。

片內的舞蹈員男友在外面有其他女朋友，女主角相信是清楚知道，只是一個在演沒有其他女朋友，一個在演唔知對方出面有外遇。觀眾應該好容易發現，女主角對男主角的表現很壓抑，所有話題都係一句起兩向止，唯有在搞野時才一下子像野獸般爆發出來，是否意味著她只有在那麼極端的情況下，才能稍為認為自己可以完全佔有男友？

神秘人的出現，雖然故事上他的出現未必能令人信服，但在意義上他卻很重要。一個局外人，冷眼地要兩個本來已在做戲的人做戲，完全破壞了兩人裝出來的平衡。而這名神秘人，最後卻發現原來是來身比地下室更地下的地方，而他亦有自己收藏的秘密。

導演這次探討人面底下的內心，著實令人心寒。

明明 Mingming

《明明》係一部十分之風格化既電影，難得香港有人肯出錢請咁多明星去拍一部咁另類既武俠片。此片的導演歐雪兒係本地名MV導演，第一次拍長片，亦不忘音樂部份，找來人山人海搞音樂。而電影中有不少場口，亦營造出一個很有MV感覺，初初睇幾得意，但略為多了一點，及主要集中在開頭，反而阻礙了電影的推動。

以誇張武俠片而言，此片絕對低調，除了幾場打鬥外，其他時候角色們都將《龍珠》角色般的身手收藏，而那幾場打鬥亦拍得甚為痛快，擺明係假，但係快而準。

電影中周迅一人分飾兩角，因為角色的性格、衣著甚至方言都唔同，所以絕對唔怕認錯人，而她對角色性格的掌握，已經再不用懷疑，表現得好真實。那位台灣男新演員，演起上來呆頭呆腦，不太突出。張信哲的角色較為內歛，此角色應可發揮得更好。

短片名導第一次拍長片，故事的展示算合格，但略為太注重於片段而失卻於全片的大氣流動。

十三棵泡桐 Thirteen Princess Trees

《十三棵泡桐》是我今屆電影節的第一部電影，事前對呢部電影完全無認識。這電影改編自小說《刀子和刀子》，講一班在泡桐樹中學的學生既成長故事，有苦有甜，感覺清新。

故事拍得出青春的苦澀，演員們大多都很自然。肥仔阿包那種半反派性格，甚為入型入格，可能根本係做番自己。短髮男角杜杜在扮cool的時候反而有種呆頭呆腦的感覺，有點可惜。女班長對主角阿風那種暗戀般的友情及保護，令我感到既珍惜亦可惜。主角阿風表情有點生硬，但可能這更真實，因為我們這一代都是不懂表達自己的一群。

電影除了講年青故事外，還側擊了家庭關係、教育制度及強權統治。家庭破裂，有錢的人多是黑幫，忠實的人便是窮光蛋，老婆走佬，兩代之間有極強代溝。學生以逃學為樂，老師不斷對家長及學生灌輸考試重於一切的思想。校長聽聲無見人，他的決定便是聖旨，一個噴嚏，以可比十級大魔獸。

唔知部戲係咪被再修剪過，絕覺得很多情節都係欲言又止，好像杜杜和女老師的師生戀，明顯地存在卻沒有後話，重有好多技節，都係開了頭卻沒有繼續發展，可能這在小說會有詳情，電影只拍了一部份，但這只是我的猜測，不能作準。可能，充滿暗湧也是青春的一部分。

英女皇 The Queen

成日都話睇戲可以學英文，我覺得《英女皇》呢部電影就最適合俾初學者作一個嘗試，片中的大部份角色都使用純正清晰的英式英語，大家可以試下唔睇字幕聽英文。

呢部電影以插入事件為開始，主講戴安娜死後皇室、官員、人民和傳媒的反應。因為無人物介紹，如果對英國皇室成員間的關係無咩認識，相信好快會訓著。電影內的節奏有快有慢，在講述貝理雅上任和戴安娜車禍等事件時都用上了明快的節奏，在描寫女皇的心理變化時，卻用了很細膩的手法去捕捉每個表情的變化。

有人覺得呢部戲係講緊英女皇的固執及其對戴安娜的偏見，但我覺得從另一個角度看，就可以見到她怎樣盡力去守護皇室、尊重民意及願意轉變。只要拿女皇和他的兒子查理斯比較，便能看到誰是為了自己、誰是為了國家和皇室。再看對待輿論的態度，比較一下同樣地是老舊一派的皇夫和皇太后，便能夠了解她是多麼的包容。最值得注意既一點係，英女皇唔係普通人，她是全世界其中一個最大權力的國君，就算佢真係咩都唔做，根本上係無一個人可以迫到佢，而最後能夠令佢卻步既，並唔係貝理雅或查理斯，而係人民對皇室的支持度。

係戲入面，貝理雅明白佢，你又明唔明白？

作為一個老人，面對權力的壓力和時代急速的變遷，女皇也是一個常人，也有吃不消的時候，係戲入面，她要在天地無人之時才可以宣洩自己的不安。此片其實是為英女皇解話，令人明白佢既處境，易地而處，佢個位都係咁難做。

門徒 Protege

《門徒》呢部電影，故事充實，氣氛緊湊，但可惜野心太大，想講既野太多。這電影的主題，到底是吸毒的沉淪、毒販的自欺欺人心理、社會低下層生活困境、警察的自私、還是片名的門徒關係？主題太多，觀眾很容易捉摸唔到重心，最後離場時腦內只有那幾場震撼既畫面，並未能夠做成反思，有點可惜。

其實從道德上看，其片引出了很多問題，首先是張靜初和古天樂對毒品的沉淪，毒品令到兩人失常、失信，最後失去一切，此片用了好多篇幅去展示俾大家睇吸毒既影響及恐怖，我覺得這些片段很適合俾年青人睇，讓佢地知道吸毒並唔係講笑咁簡單。

劉德華為自己的販毒行為辯護，亦值得深思，佢一方面認為自己販毒無錯，佢認為自己只是供求鏈上的一個角色，佢從來唔會叫人吸毒，但係其實佢自己都唔係好服自己既講法，可從兩點看出來，首先是佢每次為自己辯護，情緒都例必特別激動，靠大聲去加強說服力，只是弱者的行為，並不符合片中他的身份。另一點是他很相信報應，自己有糖尿病係報應，仔女唔孝順係報應，既然佢唔認自己做壞事，咁點解會有咁多報應？原因好簡單，就係其實佢自己都好清楚知道自己害緊人。

我無睇過爾冬陞既《旺角黑夜》，唔知佢係入面點樣拍低下層既生活，但我覺得在《門徒》中，佢將舊區、妓女和隱君子等都拍得很真實，幾期待佢可以單純地拍一部以低下層生活為主題的電影。

正如第一段所講，此片主題太多，反而對於門徒關係的描述比較少，劉德華和吳彥祖的關係交代得唔夠清楚，觀眾未必明白點解咁小心既劉德華要信吳彥祖。而他們的販毒組織，開頭講到好似好有架構咁，最後原來都係個幾個人既手作仔，有點虎頭蛇尾的感覺。

我始終認為爾冬陞比較適合拍一些小品式的故事，相信很多人都會認同，佢處理情感的手法很高，好像《新不了情》和《忘不了》，強行去挑戰一些大型製作，是事倍功半。

盛夏光年 Eternal Summer

再一次，好像每隔一段時間便會看一部來自台灣的電影，而且都是會產生一種相同的感覺。那些台灣電影，總是讓人看到台灣除了台北和高雄繁榮以外充滿鄉土味的一面，不論山水或舊舊的建築物，都是那麼美麗的，這不是那種天堂般的美，而是天地萬物都和諧地充滿生氣地在一起的美。

講番呢部電影，兩男一女，女﹝楊淇﹞喜歡男A﹝張睿家﹞，但男A喜歡男B﹝張孝全﹞，結果女和男B拍拖，後來男A和男B也真的搞上了，好一部青春片。當然，片長個半小時，當中還有很多細節。身為一個男孩子，男A和男B的關係令我有很大的認受感。細個既時侯，成績品行優異的男A和壞蛋一般的男B，長大後一事無成既竟然係男A，男B受歡迎讀書和運動叻。對於呢種現象，其實我好細個既侯，已經知道點解，受到過份壓抑的人，心理是會生病的，要專心於學業或事業更是天方夜譚，我想大家總認識一兩個在小學時讀書勤力得像一隻螞蟻，但後來無以為繼，中三都已經無貨賣既人。外在的他好像很勤力，只對讀書有興趣，但其實內在的他已經像一個殺人犯般的魔鬼。離哂題，講番男A，佢受到既壓抑大到你唔信，他在一個唔容許同性戀的地方，喜歡了一個自己奉命照顧的壞學生，得唔到自己想要既，自然會討厭自己，除了墮落，重可以做咩？

這不是他的錯，只是故事和人物偏偏發生在一個保守的世界，都係個句，好一部青春片，人在成長的同時，總是附帶著無盡的痛苦和上天的作弄。

Nana 2

《Nana2》這部電影可算是一個經典，經典在於它實在太悶了，簡直令我產生了多次離場的念頭。第一我睇過漫畫，知道哂劇情，第二這電影在節奏控制方面實在失敗，只是不斷將故事說出來，全無連繫，看得我久久未能投入。其實還有第三點，市川由衣實在唔靚，奈何這電影有大量她的大特寫，令人產生反胃的感覺和十分懷念宮崎葵，都係個句，唔係個個都可以扮可愛。

綜觀全片，其實劇情是不錯的，此片集中在小松奈奈的三角戀，但是導演並沒有好好把握，將奈奈、拓實和伸夫的張力拍不出來，完
全是白白浪費了。本片在只講小松奈奈的三角戀同時，其實放棄了很多漫畫內的枝節，亦甚為可惜。

全片有兩個位都以音樂演出為主導，頭一次是Trapnest在英國的拍MV現場，可算是敗筆之最，原本漫畫內會籍這次機會，講好多兩位NANA和男友的感情變化，而這電影內只是無厘頭地為現場造了一種好像很豪華的感覺，對角色內心完全提都唔提。第二次是首尾呼應的Black Stones在新宿街頭的演唱會，坦白講，是另一次浪費，雖然有講兩位Nana之間的友情，但是十分表面，而Black Stones各成員對於成名的追求，卻再次被遺忘了。但無論如何，這個街頭show的氣氛是不錯的，由觀眾的聚集、Black Stones成員到場和觀眾開始狂歡，都拍得不錯，但奈何這場show很快便結束了。

2006 年電影紀錄 (31 部)

傷城 Confession Of Pain

戀愛夢遊中 The Science Of Sleep

父子 After This Our Exile

遇上塔羅牌殺手 Scoop

死亡筆記：最後的名字 Death Note The Last Name

放．逐 Exiled

浮花 Volver

寶貝計劃 Rob B Hood

大丈夫2 Men Suddenly In Black 2

我要成名 My Name Is Fame

盲流感 Blindness

死亡筆記 Death Note

加勒比海盜：決戰魔盜王 Pirates of the Caribbean: Dead Man's Chest

反斗車王 Cars

新紮師妹3 Love Undercover 3

海神號 Poseidon

達文西密碼 The Da Vinci Code

暗湧 Invisible Waves

嘉比愛 Gabrielle

迷失決勝分 Match Point

你, 我, 他她它 Me & you & everyone we know

火車三段程 Tickets

伊莎貝拉 Isabella

黑社會 2 Election 2

V煞 V for Vendetta

獨家試愛 Marriage with a fool

弦途有你 Walk The Line

天生一對 2 become 1

真的愛你 Sad Movie

春田花花同學會 Mcdull The Alumni

戀人 Falling in...love