葉問２Ip Man 2

實不相瞞，我是有諗過唔睇這部《葉問２》的，因為害怕續集無進步，又係一次超人打外族既表演，硬銷民族感情，但最後還是為支持港式武術片和葉偉信，入場看了這部電影。

以武術片角度去睇，今集的確有進步，無錯這又是一次神級表演，分別有一個打幾十個同埋打鬼佬，但相比起第一集，起碼會令觀眾覺得甄子丹有機會唔夠打。一個打幾十個人個場可以講係打極都打唔完，如果唔係有人插手，佢最後都會無力。甄子丹對洪金寶和大隻鬼佬的兩場比試，甄子丹都並非完全佔上風。故事當中能夠有這種差不多實力的對手，確實可增加故事的耐看性。

故事講葉問來到香港開武館，我其實幾期待故事能夠引入多一點葉問講道理的情節，畢竟現實中的葉問和其後的李小龍也著重於武術中的道理。

葉偉信作品，唔小得食飯，我還以為甄子丹救完洪金寶個肥仔之後，洪金寶會叫甄子丹一齊食飯，順便解去雙方的不和，但最後只是洪金寶一家自己食飯，但從當中亦可見到洪金寶身上的家庭負擔，葉導演用食飯講故事確係有一手。