2005 年電影紀錄 (28 部)

• 哈利波特火盃的考驗 Harry Potter and the Goblet of Fire
• 四眼雞丁 Chicken Little
• 如果‧愛 Perhaps Love
• 無國界追兇 The Constant Gardener
• b420
• 世上的另一個我 NANA
• 怪物 Home sweet home
• 黑社會 Election
• 長恨歌 Everlasting Regret
• 當年相戀意中人 Broken Flowers
• 摯愛 Embrace Your Shadow
• 人細鬼壞 Mean Spirit
• 朱古力獎門人 Charlie and the Chocolate Factory
• 老友狗狗 All about my dog
• 天邊一朵雲 The Wayward Cloud
• 星球大戰前傳III黑帝君臨 Star Wars Episode III: Revenge of the Sith
• 戀愛地圖 About Love
• 珈琲時光 Coffee Lumiere
• AV
• 美蓮達與美蓮達 Melinda and Melinda
• 迷失天使城 Land of Plenty
• 鍚鍚又如何 Ae Fond Kiss
• 希特拉的最後12夜 Downfall
• 在世界中心呼喚愛 Crying Out Love, In the Center of the World
• 小飛俠前傳之魔幻童心 Finding Neverland
• 神經俠侶 Crazy N' The City
• 宇宙只有我和你 Last Life in the Universe
• 功夫 Kung Fu Hustle

哈利波特火盃的考驗 Harry Potter and the Goblet of Fire

之前三集我都未睇過, 幸好連貫性倒也不太大, 仲有女朋友事後講解, 都算睇得明. 大製作便是大製作, 高潮一浪接一浪, 音響特技也是一流的, 幾場危險追逐都很逼真.

好電影最重要的還是劇情, 將一本打得死人咁厚既小說, 拍成兩個半鐘, 加上之前幾集既伏線和之後的可發展性, 也難怪呢部戲咁受人歡迎. 單睇今集, 以黑魔王的勢力及行動為骨幹, 上面加上哈利和同學之間的緊張刺激生活來增加電影的活力及吸引力, 就像 Prime Scream 及 Chemical Brothers 等的跳舞音樂, 最重要的就是背後的 base line. 骨幹夠穩, 上面點玩都得.

正如之前所講, 將咁大本書, 拍成兩個半鐘, 其實在題材取捨上是很困難的. 大場面不能少, 重要的戲情交代亦不能少. 今集有部份時間是想講一些男女成長心理問題, 可惜有點造作, 效果不是太好, 好像白白浪費了一部份時間, 原本還認為這導演較擅長拍這種內心戲. 開場的世界杯也是, 大規模, 但係話完就完, 好似為結束而舉辦一樣.

角色方面, 瘋眼穆敵教授很型和勁, 希望真人都係咁勁. 其實除左白頭佬係唔多自然之外, 差唔多全部大人角色都好型, 雖然我是事後才知道清楚他們的身份. 喀浪及花兒戴樂古也感覺討好, 型及有感情.

上網查查才知道, 原來在聖誕舞會上那隊搖滾樂隊, 成員竟有 Jarvis Cocker 和 Johnny Greenwood, 真係點都估唔到, 認唔出佢地既歌, 難免有點傷心.

四眼雞丁 Chicken Little

今次迪士尼起單飛, 自己搞部動畫出來. 畢竟之前反斗奇兵, 海底奇兵, 怪獸公司, 超人特工隊等都太成功, 今次迪士尼要省靚自己個招牌, 應該好大壓力. 在宣傳上已可見到落重本, 一大班迪士尼朋友陪雞丁出場. 可惜睇完既感覺係人物太多, 故事太簡單.

其實主要角色得幾個, 雞丁, 鴨比, 肥溫和雞泡魚. 另外重有雞丁爸爸, 外星人, 幾個同學仔及村民. 但可惜部份劇情太刻意去扮其他戲, 以致失去主線, 時間是過了, 但還不清楚角色們的身份. 雞丁及雞丁爸爸的感情表達很不自然, 鴨比又經常長篇大輪, 唔知想點, 肥溫其實好搞笑, 唱歌跳舞食野都好多發揮機會, 可惜估戲太少, 雞泡魚全戲最型, 不繼扮野, 唔識講野, 但係最搶, 外星人三隻眼仔轉來轉去, 幾可愛, 可惜無咩表情, 來來去去都係笑.

如果話人細鬼壞係配音令到部戲好睇, 咁四眼雞丁便是相反了. 少爺占成日扮聲, 但係無感情, 是但一個片通片配音員都比佢好. 阿 sa 就好似比人玩咁, 一向講野都唔多清楚, 今次配鴨比要講咁多道理. 谷德昭唱哂歌, 幾好笑, 都係可惜肥溫出得多少. 雞丁爸爸其實配得幾好, 可惜係個角色既感情本身唔立體, 無咩特別. 林曉峰配既外星人爸爸, 平心而論係全劇配得最好, 有感情又好笑.

畫質方面, 今次昋港睇唔到最立體既版本, 意見唔算公道. 但係就咁睇, 好似比怪獸公司差, 影物上還好像不如反斗奇兵.

老實講, 係有點失望, 在戲情及技術上也好似退步了. 希望有下隻, 以肥溫及雞泡魚做主角.

如果‧愛 Perhaps Love

這部電影的主題其實很簡單, 就正如池珍熙一開場所講, 是要喚起人們已經遺忘的記憶. 張學友及周迅都因為成名, 拍戲時只著重於聲名, 反而忘記了自己真正想做的事. 金城武也是不繼改變自己, 由當導演系學生, 到美術系學生, 到演員, 以及和周迅的關係, 也顯出他自己都唔清楚自己到底想做甚麼.

雖然大意簡單, 但是故事的結構雖對不簡單, 戲中有戲, 有現代有過去, 戲內的故事, 和真人的故事又是這麼的相近. 但劇情安排得宜, 只要細心觀看, 也可以明白整個故事的來龍去脈.

十年前的北京, 那些小屋, 面檔, 冰川, 拍得很有感情, 周迅和金城武兩個在冰川上的幾場戲也令人難忘. 連場歌舞特技把演員的想法表現出來, 加上周迅和金城武兩人也好像會用眼神做戲, 一兩個表情已經將感情表達出來. 池珍熙源源不絕地送出招牌笑容, 幸好出場次數不太多, 否則觀眾會睇到反感, 現在的效果很好.

故事內也以電影業來講人的夢想和現實, 當中提到老闆的話事權, 演員的上位方法, 電影人的壓力等, 其實人在實現自己夢想時, 到底受到多少壓力? 要用多少手段? 在實現過程中, 自己的夢想又會否被其他事情所沖淡? 這些也是電影想表達的東西.

無國界追兇 The Constant Gardener

生命到底是否平等? 在這一部電影, 導演繼上一次在無主之城講巴西黑幫, 今次講非洲窮人所受到的不公平對待. 主角是一名派駐非洲的英國外交宮, 為人與世無爭, 太太則是一名平等主義者, 愛抱不平. 一次外訪, 太太竟與另一黑人死於荒野. 經過主角一輪調查, 竟發現了富強國家, 大財團援助窮人背後的大陰謀. 藥廠竟以非洲窮人作試藥之用, 為窮病人注射一些開發中的藥物, 以測試藥物的作用. 另外有部份捐贈到窮鄉的藥物更是已經過了有效期, 醫生得物亦無所用, 而藥廠卻省回大量廢物處理費及稅務.

導演上次在無主之城用上大量凌厲的鏡頭剪接去拍人流複雜的里約熱內盧小巷, 今次取而代之的是在車上及飛機上以超大廣角鏡拍出一片片的沙漠, 荒野, 及黑人的生治環境. 在幾場文戲也還看出一些令人看得緊張的剪接.

將時間打散重組的技術再被用上, 主角兩人的相識, 兩人對藥廠的調查, 穿插不定, 讓觀眾在適當的時間知道適當的東西, 這個技巧很難掌握, 但這裡用得很好.

以窮人的生命作試藥, 一世也還不完的債. 我想起早前在香港世貿會議其中一位來自非洲的非政府組織人員所講的一番說話. 她的大意是, 富強國家對窮等國家的援助愈多, 本士的資源愈是流失到富貴身上, 而窮人只會愈來愈窮.

偽民主, 經濟侵略, 不公平待遇...到底, 甚麼時候才有一個真正和平公義的世界?

b420

錯過了香港國際電影節和亞洲電影節, 終於在成式上畫的第一天看了這部 b420.

其實本身期望不太大, 因為始終是一班新手的獨立電影, 支持的原因是想看新一代香港獨立電影的功力, 早幾年香港制造對我的影響真的不少, 還記得型爆的中秋.

場地一轉, 這部電影的背景是澳門, 很好呢, 很難得一部澳門電影全劇也沒有賭場, 只有那些充滿色彩的舊樓, 不過份賣弄場景, 卻很自然地表現出澳門平凡的一面.

內容也算不錯吧, 人物的過去經歷分一段段插入, 總算最後也明白幾位主角的背景. 節奏很輕鬆, 一步一步的, 十分之青春片, 連最後結局也刻意不去制造傷感. 觀眾不用看得十分緊張, 可以好像 miki 和中學同學那樣想想 20 歲後要做點甚麼.

角色不多, 但性格也很立體現實, 李燦森扮廢人樣真係幾似, 無所事事, 生無可戀咁樣. miki 個角色做咩都咁開心, 唔諗後果, 唔怕人地誤會. 洪展明咩都要諗一輪, 又唔夠膽, 搞到俾屋企人當係基佬. 自殺女個角色都幾搞笑, 好似好豪氣咁, 其實份人好無聊. miki 兩個同學, 一個出左事, 一個成日都想報復, 最後搞出意外. miki 太婆, 洪展明阿媽, 收買佬其實都係用心設計既角色, 對白不多, 但為電影增加了內涵. 光頭佬由警察變到黑社會都係咁衰, 不斷去阻礙 miki 和朋友, 人生的障礙就像這種人, 以不同形式出現, 破壞別人的希望.

b420, before too old. 有太多事想做, 有太多障礙, 有太多期望, 有太多失望.

世上的另一個我 NANA

之前早已看過漫畫, 對劇情可算十分清楚, 亦明白真人無論幾似, 都係不及漫畫咁有型, 但作為一個 fans, 還是要乖乖去買飛入場.

電影內容可算依足原著, 但減去了很多兩位主角外其他角色的戲, 音樂加上真人演出, 幾場重點戲也都拍得很感動. 要將一部未完結的漫畫改編成電影一直也是一個大難題, 因為很難去定一個結局位, nana 算是做得不錯. 電影內成功將漫畫早期幾場重頭戲拍出來, 奈奈俾男朋友飛, 蓮離開娜娜住東京, black stones 在東京出 show, 兩個 nana 去睇Trapnest. 結局的放置令人有告一段落的感覺.

場景的展現也很好, 兩人合租的那間屋, 火車站等都很有漫畫內的感覺. 反而衣著有點失色, 兩位主角還算, 其他男角便有點樣衰的感覺.

音樂還是算吧, 漫畫內把他們的音樂說得那麼 punk, 那麼勁, 這些都是扮不來的, 反而做到配合氣氛, 已是很不錯了.

怪物 Home sweet home

怪物呢部戲入面有好多驚嚇片應有既元素, 林嘉欣既恐怖怪物樣, 舒淇一個人搵仔, 得不到別人幫助既完全無忙, 屋村內充滿生活化既黑暗地帶, 如像電梯槽, 垃圾站, 冷氣喉, 水箱等, 真實得令人番到屋企都仲驚緊, 電梯底那隻眼, 諗起都驚. 在技術上而言, 剪接及音樂也營造了一個很緊張的氣氛.

林嘉欣出名感情豐富及大動作, 今次怪物一角算是十分適合, 幾場抱仔戲都交足貨. 精神病後的戲亦很好, 一個人和空氣食飯那場更是甚為感人. 舒淇今次要著到咁靚左跑右跑, 又要無左個仔, 無左個老公, 警察又唔信佢, 個角色都做得幾好, 個無助及堅決搵仔樣都做到十足十.

其實電影除了主線故仔外, 另外似乎仲想講好多社會現象, 好像鄰居關係, 人和人的信任及疏離, 大型屋村的不為人知內部黑暗地帶, 社會發展為低下層造成不幸等, 但因為受時間所限, 這些都是略略提過. 故仔最大不足是結局比較草草了事, 林嘉欣既老公出現好像是為了完場. 但是小朋友被嚇到認錯阿媽呢點真係好得人驚, 如果係真都唔知點算.

黑社會 Election

好電影總是令人回味的. 一個有話題的題材, 一些意想不到的橋段, 一些不為人知的地下規則, 一幕幕經典的場面, 剪接快時緊湊, 慢時緊張, 音樂配合畫面氣氛, 要數電影黑社會的優點, 實在是很不容易, 因為這電影實在太好, 值得讚許的地方實在太多.

題材上, 雖然已經是香港電影第 n 部黑道電影, 但這電影在展示黑社會選龍頭及燒黃紙過程上, 卻極度真實, 王天林當中講點解由老鬼去選龍頭, 拍賣龍頭, 及和警察講香港古惑仔的重要性時, 內容更是充滿意義. 電影另一奇特是中段一大部份時間, 全部黑社會高層也是被困於警局, 而一班靚則在背面搶龍頭棍, 各大佬在警局內和警察互相利用, 又指揮出面的手下做野. 傳棍一段更值得記在電影史上, 場場也各有特色, 張兆輝的心計, 林雪的忠心, 林雪及林家棟由打人到相認, 林家棟和古天樂的追車及撞警察, 古天樂和張家輝的血戰 (我最鍾意呢場, 白面張家輝超型), 全程都很緊湊, 絕無冷場. 之後交通燈講數一場, 更是以最靜的方法去決定打與不打的問題, 緊張到爆. 遊乃海作的故仔已經很值得長期支持了.

角色多, 關係復雜, 但各人的性格也很鮮明, 最勁係張家輝食湯匙, 梁家輝及任達華一熱一冷, 一外一內有強列對比, 觀眾睇唔明唔怪得其他人, 只可以話係自己唔專心. 演員方面, 很配服杜琪峰的選角, 在他心中的演員竟然可以有這麼多角度的演出, 林雪次次都有新野, 張家輝和林家棟直情係完全唔同左, 只可以諗係杜琪峰既眼中, 原來張家輝和林家棟係咁既樣.

入場前都唔知, 原來呢部戲由譚家明剪接, 羅大佑配樂. 部戲既節奏好快, 幾場群戲都好緊張, 幾場打鬥的長鏡, 觀眾都好似置身現場咁. 開場音樂, 燒黃紙, 傳棍, 結尾音樂都好配合畫面, 以中樂配合黑社會是由古代流傳下來.

香港有好的電影製作人員, 好的演員, 這是一部有心的製作, 是一部很出色的作品. 傳聞中部戲會有下隻, 但係其實現在的結局已經甚為合理, 當然有好多野值得再拍, 但現在結束也不是問題了.

長恨歌 Everlasting Regret

長恨, 是因為不忠不實嗎?

這部戲在造型及時代也很容易想起阿飛, 2046 等電影, 畢竟兩戲的美指都是張叔平, 內容其實也是一些關於愛情的感覺, 更相似的是兩戲給人的印象也是難以明白. 但兩個導演在表達感情上可是完全不同, 王家衛的角色情感也十分熱情, 關錦鵬的卻是十分內歛. 鄭秀文演的王琦瑤其實在這劇做得很好, 在短短的一部戲, 經歷了這麼多事情, 大部份劇情也以演員的一兩句對白和眼神去交代, 而鄭秀文便是連起整部戲的角色. 以一個角色去描述一個城市的轉變, 她要去表現不同時代不同身份不同心情, 若有不足, 觀眾便很容易迷失.

很喜歡最後王琦瑤和表妹的對話, 表妹說王琦瑤人還不錯, 只是有點不忠不實. 我想這便是與自以為對的人發生一次又一次錯誤戀情的原因, 做得不是真正想做的, 最後得到的, 就只有長恨.

當年相戀意中人 Broken Flowers

呢部係香港接近無宣傳既戲, 其實陣容都幾勁. 迷失東京既標梅利, 莎朗史東, 日落巴黎既茱莉黛比及其他幾位女星. 電影內容其實幾高娛樂性, 一個很多女朋友既中年男仕, 有一天從一封信得知自己有一個 19 歲的親生兒子, 但係佢自己都唔知道當年到底係邊一個女朋友同佢生左個仔, 之後去搵自己覺得最有可能的五位女朋友. 聽落好似有點搞笑, 但係導演用左一種很慢的節奏去講, 令電影變成主要表達中年男主角的孤單及迷失在生活中.

男主角標梅利是一個事業有成男仕, 很受女性歡迎, 是現實中的大情聖, 但始終也不能找到固定的另一半. 他的現任女朋友茱莉黛比就是受不了他沒有安全感而離開. 在那五位女朋友中, 有一位已經死去. 其他出場的四位可算各具特色. 已變成寡婦的莎朗史東, 和女兒也很主動地搵食, 女兒更喜歡天體打扮. 飾演黛麗的法蘭茜絲康萊已成人妻, 但給人的感覺還是只愛標梅利, 好像自從和他分開後生命便停止了, 結婚後也一直不生孩子. 謝茜嘉蘭芝飾演的卡門, 已經不再對男人有興趣, 只與動物為伍, 成為動物溝通專家. 泰達史雲頓飾演的潘妮, 則十分痛恨標梅利, 亦是看似最有可能是誕下兒子的一個, 但是她完全不想和標談話.

導演將一段一段的事都講得好慢, 好平淡. 以非洲音樂配上男主角坐飛機, 駕駛車輪的畫面. 男主角看見一個又一個的舊相好, 顯得自己十分孤獨, 感覺很似他的前作迷失東京. 電影中亦有另一位中年男仕作對比, 就是標的鄰居謝菲韋特飾演的雲斯頓, 雖然他沒有標那麼富有, 但他充滿活力, 有好老婆, 有多名孩子, 對世事還充滿好奇和希望. 亦是他慫恿標去搵仔, 因為標根本不想去接受這個改變.

戲未男主角站在馬路上, 發現自己搵仔不果, 人到中年, 一事無成, 深深地迷失在這個世果. 給我的感覺很深刻. 生命好短, 話咁快就過, 自己真係要諗清楚自己想點過, 快樂並不難求.

摯愛 Embrace Your Shadow

其實睇之前都無咩期待, 只係因為好似好耐無睇港產片, 所以先去支持下. 馬偉豪還是不要再拍這種慘戲比較好, 強行大量大頭喊樣, Fiona 大頭特寫, 小朋友都係大頭特寫, 慢鏡將整個流淚過程像看生態動物片般仔細地展出, 但在其他戲情卻發展得甚不完整, 好像薛凱琪及郭品超一起的經過, 他們可算是無端端地便一起了, 還有郭品超的生世. 而有部份地方亦不太合情理, 好像戲中張國強死後, 理論上做妹的薛凱琪應該會怪責於郭品超, 但戲中卻甚麼也沒有. 感覺好像整部戲的目的是要做出幾段感動鏡頭, 然後其他也是強行連接.

雖然未睇過早熟, 但難免要比較一下, 聽人講早熟的四個大人做得好好, 很入戲, 令故事流暢很多, 及不用將戲份集中在兩個新人. 摯愛也有張國強, 相信大部份入場人士都覺得佢做得好, 但可惜戲份太少, 而且孤掌難嗚. 再加多一個可愛小妹妹都無咩用. 坦白咁講, 薛凱琪真係做得幾差, 個樣點扮都唔夠慘, 郭品超全場兩個鐘同一個表情, 彭敬慈做大佬又唔似大佬, 行為動作也好像想扮其他電影的大佬, 但最後卻甚麼也不像. 最後郭品超及彭敬慈一場打交戲, 可算是一點也不緊張, 雙線發展也全無驚喜. 結局也保持風格, 就是不清不楚, 難道這是賣點之一?

大量片段取影於元朗村屋及大角咀舊區, 可能想營造薛凱琪一家的脫節感覺, 但村屋實在拍得很普通, 並未對戲情及感覺上有甚麼幫助.

眼高手低, 導演懂得很多拍攝及營造氣氛的手法, 但可惜在運用上卻不甚到位, 反而令人看得一頭霧水.

人細鬼壞 Mean Spirit

未入場睇戲, 見到海報寫"內有惡B，敬請注意！", 又要係2B級, 真係幾好奇呢個細路到底有幾壞. 一開場就知點解, 原來係大朋友壞, 伴隨開場字幕既唔係咩音樂, 而係一連串既叫床聲, 片中亦有多場色情及血腥場面, 和大量 bb 自殺片段, 所以家長都係唔好同小朋友去睇, 大緊肚或者想生仔既都值得去睇.

電影一開始, 以雙線發展形式講葛文西點死和 bb 出世前既日子, 去實現兒女債係前世欠落呢樣野, 呢部份做得幾好, 講得好快, 將重要角色既關係都講得好清楚, 反正大家都係想睇 bb, 所以前世呢部份可以咁快講完, 大家都睇得開心.

呢部戲既最大賣點, 就係有葛文輝幫 bb 做配音, 配得很好, 好多好搞笑抵死既對白, 講既野又真係可以夾番 bb 個表情.

其實個故仔都幾好野, 首先講兒女債, 另外重講好多婚多情, 家長對子女既過份期望, 老人家既性需要, 貧富差距等好多好奇怪既現代關係. 以一個 bb 做引子, 講咁多社會問題, 雖然全部都係表面帶過, 但係起碼以令人知道社會上有咁多問題.

朱古力獎門人 Charlie and the Chocolate Factory

本人真心認為及相信沒有太多人會期待添布頓會拍出一部像教父, 的士司機等萬世經典之作, 但是從幻海奇情, 怪誕城之夜到大魚奇緣, 需然內容不同, 但是只要人們一看到畫面, 便已大約知道那是添布頓的電影. 史丹尼寇比力克(Stanley Kubrick) 在不同界別的電影中造出經典之作, 添布頓野心較少, 只在電影中都加入及實現大量神怪奇幻想像, 這便是他的經典吧.

這部朱古力獎門人, 中文釋名實在奇怪, 是將舊戲番拍, 無睇過舊版, 實在比較唔到新舊, 亦唔知有幾多係抄舊作, 唯有單純地當呢部係新戲來講, 請見諒.

故事其實甚為簡單, 角色性格亦力求做到一見就明, 主旨是講人的價值觀及做人態度, 用了很甜美的朱古力及歌舞去包裝. 值得一提, 電影中有很多工廠景, 除了主景朱古力廠, 還有牙膏廠和果仁廠也值得一提, 兩間工廠內的大量人手工作時像機器及機器運作時似人類, 在顏色及道具上也令人印像深刻. 朱古力廠內的一草一物都是令人驚訝.

尊尼狄普今次收起深情樣子, 用回那種多變的神秘表情, 似笑非笑, 甚合角色本意. 故事本身力求簡單, 電影用在介紹另外四位小朋友出場的時間比將他們逐一踢走更長, 運用大量相同樣貌的隆巴小矮人作出的連場歌舞, 以歌舞來說教比用真人有趣及易令人接受這些古舊道理. 最後小主角在五位中勝出, 也是因為他全程甚麼也無做, 可算是一個無犯錯便是對的例子. 小主角的父親 Noah Taylor 呆直的樣子甚為得意, Helena Bonham Carter 今次一反平常, 做一個正常的母親, 四位老人家比所有人都特出, 雖然他們大部份時間坐在床上演戲, 他們將老人的種種性格展現, 句句對白七情上面, 甚為可愛.

這應算是一部兒童片吧, 戲院內也有不少一家大細. 相對於開段及中段朱古力廠的事事鋪張, 結尾這麼快便將王卡衛性格完全改變, 顯得其實有點奇怪. 可能這也是家庭的力量吧.

老友狗狗 All about my dog

睇戲之前, 完全無見過呢部戲既介紹, 劇情當然唔知, 連部戲既格式都唔知, 對於電影內出現的多種玩味的手法, 甚為驚喜. 原本還以為會好似小 q 咁係講一隻狗和其他人的關係. 點知原來部戲係由好多隻狗的故事組成, 有些狗出現在不同的故事, 有些狗只係在一首歌甚至一段獨白中出現. 此片將不同的人和狗的故事合在一起, 電影的英文名 (All about my dog) 較中文名更能表達這種組合式故事.

一開始就係幾首人狗大型歌舞, 夠哂奇怪, 中文版有陳奕迅, 盧巧音唱歌, 歌詞當然和狗有關, 感覺很像 disney 片通片的中文歌. 第一個正式的故仔是有關一個人要拍一個賣狗糧的廣告, 甚為搞野, 講佢受制於廣告公店老板, 狗糧老板, 明星經理人, 拍了好多個不同的版本, 最後出街的一個廣告是沒有狗隻出現及觀眾睇完會爆粗, 不繼重覆差不多的內容, 很有趣的手法.

之後又講下這個廣告人小時侯和狗玩, 狗仔走很遠的路去追入了醫院的他, 狗仔中途又令人對情人復合, 中間又係咁唱歌, 最後狗仔搵到間醫院, 但係佢已經出院, 最後狗仔便住了在醫院直至老死.

中段又無端端插左一段自細都俾狗吠既人, 發明左一個狗譯通, 可以用佢來翻譯狗既說話, 佢在產品推出後都無用呢個狗譯通查下點解狗咁鐘意吠佢, 在一個電視訪問, 主持人叫佢試下, 原來狗係想佢知...得啖笑.

另 外又有一個主人同狗仔一齊去溝女, 連續幾個開心故仔都無咩特別. 點知到最後大約十分鐘, 內容同之前完全無關. 一個細路女加一隻狗, 一段第一人身的獨白再加一段第一狗身的獨白, 講個細路女同隻狗一齊成長, 但係隻狗就大得快好多, 重生埋狗仔, 最後重死埋. 之後到隻狗講睇住個女仔大, 好多謝佢對自己咁好, 好愛佢, 但好可惜自己要行先一步.

兩段獨白, 先係女仔, 後係狗仔, 畫面剛好相反, 先係人睇狗, 後係狗睇人, 好感動, 真係好感動.

從未試過俾電影戲情攪到咁感動, 黃秋生講得無錯, 小朋友同狗既演技最真, 再加一個咁簡單真實既事, 就可以令人咁感動.

天邊一朵雲 The Wayward Cloud

這電影色識上比鏡頭更大膽. 故事背影以台灣缺水, 西瓜大收, 人們互送西瓜以表情意. 西瓜在此片意義重大, 電影一開始便是半裸女護士把半個西瓜放在大腳內, 男主角李康生不斷對西瓜進行愛撫. 片中以新聞報道形式講出缺水情況, 再說人們飲西瓜汁比食西瓜來得快捷方便, 電影中男女主角亦對西瓜汁感到無趣, 追求真正的西瓜. 女主角陳湘琪在河上捨了一個西瓜回家放在雪櫃, 並於晚上無其他人既時侯吻西瓜取得快感. 片中剪接亦將陳湘琪吻西瓜和男主角拍色情片內女演員自摸穿插播出, 將西瓜和享受性愛連在一起, 是此片一個特色.

此片對白極少, 男女主角之間甚至只有一句對白, 以大量比喻及歌舞去交代戲情. 歌舞是本片另一特色, 數場歌舞都將演員們的內心表達出來, 李康生找人生的另一半, 過氣女優和故宮蔣公銅像的合演, 李康生弟弟不舉等都為電影的戲情解了畫及加派了樂趣. 歌舞內的歌, 人物造形及環境怖置也都是甚好, 配合戲情, 又造出另類感覺.

電影亦以大量性愛場面去諷刺現今 av 界的變態, 非理性及不人道. 手指狂插西瓜, 塞西瓜肉入女演員口內, 在缺水的環境拍沖涼做愛戲, 男角對著老女對手時不舉, 到最後女演員唔知係咪死左, 但都被抬去拍攝, 要攝影, 打燈及收音的員工移動她的身體, 去做出不同的花式, 而攝影機的鏡頭則是全程只是他們性器宮的超近鏡. 簡直是將現今 av 的變態, 不人道, 無厘頭的拍攝過程展現出來.

之前從未看過蔡明亮的電影, 想不到台灣有一位這樣極化的導演, 能在電影極端地表達一些東西, 同時完全放棄一些東西, 取捨的勇氣令人驚訝. 幾位演員的大膽演出同樣利害.

星球大戰前傳III黑帝君臨 Star Wars Episode III: Revenge of the Sith

u know....i too love star wars....

戀愛地圖 About Love

這電影是由不同人員在三個地方拍攝的小故事組成. 三個地方是東京, 臺北及上海. 三個故事主題分別是你好, 謝謝及再見. 三個故事都是講述一些不同語言國藉的人, 關於愛情及心靈交流的事情. 故事間人物沒有直接關係, 只是有一兩個角色會出現在其他的故事, 擔當一些不起眼的角色, 但對了解劇情卻有幫助. 三個導演都似乎希望利用故事表現人與人之間其中一種的交流, 分別是結識, 幫助及離別, 用上不同語言的演員, 是想表示這些交流都是最真實, 最基本, 最本我的.

日本導演下山天的你好, 講發生在東京一對男女的結識. 戲中開始便是兩人第一次巧合相遇, 之後用了大部份時間去舖排最後兩人的重逄. 日常生活中, 經常都會在一段時間巧合地遇上一些人, 而在很多情況, 那些人亦會慢慢地不再在你的生活中出現. 戲中陳柏霖在街頭遇上伊東後, 在巧合情況下, 亦發現了伊東的畫室, 為伊東畫了一些畫, 而伊東亦開始發現身邊的這個人, 但是兩人也是不認識的. 最後的高潮便是陳柏霖決定主動去認識這位身邊巧合出現的人. 最後他們亦是很老士的再次在東京街頭相遇和認識. 生命中會遇上很多不同的人, 怎樣建立和他們的關係, 其實深深改變生命的發展, 而這些關係, 總是由一次你好所展開.

台灣易智言導演的謝謝, 講剛失戀的范曉萱怎樣得到新相識加瀨亮的幫助. 他和她只是新相識, 他幫助她搬書架, 她借助他的肉體給去想她的舊男友, 他送她去找舊男友, 他幫她去約舊男友. 一個人獨立生存, 是不簡單的. 很多時侯, 也需要朋友仗義相助. 一場相識, 不論深淺, 伸出援手的, 可能是另有目的, 可能只是無所事事. 很喜歡故事在沙灘一段, 由范曉萱教加瀨亮怎樣和舊男友說話, 到加瀨亮向范曉萱複述舊男友的說話. 兩人都表現得很真, 演技很好. 暗暗的沙灘亦很配合氣氛.

中國導演張一白的再見, 講日本人塚本高史來中國讀書, 住了在李小璐的家內, 李小璐日久生情愛上塚本高史, 但塚本高史並不知道, 亦要回去日本. 離別是痛苦的, 特別是和喜歡的人. 導演在戲內除了表現人與人的離別, 亦對舊上海式平房說再見, 戲中有新舊上海的轉變, 亦有李小璐母親的守舊. 不知導演是有心還是無意, 故事內男女主角的不快, 都是不能宣泄, 只能向一面牆出氣. 這故事的感覺很舒服, 靚仔靚女的主角, 濕濕的平房, 踏著單車, 生活好像很慢的. 雖然是離別的故事, 但並沒有太刻意去營造傷感. 李小璐對男主角的愛及道別時的傷感也很自然, 沒有造作.

三個故事有一個共通點, 就是三個都是開放式結局的. 這個安排很好, 在一部電影, 要交代三個完整結局, 只怕會弄巧反拙, 反正這些也是很生活化的故事, 就交由觀眾自己想像故事再發展下去是怎樣吧.

珈琲時光 Coffee Lumiere

電影節的節目及訂票手冊說這是侯考賢導演向小津安二朗導演的致敬之作. 之前沒有看過小津安二朗或侯考賢的電影, 亦搞不清到底是舊故事重拍, 還是其他的合作方式...只是看到一些電影劇照, 好像懶懶的, 很舒服的樣子, 便買票入場.

電影的節奏很慢很慢, 大部份鏡頭都是靜靜的不動十數秒, 角色對白也不太, 全部人也是在閒閒的行行企企. 全部人也在生活. 不清楚日本人的家庭觀念到底怎樣, 但說到劇中唯一也難得地令我感受到的是女主角一青窈及雙親的關係, 母親表現的關懷及擔心, 父親的自我性格及收藏了對女兒的關張, 在劇中都表達得很真實, 很含蓄. 而一青窈, 淺野忠信及萩原聖人的友情, 最利害的便是他們那些沒有很多客套說話, 真正的好朋友便是這樣. 說話不用多, 要給你知的, 你已經一早知道. 不好的便是對白真的太少, 令萩原聖人的存在感很低, 亦不清楚他們的關係.

我感到片中最想表達的是新和舊, 生和死的交接. 一青窈在戲內全程也是懷孕的, 片中亦出現了一些掃墓及親人去世的消息. 現代的一青窈, 在找已故著名音樂人江文也的事情. 現代的淺野忠信, 是舊書店的老闆, 亦是火車發燒友. 好像要帶出人的生有時, 死有時. 但做了的事情, 卻是無限期存在於世. 片中出現了數次及片未的數條火車橋交接的鏡頭, 便更有一種新舊並存的感覺.

可能因為道行實在未夠, 鏡頭亦實在太慢, 所以在戲院內睡了不少時間, 實在感到不好意思. 電影的故事內容, 亦是後來從網上得知的. 亦知道了, 這次致敬, 侯考賢導演說自己是以小津安二朗導演的手法去拍這個故事的.

AV

有人說這電影很下流, 很色情及露骨. 本人最期待看到的不是主角們有多鹹濕, 大學生有幾無用. 而是想看一種人, 怎樣利用身邊所有人或機會, 去達成目的. 出賣朋友不是問題, 反正他們知道這些朋友不是真正值得信賴的朋友. 社會道德不是問題, 因為他們早以對社會失望. 他們的一些鬼主意, 因為常常會巧妙地利用了一些人, 而為自己及另一些人造成好處, 所以他們不會受到其他人的不歡迎, 反之社會及朋友間都會認為他們是成功人士. 他們對自己的主意, 計算之精確及長遠, 行動之冷血, 令人讚嘆. 電影入面, 導演彭浩翔今次也還是計得很準, 咁多個主角, 只安排了一個半這樣的人, 一個是周俊偉, 半個是曾國祥. 周俊偉在曾國祥身後, 表面最壞的是曾國祥, 但實際指揮及提出意見的卻是周俊偉, 看過此片的人都不要忘記, 欺騙女伴而實際去徐天佑睇片, 提出拍 4 仔, 成功騙取政府錢, 到最後欺騙所有人令電影不能出街的, 都是這位周生, 他行動之部署及快速, 及導演這樣不將電影重點放在周的壞, 個人認為, 是全片最好的地方.

在講故仔既手法, 導演還是用回他一向的技巧, 在大量真實度極高的小事上, 講一個誇張失實的故事. 那些真實度高的小事, 個別對故事劇情沒有任何幫助, 整體卻提升了現代感及可信性. 好像那些講曾偷食, 曾及周扮壞人溝女, 當街睇女及公開討論個波有幾浪", 肥仔周振輝勁想但又唔敢同女朋友做愛, 點知女朋友係出面偷食偷到超勁. 這些也很真實, 觀眾會有共鳴.

片內亦很重視一個訊息, 分別由天宮在片頭及完結時講了一次. 內容大致是當你以為自己對社會有影響力既時侯, 你就會開始發現, 自己係幾咁微不足道. 以這樣的形式去令人覺得這是一部年青人入社會的電影, 是一個敗筆, 畢竟, 片中只有又南一個表現出這種感覺, 強行說教扮有野, 反令人有點反感.

美蓮達與美蓮達 Melinda and Melinda

中國古代便有孟子墨子講性本善和性本惡. 小孩初出生, 尚未有方法證實是善是惡. 但成年人經過數十年經驗, 能否說出人生是喜還是悲?? 所有人的生路歷程都唔同, 是喜是悲, 其實只視乎點樣去睇生活上的每個小節.

活地阿倫再次用他的失敗者故事, 說著一些很長的道理. 故事開始由一個喜劇作家和悲劇作家的討論開始, 喜劇作家說人生充滿悲慘, 喜劇只是令人內心過得好一點. 悲劇作家卻持相反意見, 說人生充滿希望, 悲劇故事並不現實. 故事再以一人物 - 美蓮達身上的一連串事件來個雙線發展, 喜劇作家的故事令美蓮達及身邊一班失敗中年的生活中, 著重於一些笑位, 來一個悲慘背影中的開心事件. 悲劇作家卻把故事說到美蓮達和身邊的人不繼地作出一些行為, 傷害到身邊的人, 美蓮達成為最終的失敗窨. 最後再回到最初的討論, 人生點樣, 視乎你點睇, 再加一個估你唔到的結局.

故事本身玩味十足, 雙線發展, 幸好絕無冷場, 否則稍一分神, 必定變成迷幻美蓮達. 角色性格及內容還是一向活地阿倫最愛的中產, 失敗男人, 婚外情, 小氣但長氣男人. 兩個美蓮達故事的男主角都是不如意男演員, 終日無所事事, 受制於老婆, 最後原來大家都入面一個, 出面唔知幾多個. 喜劇版本美蓮達的男主角 - 韋法路, 表現全場最好, 將小氣, 咸濕, 妒忌, 無用表現哂出來, 那些冷言冷語更係全場笑位主要來源, 一段段出自妒忌的說話, 絕對笑到眼水都出埋.

片內環境亦都還是活地阿倫的作風, 全片都展現紐約市內中產一族的日常生活, 生活無趣, 婚外情, 在他的鏡頭下, 成為紐約人的招牌. 配上大量爵士樂, 現代的大城市, 面具下的最低層, 除了性, 還有甚麼? 人生怎樣都好, 最緊要還是發現和感受當中的點滴, 珍惜自己的生存, 是悲是喜, 這也是你的生命.

迷失天使城 Land of Plenty

故事格局上, 這電影和的士司機是一樣的. 一名越戰軍人, 一名女孩, 大城市的黑暗面. 但是, 雲溫達斯的手法和馬田史高西斯便完全不同, 的士司機內的是完全黑暗及無望的, 迷失天使城則有一點對生命的希望, 及多了一點對政治味道, 反正是很難去做得比的士司機黑暗, 雲溫達斯把影片弄得有一些淡淡的美, 那些人煙稀少, 小貓三四隻的公路及小鎮, 這些也是他的成名把戲.

德國藉的雲溫達斯今次繼續他的美國電影, 以故事形式, 說美國政府的不是. 美國外表的富貴, 原來全因無人去理一些窮人, 大城市如 NY, LA 等, 社會極度分化. 數街之距, 便是商業區和貧民區, 貧民區內的人權, 性命和福利, 都是一文不值. 自己內部未攪好, 卻要去管他人的國事. 無良政客藉 911 作個人宣傳拉票. 劇中男主角更是一針見血, 把所有阿拉伯人當成恐怖份子. 最壞的, 原來卻是一些美國白人少年, 以殺人為樂, 有錢大哂.

從影片一開始, 女主角從非洲戰區走進外表美好的祖國, 看到的, 卻是更壞的情境. 男主角, 受越戰影響, 變得極度神經質, 911 後, 更令他好像重回戰爭時代. 一老一少, 展開公路旅程, 男的慢慢感到, 自己一直相信是對的祖國及其他民族的都是壞人的信念, 原來並不正確. 女的, 卻以純潔的心去面對悲傷的事情, 面對身邊的生命不繼離去. 劇未到 911 現場, 講出了, 人們希望得到的是生命, 和平. 把黃昏的 NY 拍得很美.

雲溫達斯的城市和公路攝影, 絕對令人神服, 暗暗的大城市, 無人的公路, 都係勁靚. 配合大量 post-rock 歌曲, 視聽上, 這已是一個慢慢的悲劇. 據說全片以 dv 制作, 我根本就睇唔出有咩分別. 這是一部氣氛沉重, 小小黑暗, 小小希望, 有政治, 有反戰, 再配上大量淒美的影像和歌曲的電影. 值得一看.

鍚鍚又如何 Ae Fond Kiss

其實, 這是一個很簡單及老套的故事. 兩人的愛情, 受到家庭, 種族及宗教的影響, 而不能順利發展, 而到最後終於還是在一起, 從故事簡介, 甚至覺得和我愛碧咸一樣. 但是, 導演堅盧治除了為電影加了一個較現代的故事背景及講了一些少數族裔在英國的生活外, 亦以一向的寫實手法, 令到電影的真實感很強, 節奏亦很明快, 一段段的起落, 時間掌握得很好. 故事背景為了要做到那種天地不容的愛情, 亦沒有一些令人不能信服的地方.

因為戲中的女主角是一名中學音樂教師, 所以戲中有很多鋼琴演出, 聽得甚為開心. 男主角則是一名 bar dj, 所以亦有一些 party 情節. 導演的手法甚為特別, 在故事上亦加了一些出人不意位, 例如女主角私生活的公開, 女主角是一名天主教中學教師, 戲中有幾場是她常常在街上與男友一起時, 遇見大量學生的場面. 最有趣的還算是她的神父和校長, 是完全知道她私生活的一切, 好像和誰同居, 有沒有性行為等, 知道的原因絕對令人費解, 但顯示了宗教的那個網很大. 另一出位之處就是勁惡的神父, 重惡過黑社會. 男主角在戲中十分重視家人, 而他的家人亦很特別, 他的父親更是一個令人神傷的角色.

這部戲和其他相似題材故事的不同之處, 是電影著重於民族, 家庭和愛情之間的持久性. 願意為了一段不知道會維持多久的愛情, 而去放棄家人, 民族及宗教嗎? 現在願意放棄, 到愛情變質時, 會後悔嗎?

導演今次說回一個愛情故事, 並不像雙失十六歲那樣偏激, 節奏明快了很多, 生活感很強, 但說的還是英國國內的社會問題. 不知不覺間, 這已是我看堅盧治的第二部電影.

希特拉的最後12夜 Downfall

這部電影是改編自一名當年希特拉的秘書寫的書, 所以戲內的內容可信性應該幾高, 片中亦不時出現一些以第一身的說話. 但這些以秘書身份的說話多是一些逃避當年責任的解釋, 解釋的原因多是年少無知, 令人稍為反感.

片中的內容是講述在二次大戰德軍兵敗如山倒後, 希特拉自殺前的十二日及死後數日發生的事. 片中的情緒也隨著時間轉變, 從一開始的緊張戰爭, 到之後所有人都明白戰敗, 只有希特拉一人還堅持德國還會得到最後勝利, 飾演希特拉的演員十分出色, 將那些瘋狂和神經質做得很好, 都唔知佢點樣抽離個角色. 跟著到希特拉到自殺前的準備日子, 所有人也覺得對前路無哂希望, 唔知道應該投降, 自殺還是作垂死反抗, 氣氛極度低沈. 跟著到希特拉自殺, 死後那一刻所有人也靜了下來, 一直支持的人退出了, 他們真的是不知道自己可以怎樣做. 隨之而來的是一個又一個的支持者自殺, 場面極度可怕, 最震撼的是一名婦人認為子女不能生活在一個沒有社會主義的世界, 所以將自己的孩子全部毒死, 這場戲描寫得十分仔細, 傷了所有觀眾的心. 最後一段便是德軍投降後, 一些人認為應該珍惜生命, 一些人追隨希特拉而死, 整部戲見得最多光便是這裡.

電影中用了很多細節去講一些人的瘋狂支持心態, 除了婦人殺子, 還有一班小朋友當兵, 拎住支小型兵器, 對住一架坦克, 還是覺得德國必勝的無知. 對於一個主義及一個人的支持, 原來可以達到這個地步, 實在令人驚訝. 當全力支持的東西化為烏有時, 對人的傷害才是最大.

在世界中心呼喚愛 Crying Out Love, In the Center of the World

並沒有想像中咁好睇, 愛情線不是太感人, 亦沒有想像中般出現一份淡淡的清新. 最感動的反而是男角故地重遊在幻想後回復真實的一刻, 過去了的地方, 感覺和記憶...都是過去了...看得想哭. 柴崎幸既角色作用迷離, 大澤隆夫只像一個只會想過去的低能. 長澤正美除左勁索之外, 都做得好純, 光頭更是令人尊敬. 森山未來都做得幾好, 只係再一次証實了, 唔靚仔既女朋友, 多數係勁索.

行定勳今次真係有點令人失望, 拍純真鄉郊故事, 有點岩井俊二的影子, 可惜功力還是不夠. 攝影師篠田昇的最後一部作品, 影色還是很美, 那些山, 無人島, 學校, 都是他的強項.

故事並沒有太刻意去做一種勁慘既氣氛, 加了一點對未來的希望, 意識不錯. 最後一場, 坐黑人順風車, 再壞車一段, 真的和全部戲的感覺都十分之不協調, 有點攪笑.

小飛俠前傳之魔幻童心 Finding Neverland

這電影是講小飛俠的作者在創作小飛俠期間所遇到的人和事, 改編自真人真事, 有點兒悶, 但是精神還是不錯. 小飛俠的原作者 J. M. Barrie 在未推出小飛俠之前的一段時間, 在事業及家人的關係也不太好, 擁有超強幻想力及童真的 J.M., 太太沒有明白 J.M. 的想法, J.M. 反而在和寡婦及她的四個兒子的生活, 卻令他創作出著名的小飛俠.

飾演 J.M. 的 Jonny Deep, 樣子一向也有點神秘感, 今次做一個充滿幻想力的角色, 亦經常做出一些發呆思考的樣子. 電影初段在他的作品在首映時, 亦有一些他的獨腳內心戲, 但略為不足, 而那些緊張樣子亦做得不太好. 反而在一些他和小朋友合演的場面, 他表現得比另一主角琦溫絲莉自然得多, 可能因為他有了孩子, 心境詳和了 (oops, 我們的 jonny deep 詳和了). 另一男角德斯汀荷夫曼在片中的戲份極少, 只是做一個支持 J.M. 的戲院班主, 對白和出場也是很短和很快, 在這些不連續的演出下, 他亦顯示出他那些支持和無奈. 琦溫絲莉做一個寡婦, 要照料四個小童, 那個辛苦樣不太假, 因為可以理解現實中真係會好辛苦. 小朋友們做得不錯, 那些小眼睛及著了細細件的禮服的樣子都超可愛. 由茱莉姬絲汀做琦溫絲莉的媽媽, 做傳統和守舊的女性, 做得十分入形入格, 尾段拍手掌一段亦顯功架, 可惜發揮不多.

片中的 20世紀初期的歐洲式環境做得不錯, 花了不少時間去講那時人們對戲劇首映的期待及重要性. 不時出現的一些幻想場面亦很有趣, 但可以玩得更多更放. 全片最印像深的其實是 J.M. 和太太的一段情, 太太認為, 他獨自發呆望向遠方, 眼中根本沒有她. 是跟不上? 還是根本上是兩個世界的人? 有些事情總不能勉強, Neverland 也要和真正適合的人一起找.

神經俠侶 Crazy N' The City

這部由阮世生導演, 方平及爾冬陞監製的電影. 格局是一部充滿計算及滿佈流行元素的香港商業片式作品. 但是當中的多元性及計算的準確度, 卻是絕對超水準, 唔會太過表面, 亦唔流於煽情, 屈指一算, 呢部戲有演技派, 偶像派, 新人, 警察, 未成年學生, 內地骨妹, 傻佬, 愛情, 熱誠, 失意, 破產, 強姦, 地區文化, 公司高層, 友情, 親情...講左好多好多野, 但係真係無一樣係過左火位, 份量剛剛好, 足夠令觀眾感動, 又不至令觀眾反感.

演員來講, 吳鎮宇今次做精神分裂的傻佬, 唔係扮低能, 唔係要亂叫亂打, 傻得好直, 係真係精神分裂, 個精神錯亂樣好真, 好迷失. 陳奕迅做一個心理更年期既差佬, 心入面個團火就熄又唔熄咁, 做得幾好, 起碼少左佢以前個種勁誇張既表情. 容祖兒既戲份其實好少, 可能係大家既福氣, 做一個剛剛出學堂既新人, 認真得來又傻傻下咁, 都算係咁. 戲中另外三位女角反而較為搶鏡, 做按摩女郎的張萌戲份好多, 比到觀眾個種純真和對世界有希望的感覺, 感情上亦表現到個種唔知應唔應該的迷惑. 吳日言和雪菲只係做兩個學生妹, 一個純情一個開朗, 一個遇害一個傷心, 以純真的心令陳重新振作, 平平無奇卻串起了故事. 林雪做既失業漢, 惠英紅做吳既家姐, 錢喜樂做既朋友, 廖啟智做既老差骨, 官恩娜做既舊女朋友. 以錢喜樂及廖啟智做得最好, 錢喜樂一兩個眼神就將個種由細玩到大既感情俾到大家睇, 廖啟智在陳的回憶中個幾段內容, 將中年的無奈及無力展現出來.

從片尾的 NG 片段可以大膽估計, 呢部戲係剪得好利害, 好多場戲都只係出左一兩秒甚至剪哂, 令到部戲好多感情位都唔會過左火和太悶, 導演及剪接有呢個勇氣將咁多埸剪去, 值得一讚. 戲未吳發神經一段, 十分之反高潮, 勁緊張. 最後吳復原一段, 更是甚為感人. 整個故事也是在灣仔進行, 喜歡灣仔或舊區的人有福了, 戲中沒有刻意展示區中的懷舊美, 卻以很平淡及生活的形式表現, 令電影的真實感大增.

這是一部多而不亂的電影, 無論是包含的元素甚至演員, 都是很多, 但故事並沒有雜亂無章, 內容有起有落, 值得一看.

宇宙只有我和你 Last Life in the Universe

這部電影有一個很浪漫的中文名, 並不是由英文直譯的, 但是, 卻十分配合電影那濃烈的孤獨感. 戲入面講一個身在泰國的日本人和一個即將去日本的泰國人, 兩個人的生活完全不同, 日本人是有條有理的圖書館館理員, 泰國人是與妹妹相依為命的舞女.

日本人面對不能改變的過去, 懷著沉重的自責, 經常意圖自殺, 但總受到其他事情所影響而未能成功. 故事並沒有提日本人的過去, 只是好像不能回日本, 背後有勁大幅紋身同埋最後有人由日本來要殺佢, 其他野都唔係好知. 由淺野忠信擔演的這個日本人, 以木獨的表情加一些細微的眼神, 將這個角色的孤獨, 不安, 守規則, 冷漠的性格表現出來.

兩個人在故事初段, 都失去了親人. 疏離的日本人對哥哥之死, 沒有傷心. 對整齊的家沒有歸屬感, 反而喜歡停留在泰國女孩的舊屋, 幫女孩執屋. 泰國女孩失去唯一的妹妹, 傷心欲絕, 女孩亦即將離開泰國, 去日本工作, 片中亦從一些對白中展現出女孩即將離開故鄉的無奈及不安, 及在失去時, 才慬得珍惜身邊重要和美麗事物的心理.

電影入面用了很多很迷幻的鏡頭, 值得一提是女主角幻想家中的雜物四處亂飛, 一件件充滿回憶的物件在家中飛來飛去. 日本人想像自己跳海後在水中的一段亦很迷惑. 電影中用了一種很東南亞的顏色, 暗暗的色調, 整部戲都像身處夢境, 疑幻疑真, 攝影指導杜可風可記一功. 電影中最奇幻的可算是兩姐妹仙妮達邦雅淑和賴烈亞邦雅淑的演出, 因為在妹妹死後, 妹妹依然經常出現在劇中, 到底那是姐姐在扮妹妹, 還是日本人的幻想, 還是我們唔識認泰國女仔既樣? 這真的是一個迷...

電影為了表達主題之一的異鄉人語言不通和男主角的內向性格, 電影二個鐘內的表白都很小. 導演彭力雲坦拿域安除了運用大量演員的眼神表示角色的心理外, 亦用了很多道具去描述主角的日常生活, 就像日本人自準的食具和家中大量整齊的書, 泰國女孩的車和家中凌亂的物件, 對電影均起了很大作用.

整體來說, 這是一部很細緻的電影. 音樂, 布景, 道具和對白都很有心思, 將角色的心理變化描寫得很細膩. 劇情亦有很多地方沒有明確說明, 充滿迷團, 連結局也是突如其來, 為觀眾引來很多聯想.

功夫 Kung Fu Hustle

2005 年, 第一戲, 功夫. 係睇左差館個段及用斧頭幫跳舞去顯示斧頭幫勢力個段, 個種直接地暴力和輕鬆節奏講黑社會既手法, 真係以為自己睇緊 Quentin Tarantino (Pulp Fiction, Kill Bill) 或者Martin Scorsese (Goodfellas, Gangs of New York) 既戲. 反而之後以宇幕講斧頭幫既勢力及介紹豬籠城寨就顯得有點畫蛇派足, 故事既時代背景係跳舞個段要講既其實已經講哂. 而係初段包租婆元秋出場個段, 亦令我諗起麥兜既麥太.

今次入場睇既, 唔係睇周星馳做既戲, 係睇周星馳導既戲. 係故事既編排上, 其實好多內容都無詳細咁講, 幸好故仔都尚算易明, 令到節奏都十分明快, 每個位都有野睇. 而係安排真功夫同特技既比重, 可以叫做全片最值得一讚既地方, 有用特技, 但係唔會蓋過中國功夫既威勢. 硬橋硬馬係咁打既場面亦恰到好處, 如果唔係就真係變左七小福成年版.

係選角方面, 馮小剛客串鱷魚幫幫主, 係驚喜. 元華元秋係絕配, 好難諗到有其他人做到更好既效果. 做火雲邪神既梁小龍, 絕對俾到個種無敵既痛苦及狂. 另外在片中三個以真功夫演出既趙志凌(裁缝), 董志華(油器)及行宇(苦力), 亦充實了整部戲, 將能屈能伸及武者既精神都展現到係戲入面. 小龍既斧頭幫幫主可以話係另一驚喜, 甚至覺得佢做得比謝賢係少林足球更奸. 係制作班底方面, 有袁和平和洪金寶, 真正既國際級, 將特技及功夫都編排得好好.劉鎮緯既制作, 唔怪得咁多估唔到既地方.

功夫, 係周星馳用鬼佬錢拍, 但係可以咁講, 成部戲都完全無令人睇低中國既功夫及精神, 反而可以用咁多錢去搵一班真正適合既人去演. 周星馳既病態李小龍崇拜係今隻亦都無咩出現, 最後既大對決, 係如來神掌大戰金庸既蛤蟆功, 係真正香港及中國人入屋既功夫.

成部戲整體來說, 可以話係戲味十足, 比得上我覺得周星馳最正既食神. 比起以前既戲, 今次係少左好多難忘既對白, 但可幸周星馳真係做到退下來, 戲分大減, 但其實今次由先係真係成部戲真屬於周星馳, 每分鐘都感到他的安排及心思.

唔知周星馳係部戲本身係咪有野想講, 但係我都有唔少感想, 連黑幫都唔理既豬籠城寨, 但其實高手雲集, 係香港嗎? 家家有本難諗的經, 能力越大責任越大, 只想過平靜既生活...這些都是現在的影況...原來, 我們的偶像, 今次用了六七年代式的武打片, 講了現在的環境...