文章
2005 年, 第一戲, 功夫. 係睇左差館個段及用斧頭幫跳舞去顯示斧頭幫勢力個段, 個種直接地暴力和輕鬆節奏講黑社會既手法, 真係以為自己睇緊 Quentin Tarantino (Pulp Fiction, Kill Bill) 或者Martin Scorsese (Goodfellas, Gangs of New York) 既戲. 反而之後以宇幕講斧頭幫既勢力及介紹豬籠城寨就顯得有點畫蛇派足, 故事既時代背景係跳舞個段要講既其實已經講哂. 而係初段包租婆元秋出場個段, 亦令我諗起麥兜既麥太.
今次入場睇既, 唔係睇周星馳做既戲, 係睇周星馳導既戲. 係故事既編排上, 其實好多內容都無詳細咁講, 幸好故仔都尚算易明, 令到節奏都十分明快, 每個位都有野睇. 而係安排真功夫同特技既比重, 可以叫做全片最值得一讚既地方, 有用特技, 但係唔會蓋過中國功夫既威勢. 硬橋硬馬係咁打既場面亦恰到好處, 如果唔係就真係變左七小福成年版.
係選角方面, 馮小剛客串鱷魚幫幫主, 係驚喜. 元華元秋係絕配, 好難諗到有其他人做到更好既效果. 做火雲邪神既梁小龍, 絕對俾到個種無敵既痛苦及狂. 另外在片中三個以真功夫演出既趙志凌(裁缝), 董志華(油器)及行宇(苦力), 亦充實了整部戲, 將能屈能伸及武者既精神都展現到係戲入面. 小龍既斧頭幫幫主可以話係另一驚喜, 甚至覺得佢做得比謝賢係少林足球更奸. 係制作班底方面, 有袁和平和洪金寶, 真正既國際級, 將特技及功夫都編排得好好.劉鎮緯既制作, 唔怪得咁多估唔到既地方.
功夫, 係周星馳用鬼佬錢拍, 但係可以咁講, 成部戲都完全無令人睇低中國既功夫及精神, 反而可以用咁多錢去搵一班真正適合既人去演. 周星馳既病態李小龍崇拜係今隻亦都無咩出現, 最後既大對決, 係如來神掌大戰金庸既蛤蟆功, 係真正香港及中國人入屋既功夫.
成部戲整體來說, 可以話係戲味十足, 比得上我覺得周星馳最正既食神. 比起以前既戲, 今次係少左好多難忘既對白, 但可幸周星馳真係做到退下來, 戲分大減, 但其實今次由先係真係成部戲真屬於周星馳, 每分鐘都感到他的安排及心思.
唔知周星馳係部戲本身係咪有野想講, 但係我都有唔少感想, 連黑幫都唔理既豬籠城寨, 但其實高手雲集, 係香港嗎? 家家有本難諗的經, 能力越大責任越大, 只想過平靜既生活...這些都是現在的影況...原來, 我們的偶像, 今次用了六七年代式的武打片, 講了現在的環境...
3 則留言:
其實我入場時都expect會笑到肚痛先出來~ 不過出場的時候我覺得自己看了一場popcorn荷里活電影~
至於整部戲的劇本，若以認真的態度來看代，個人認為不夠完善，變身高手的背景交代得馬馬虎虎，賣雪糕女孩有湊戲之嫌，處處顯露著別的戲的影子不是問題，但matrix由頭到尾都有便cheap了點兒~
抄有抄得好和不好之分，好像搞乜鬼奪命習作咁明刀明槍地抄，又點到即止，周不時潤人一下，呢樣個人覺得便抄得好。但星爺是次有很多場都是陰d陰d抄(即抄了也沒人知)，實在非常港產沒性格~ 不是太好~ 可能因為見這部戲像想打入荷里活所以要求會高了點(既然星爺都執得咁正來做，三年la wo)
方間說星爺拍這戲是因為小時對功夫的夢想~ 好吧，可以因為這一點而原諒他的任意妄為~~~
好唔好笑都好 la, 就好似 d 人抱住想睇搞笑片既心態咁睇無痛失戀. 最後一定失望格. 入戲院前既心態都好重要, 可能就係因為 jj 話過唔好笑, 我又信哂佢, 所以先覺得好睇.
我又唔覺由頭到尾都似 matrix wor, 抄左都無人知, 就唔係抄 la, 除非唔係人 la~~~ 搞乜鬼奪命習作係勁正, 對白場影抄到足, 又玩好多經典位. 但係呢部係尊重功夫既片, 總唔能夠希望 d 人耍完幾招之後踩屎 pk 引人笑架. 如果係咁就真係令人失望 la.
我都認同好多地方都無講清楚, 特別係同周星馳有關既地方, 唔知佢係特登收埋自己定係唔想講咁多自己 suddenly 變得超勁. 畢竟如果講太多佢點解咁勁, 就變左超人片, 好似百變星君咁咪重唔尊重中國功夫.
賣雪糕女孩就真係有 d 過份. 唯一諗到佢既作用就係俾人睇亂世都有好人. 傷殘人士都可以自力更生 . 不過其實都係可有可無.
如果你始終都係想笑到死咁既心態去睇戲, 好老實講, 不如去睇鄭中基. 同埋部戲除左個班師兄弟, 都多左好多其他人呀...你都要體諒下周星馳架, 唔通拍十幾年都重係要引人笑咩. 其實今次都算有少少笑位架 la, 相比起西遊記上下集可以叫得上係完全唔好笑. 掛羊頭賣狗肉, 點都唔夠喜劇之王, 除左個名有喜戲兩個字之外, 成部戲都係講一個做極都唔紅既慘人同一個舞女.
當年西遊記就真係轉得過左火, 但係之後由喜劇之王開始, 周星馳 d 戲開始正如你所講, 將要講既野同搞笑加埋一齊, 但經過左喜劇之王講既堅持, 少林足球既心入面個團火, 今次加埋既係好人有好報同對功夫致敬, 相對地搞笑場面係少左好多. 但係觀眾總唔能夠期待哂自己睇到 d 咩咁入場架, 如果係咁, 就不如唔好睇 la.
主、配角不分, 都係你預左成部戲都係睇周星馳 ja, 其實少林足球都已經少左好多周星馳. 主角要比配角有壓倒性多既戲分, 都只係部分人既一廂情願 ja.
最後唔死, 重打低埋火雲邪神. 無非都係要係邪不能勝正之後, 再玩多下黃飛鴻式既原諒壞人, 重當火雲邪神既暗器係玩具玩 tim (玩法明扮阿甘, 算得上係最大敗筆).
如果唔當呢部係反智式笑片, 真係當佢係一部對港式功夫舊片既致敬片, 就其實真係幾好, 畢竟有學到黃飛鴻, 如來神掌, 金庸, 拳腳棒既功夫. 又唔算失禮, 除左表面, 連個 d 邪不能勝正, 原諒壞人, 好人有好報呢 d 內容都有埋. 如果現代人要睇中國功夫, 睇周星馳既功夫, 總好過睇 kill bill 呀, kill bill 只係學表面功夫, 一d 中國武術既內涵都無, 鬼咁暴力, 重好有武士道精神 tim.
發佈留言